Узуз ккундузуз Женнетдиз
Узуз ккундузуз Женнетдиз
Фици касди хъапlиш уьмур,
Аьхиратдиз гьаци гъягъюр.
Шлин-вуш тямягь ву Дюн’яйиз,
Шлин-вуш тямягь - Аьхиратдиз.
Фици гъяруш Дюн’яйилан,
Гизаф асиллу ву ухьлан.
Мушв’ан гъягъруган инсандин
Ккудубкlуру вари ляхин.
Амма шубуб ляхин гъузру:
Ва саб кlуруб гъапиш, фу ву,
Ккудудукlру садакьа ву,
Гьаддиланра савабар ву.
Уву киву мейвайилан,
Уву гъапlу рякъярилан,
Уву диву гъядарилан -
Чан ужудар ляхнарилан.
Хъа кьюб кlуруб гъапиш, фу ву,
Ишлетмиш апlру илим ву.
Шубуб кlуруб гъапиш, фу ву,
Дуаь апlру веледра ву.
Дюн’яйиин аьхирин йигъ,
Думу ву вардиз рябхъру йигъ.
Йикlувал «Раккар» ву думу,
Ва гьадлин аьгъиди ухьу.
Йикlувал, кlура, саб «Гъаб» ву,
Ва дид’ан убхъиди ухьу.
Эй, Адамдин бай, увура
«Фикриз гъадабгъ» - ужуб кlура.
Дердхьан шадвал ярхла даршул,
Дапlну ккун Аллагьдиз шукур.
Сургъу-гьисаб фици шулуш,
Аьгъдар жаваб тувуз шулуш.
Ухьу Аллагьдихьан вухьа,
Кьяляхъ гъягъиди Дугъахьна,
Агъюдар, агъдрудар саб дар,
Агъювал Женнетдиз –ряхъяр.
Диндикан дубгъай - учвуз кlур,
Ва илимдикан дубгъай - кlур.
Ва ужувлар апlинай - кlур,
Ужудар ляхнар апlин - кlур.
Апlинай гьюрмат - учвуз кlур,
Ва ужуб гаф апlинай - кlур.
Вари дюзди апlинай - кlур,
Аллагьдин рягьмат – ухьуз кlур.
Аьхиримжи гафар ккунду,
«Ла илагьа иллаЛлагь» хьну
Шул женнетдин пай кайидар,
Гьаму гафар дупну гъушдар.
Женнетдин рякъ шулу ачмиш,
Шлукьан гизаф зикрар гъапlиш.
КIваъ убхьури зикир гъибтиш:
«Ла илагьа иллаЛлагь», йип.
Йишван-йигъан гъудгнар ву хьуб,
«Рамазандин» ушвар дисуб,
Гьялалилан закат тувуб,
Удукьуруш, гьяждиз гъягъюб -
Мурар вари ву ккун дапlну,
Фарзар ва суннатар дапlну.
Шукур Аллагьдизра дапlну
«Ла илагьа иллаЛлагь», - йип.
Аллагьдиз вуй ккуни гафар,
Пуз гизаф рягьят вуй гафар,
Ва гизаф гъагъ айи гафар,
Гизаф хайир айи гафар.
«СюбгьянаЛлагьи ва бигьямди
СюбгьянаЛлагьил Аьзим».
Хябяхъди ургуб ражари,
Ва гвачlни ургуб ражари:
Фуж адми удучlвиш хул’ан
Гъадабгъуз илим Аллагьдин,
Думу касдиз шул рякъ ачухъ,
Женнетдиз вуйи рякъ ачухъ.
«Дадин ликарикк кка» Женнет,
Яв дадайиз апlин гьюрмат,
Макадапlан гиран дугъаз,
Женнетдиз ряхъ – ачмиш увуз.
Женнетдиз вуй рякъ ву илим,
Исламра ву аьхю «Гими».
Гъяру дидиъди Женнетдиз,
Аьхиримжи вуйи йишваз.
Ихь уьмрин метлеб дубхьну ккун:
«Узуз ккундузуз Женнетдиз».
Думу дибикlну ади ккун
Ихь унтlарик ва юкlварик.
Дюаь
СюбгьянаЛлагь , я Аллагь,
Уьрх учу гунгьарихьан,
Ва уьрх учу балйирихьан,
Уьрх накьвдин аьзабарихьан.
Уьрх учу пис ляхнарихьан,
Уьрх учу пис фикрарихьан,
Пис касдин хаинвалихьан,
Зарар кайи «дустарихьан».
Уву гьархру касибвалхьан,
Уву гьархру девлетнахьан.
Уьрх яв рягьмат хътабтlрубдихьан,
Учуз тув яв рягьматдикан.
Яв ккуни лукlариз тувруб,
Я Аллагь, Уву учуз тув:
Дюньяйилан - имандихъди,
Гъияматдиъ - муъминарихъди…
