Суал-жаваб

Ислам диндиъ, хъюхънин коррекция апIуз пластический операцйир ва кIвантIар аьхю апIуз косметический процедурйир апIуз хай шулин?

Эгер саб тяйин вуйи ва дигиш дапIну ккуни дюшюш арайиз дуфнадарш, анжагъ жвуван рябкъювал дигиш апIбан ният ади косметический, ясана пластический операцйир гъахуз хай шулдар. Жвуваз аьшкь бадали, ясана мусурман дарударин аьдатарихъди гъягъюри, дици апIуз ихтияр адар.

Дицдарикан гьисаб шула машнан, хъюхънин, уларин, ибарин кIалиб дигиш апIуб, ясана кIвантIар ацIу вая ккуру апIуб.

Пластический операция апIуз хай шулу, анжагъ гьамцдар себебар арайиз дуфнайиган:

а) эгер инсанвалин кIалбар ва юруш чIур апIурайи лишнар кади вуш, мисалназ, машат шлуганси ликуди вуш, хъюхъ лап кьяниди вуш, ясана жара гьацдар себебар арайиъ аш;

б) эгер бабкан шлуган дарди, кьандиси нукьсанар арайиз гъафнуш, мисалназ, машар гъургнуш, кьаза-балайикк ккахъну дигиш’валар гъахьнуш, уьзриан гъабхьиб вуш ва гь.ж. шартIариъ.

КкудучIву суннат-ушвар кьаза апIуб ужи ву, кIуру гафар дюзидар вуйин?

Шафии мазгьабдиинди, ккудучIву суннат ушвар кьаза апIуб ужи ву.

«Суннат ушвар дисуз ужуб вуйи йигъан бисру ушв ккадапIнуш, думу кьаза апIуб ужи ву».

«Шли итни ва хамис йигъан ушв ккадапIнуш, дугъаз кьаза апIуб ужи ву» («Гьяшия аш-Ширвани»).

Саспидари гъудган апIруган, ясана дюаь апIруган, заваризди лигури шулу, амма узуз жараси гъеебхьунзуз. Гьамдин гьякьнаан фу пуз шулу?

«Гъудган апIруган жвуван заварихьинди лигуб гьаму гьядисдиинди карагьат ву: “Гъудгнин вахтна заваризди улар за апIру ксари фтикан фикир апIура? Гъит дици дарапIри, дарш дурар уларин рябкъбахъ мягьрум хьузра мумкин ву”»

«Эгер гъудгник дарди дюаь апIру вахтна заваризди лигбакан улхуруш, аьхю пай аьлимари думу хай шулу гъапну, имам Кьази Иягьдин гафниинди, гьаз гъапиш гъудгниз фици Кяаьба кьибла вуш, ари дюаьйизра завар кибла ву… Имам ад-Дамирийи кIураки, “Аль-Игь’я” китабдиъ имам аль-Гъазалийи кIура: “Гъудгнин жикIбан кьяляхъ апIру дюаьйиъ жвуван лигувал заваризди лигувал хьуб ужу ву”». («Гьяшия аш-Шабрамалляси»)

Саб суалнакан гизаф фикир апIури шулза. Жаназа-гъудган апIруган, рукнар ва суждйир гьаз апIурдар? Дидин гьикмат фтиъ а?

Жаназа-гъудгниъ рукнар-суждйир адрувалин гьикмат гьашваъ аки, Исламдикан аьгъювалар адру джагьилари думу суждйир гъудган апIурайидарин улихь хьайи майтиз апIура кIури, фикир дарапIбан бадали («Фатгьуль Аьллам», 226 маш).

Инсанарикан сабпи ражну «Ассаламу аьлейкум ва рягьматуллагьи» гафар гъапир фуж ву?

Сабпи ражари «Ассаламу аьлейкум ва рагьматуллагьи» гъапир Адам пайгъамбар ву.