Суал-жаваб

Гъуншди гьарган чlурувалар апlури, асиллагь сикин гъитрадарзу. Йиз терефнаан гиран ктапlуз ккунди адарзуз. Хъа узу ккебехъбахъ йигълан-йигъаз хъанара артухъ чlуру ляхнар апlура. Гьамдин гьякьнаан саб насигьят тувайчва.

Гъуншйир чиб-чпихьна аьхю гьюрмат ади духьну ккунду. Пайгъамбарихьан ﷺ дуфнайи саспи риваятариъ, уву гьязур гъапlу хурагра кмиди гъуншдизра капI, кlури дупна. Гьамдиан, Пайгъамбари ﷺ гъуншйирихъди вуйи аьлакьйир зади дерккуб тlалаб дапlнайиб, мялум шула. Эгер гъуншди дицдар ляхнар апlуруш, ужуб гафниинди дугъаз пуб герек ву. Думу гафнанра гъаври шулдарш, имамдиз, я аьлим касдиз, ясана дугъан мирасарикан сарихъди гаф-чlал дапlну, дугъагъди гъаври ахъруганси гафар апlуб лазим ву. Йиз фикриан, сарин дарш, тмунурин гафнакан мянфяаьт шул.

Фукьан чалишмиш гъахьишра, гвачlниндин гъудгниз вахтниинди гъудужвуз шуладарзухьан. Гьар ражари дахъруган ният апlурза, амма шуладар. Дахърурра кьанди дахъри шулза, ухди дахъну кlури, ахуз шуладарзухьан.

Дугъриданна, гизафдариз гвачlниндин гъудгниз гъудужвуз читинди шулу. Хъа яв дюшюшнаъ уву гъудужвуз даршлувадин себеб улупунва. Думу кьанди дахъувал ву. Инсанди йишвандин вахтна эргвал дапlну ккун, хъа ухьу сяаьт кьюбариз даърахди гъузган, гвачlниндин гъудгниз гъудужвуз мумкинвалар цlибтlан адар. Гьаци вуйиган, уву гьар йишван апlурайи ниятнахьна сабси, сабпи нубатнаан, вахтниинди дахъну, нивкlуз гъягъюз чалишмиш йихь. Яв беден гьаддихьна гьязур апlин. Эгер вахтниинди дахъри гъахьиш, вахтниинди гъудужвузра шул. Думутlанна гъайри, хулаъ айидарикан, ясана шликанкlа увуз зенг дапlну вушра, уягъ апlуб ккун апlин. Телефондиъ будильникра дебкк ва увхьан цlиб ярхлади див. Уву гъудужвну гьаддихьна гъягъруганси.

Аллагьу Тааьлайин ччвурар кlваълан гъапlиш, ужи даринхъа?

Дугъриданна, думу ужуб ният ву. Думутlанна гъайри, гьадму ччвурар кlваълан дапlну, жвуву дюаь апlруган, гьадму ччвурар кlваин апlури ккарагуваликан хъана аьхю мянфяаьт а. Гьаци вуйиган, думу ляхниз асас фикир тувуб ужи ву ва шлу касди вахтниинди думу ччвурар кlваълан апlубра ужи ву.

Йипайчва, гьич саризра уж’вал апlуз ккунди имдарзуз. Ихь инсанар, уж’вал апlбахъ, артухъди пис шлуганси рябкъюразуз. Йиз уьмриъ аьхиримжи вахтари му ляхникан гизаф фикир апlураза. Гьаз-вуш му йиз гафар гизафдарира тасдикь апlура. Шариаьтдиинди гьаму ляхнин къайда фициб ву?

Уж’вал гьарган дапlну ккуниб ву. Гьарсар касди апlурайи уж’вал сабпи нубатнаан чаз апlурайиб ву, чан аьхират ккабалгурайиб ву. Ухьук саб аьхю гъалатl ка, гьадди ихь вари ляхнар чlур апlура. Гьар ражари ухьу тмунуриз уж’вал гъапlган, думу ужувлахъан тмуну касдин терефнаан ухьухьнара саб ужувлаз ккилигури шулхьа. Эгер дугъу дарапlиш, гиран апlурхьа. Ари гьаму варитlан аьхю гъалатl ву. Дици дубхьну ккундар. Гъапlунва уж’вал, дидкан кlваълан гьарх. Дидхъан герек вуйи ужара-саваб Аллагьу Тааьлайи тувур. Гьаци гъабхьиш, Аллагьра рази шул ва ухьу тмунурикан жвуван терефназдира ужувлариз ккилигури дусуб герек даршул.

Вахтниинди хизан ккебгъуз ккундузуз, амма аба-баб гъаршу ву. Дурари сабан ухди ву, кlури шулу. Гьадрарин гьял аьгъяди, магьа йиз жигьил уьмур гьамци адапlураза. Фици гъапlиш, ужи шуйкlан?

Сабпи нубатнаан абихъди-бабахъди дидин гьякьнаан гаф-чlал дапlну ккунду. Эгер увуз начди вуш, яв терефнаан сар жара касди дурарихъди гафар апlри. Жигьил касдиз вахтниинди хизан ккебгъубтlан ужуб фукlара адар. Гьаз гъапиш, думу лап аьхю гунагьнаъ ахъуб мумкин ву. Гьаддиз му суал вахтниинди тамам дапlну ккуниб ву.