Суал-жаваб

- Мусурман жилирихь хпирди гъахьи мусурман дару дишагьли бицlир фуник кади кечмиш гъахьиган, наан фаракьат апlуру?

- Эгер мусурман жилирихь хьайи мусурман дару дишагьли кечмиш гъахьнуш, думу мусурман дару ксарин накьваригъ фаракьат апlуру.

Эгер дицир дишагьли фуник бицlирра кади кечмиш гъахьиш, думуган мусурмнаринна мусурман дарударин накьварин арайиъ, кьиблайихьинди илдицну, фаракьат апlуру.

- Гьяждиз, ясана Уьмрайиз гъягъру дишагьлийихъди жиларикан фуж душну ккунду?

- Эгер дишагьли сабпи ражари вуди гьяждиз, ясана уьмрайиз гъягъюраш, Шафии мазгьабдин асас фикриинди, дишагьлийиз багахьлу мягьрам вуйи жиларикан фужкlара хътардира гъягъюз ихтияр а. Хъа эгер думу, саб ражари чан фарзар тамам дапlну, кьюбпи ражари гъягъюрайир вуш, чан багахьлу мягьрам кас хътарди гъягъюб гьярам ву. Аллагьу Тааьлайин амриинди гьич сар касдихьанра фукlа апlуз даршул.

Ккурттарик деебццнайи ифи кади гъудган гъапlиш кам шуйин?

Имам Шафиийин мазгьабдиинди ифи гъеебцциб вуш дарш фаркьвал адар, гъудган кам шулдар.

Йиз жигьил вахтна жвуван аьгъдрувалиан узуз сигьру гъапlунза. Гьамус гизаф швумалди вуза ва Ислам диндиъ улупнайи къайдайиинди алдабгъуз ккундузуз. Фу дапlну ккунду?

Жвуваз вушра, жара касдиз вушра сигьру апlуз хай шулдар, гьярам ляхнарикан ву. Хъа уву му ляхнин чlурувалин гъаври хьувал ужу ву. Гизафси гирами Калам урх, эгер урхуз аьгъдарш, хъпехъури йихь. Хъа сигьру алдабгъуз гирами Калам урхури алдабгъру касдихьна илтlикlубра герек ву.

- Тlаваф апlурайи вахтна гъудгнин жикlувал чlур гъабхьи касди фу дапlну ккун?

- Тlаваф апlурайи вахтна эгер шлинкlа гъудгнин жикlувал батlил гъабхьиш, дицир касди, тазатlан гъудгнин дижикlну ва чан гъудгнин батlил гъабхьи йишвхьан сакьюдар ликар кьяляхъ алдагъну, ари гьадму йишвхьанмина чан тlаваф давам апlуру.

- Ич гъулаъ гвачlниндин экбер кьанди тувру. Магьа гирами Ражабдин, Шябандин ва Рамазандин вазар ккергъра. Гьаму вазариъ гизафдари ушвар дисури шулу. Ушв бисрударикан гизафдар экбриз ккилигури шулу. Гьаму кьанди туву экбрихъди гъибису ушв фици шул.

- Гьяйифки, му суалназ фикир тутрувру ксарра а. Саб гвачlниндин ваъ, хъа вари гъудгнариз экбер чан вахтна тувну ккун. Ушв бисбан гьякьнаан кlуруш, эгер сюгьюриъ уьл ипlуб вахтниинди дебккундарш, ушв бисувал кам шулдар. Имамди, ясана экбер туврайи муэдзинди, гъудгнин вахт якьинди фила улубкьураш, ахтармиш дапlну ккунду, эгер чахьан аьгъю апlуз шулдарш, аьгъю агьлари кlурайибдихъди душну ккунду. Экбер туврайири чан аьгъдрувалиан кьанди экбер тувраш, думу кас имбудрин ушв батlил хьуз себеб шулайир ву. Гьациб читин ляхин шула. Гьаддиз, магьа гьаму ихь газатдин машарианмина дицдар ксарихьна илтlикlурахьаки, эгер учву гъудгнин вахтар якьинди ахтармиш дапlнадарш, аьгъю ксари гъапибдихъди душну ккун, учвланмина имбударин ибадат чlур мапlанай.

- Йиз гьамциб суал айиз. Жилари дюаь апlруган, гьамцдар гафарра ишлетмиш апlуру: «Дишагьлийирин футнайихьан уьрхя, я Рабби», - кlури. Гьаму гафарин гъаври адарза. Йиз фикриан, гъийин девриъ саспи жилари апlру футна гъеебхьган дишагьлийир дурарин багахькьан тевуз шулдар.

- Ужуб суал ву. Ав, мистариъра кми-кмиди гьациб жюрейиинди дюаь апlури ебхьури шулхьуз. Уву кlуруганси, гьяйифки, саспи жиларира гизаф футна апlури шулу. Гьаддиз дюаь апlруган «вари футнакрарин футнайихьан уьрхя» кlури ккарагуб ужи ву.  Гьамци гъапиган, гьадму дюаьйиз футна апlру жиларра, дишагьлийирра дахил шула.