Суал-жаваб
Суал-жаваб
Гъудгнар апIрур дарза, хъа гьиччаб алабхьуз ккундузуз. Яваш-явашди гъудган апlузра хъюгъюз ният айиз. Гъудган дарапlди гьиччаб алабхьуз ихтияр айин? Саспидари, хай шулдар, кIура
Дурар кьюбибра фарз вуйи ляхнар ву. Фици гъудган апlуб ухьуз фарз дапlнаш, ари гьаци дишагьлийи чан аьвратра ккебкну ккунду. Гъудган хъасин апlидиза кlури гъибтуб думу шейтlнин ляхнарикан ву. Диди уву, хъасин-хъасин кlури, аьхириз гъитди. Гьаци вуйиган увкан лап ижмиди ккун апlураза, уву гьиччаб алабхьуз фици ижми ният гъапIнуш, ари гьаци гъудгнизра ният дапlну, дишлади гъудгнарихъ хъюгъ. Гъудган ккадапlган фициб гунагь ашра, гьиччаб алалабхьруган фициб ашра, учу ихь газатдин машариъ фукьан вушра гъибикlунча. Гъит Аллагьу Тааьла кюмек ишри.
Гьар йисан подписка апIру вахт гъабхьиган, ич гъулан имамди, «Ас-салам» газатдиз подписка мапIанай, думу ужуб газат дар ва душваъ улупнайи рузнамайихъди гъудгнарра мапIанай, дурарин рузнама дишди тяйин дапIнайиб дар, кIура. Гьамдин учу гъаврикк ккаайчва.
«Ас-салам» газат, гъийин йигъаз ихь арайиъ гьякьваликан, ужувлакан хабар туври улихь хьайи газатарикан саб ву. Хъа му газатдиз подписка мапIанай кIуру ксар, ич фикриан, я чпи ляхин дарапIрудар, ясана жарадари ляхин дапIну даккнидар ву. Варидариз рябкъюраки, ихь газатдикан халкьди фициб мянфяаьт ктабгъураш, хъа гьяйифки, саспидарин юкIвари думу кьабул апIурадар ва, гьаддихъди сабси, дурари, му диндин газатдихьан ярхла апIуз метлеб ади, инсанарин арайиъ футна ипри шулу. Хъа ухьу футнайихьан гучIрудар дархьа. Шли фу гъапишра, иншаАллагь, газат урхрударин кьадар йигълан-йигъаз артухъ шула. Хъа рузнамайикан кIуруш, ихь республикайин аьлимари, швнуд-сад йисандин арайиъ гьар гъудгнин вахтнан гюзлемиш`вал гъабхури, думу вари терефарихъанди ахтармиш дапIну тяйин дапIнайиб ву. Эгер шликIа думу гьякь дар кIураш, гъит чпиз айи далиларра хьади Дагъустандин Муфтиятдиз илтIикIри. Хъа чпизра саб жюрейин аьгъювалар адарди, хъа имбудари апIурайибдик тягьна кипри хьуб, думу ужуб ляхин дар.
Гьюрматлу редакция, гьаму диндин газат себеб дубхьну, йиз вари хизан гъудгнар апIуз, чпин али фарзар тамам апIуз хъюгъну. Аьхю вуйи чухсагъул учвуз! Гъит Аллагь ﷻ кюмек ишричвуз! Гьамус учвухьна саб тIалаб айиз: шлубкьан гизаф жилиринна хпирин аьлакьйирикан, чиб-чпихьна айи гьякьярикан вуйи макьалйир чап апIинайчва.
Чухсагъул учвузра учу апIурайи ляхниз мициб кьимат тувбан. Учу гьарсаб нумрайиз жиларизра, дишагьлийиризра ва бицIидаризра кади шлу макьалйир чап апIуз чалишмиш шулача. ИншаАллагь, хъанара артухъдиси думу ляхниз фикир тувдича.
ГьапIруш мюгьтал духьназу. Ич гъуландари, узу чпихъди убхъури дусурдар кIури, узуз «имбударихъди даршлур», «жямаьтдихьан ярхла вуйир» кIури шулу. Узуз саб сабурнан гаф тувайчва.
Увуз дици кIурудар чпи аькьюллу инсанаригъ гъяйидар дар, дурар шейтIнин дустар ву. Инсан арагъ убхъбиинди инсанаригъ шлуб дар. Ихь Пайгъамбар ﷺ, адлу аьлимар арагъ убхъбиинди инсанаригъ гъахьнийинхъа?! Уву дицдар ксарин гафариз фикир мутуван. Йигъарикан сад йигъан дурар чпин апIру ляхнариин, гафариин швумал хьиди ва увухьна, чпиз багъишламиш апIин, кIурира гъюб мумкин ву. Эгер кьабул апIуруш, дурариз насигьят тув, кьабул апIурдарш, ув’ин али фарзар тамам апIури ва дураризра дюаь апIури йихь.
