ГЪУДГАН
Кучlвуб
Сар Аллагьдин
Амриинди,
Сар Аллагьдиз
Аманатди,
Сар Аллагьдик
Умуд кади,
Бисми дапlну,
Бикlурайир
Гъудгникан ву
Жулжагъ Амир,
Аллагьдин лукl,
Аьраблин хтул;
Эзбер гъапlур
Насигьятдин
Нур туврайи
Аьршдин калам,
Шариаьтдин
Гьюкум, къанун;
Дикъатлуди
Уьбхюз ккунир
Сихлин лишан.
Уьмриъ кьисмат,
Жилиин бахт,
Ягъур, кьимат
Зав`ан тувру
Сар Аллагьди.
Шюкюр ибшри
Чан Сарвализ,
Вари аьгъюр
Ву Сар Аллагь.
Аллагьу акбар!
Аллагьу акбар!
Аллагьу акбар!
Гъудган, Кьур`ан улупуб
СюбгьянАллагь!
Амриинди
Сар Аллагьдин
Ихь Жабраил
Малайикди
Улупнийи
Кьур`ан урхуз,
Гъудган апlуз
Ихь Пайгъамбар
Мугьяммаддиз
(Салават ва
Салам дугъаз).
Аллагь рази
Ву дураркан.
МаншаАллагь!
Тlалаб
Ва хъюгънийи,
Йигъ-йишв дарди,
Ихтиятди,
Сабурлуди
Аьршдин тlалаб
Тамам апlуз
Ихь Пайгъамбар
(Салават ва
Салам дугъаз).
Кьур`ан урхуз,
Гъудган апlуз
Улупнийи:
Хизанариз,
Аьсгьябариз
Ва мусурман
Умматариз.
МаншаАллагь!
Тафикь туври
Сар Аллагьди
Кьур`ан урхуз,
Гъудган апlуз
Варидариз.
Амин! Амин!
Гъудган фарз ву
Фарз ву гъудган
Гьарсар лукlраз,
Му дюньяйин
Бахт ву гъудган,
Ахиратдин
Акв ву гъудган,
Женнет багъдин
Нур ву гъудган.
Аьршдин мурхьул
Шулу гъудган,
Мучlу накьвдиъ
Юлдаш шулхьуз.
Му ихь гъудган
Шамси кабхьна,
Сир ву аьршдин,
Дивандин йигъ
Улубкьайиз.
Дикъатлуди,
Вахтниинди
Гъапlу гъудган
Ачар шулу
Женнетдизди.
Гьяркат апlин,
Адамдин бай,
Гъафил машан,
Тlагъру мапlан,
Вафалуди
Апlин гъудган.
Аьрштlан уву
Рякъюри а,
Малайикар
Яв гъюнар`ин
Бикlури ал.
Сар Аллагьдиз
Ккунду лукlар
Ибадатвал
Чаз апlрудар.
Аьршдиан савкьат
Гьямд ибшри ихь
Сар Аллагьдиз!
Вартlан заан
Ибадатнан
Акв ву гъудган,
Аьрштlан гьапlуб
Сар Аллагьди
Савкьат вуди
Чан лукlариз;
Вафалу хьуз
Тувнай уьмриъ
Чаз – Аллагьдиз,
Жарариз – ваъ.
Багахьна хьуз
Сар Аллагьдин
Даягъ шулу
Ахиратдин.
Фарз вуй гъудган
Апlин дикъат,
Женнетдизди
Урнар арццур,
Гъунши шулва
Пайгъамбрарин
(Салават ва
Салам вардиз).
Малайикар,
Гьюриперйир
Шул увухъди,
Гъуллугънаъ яв.
Илтlикlури,
Зикир убхур,
Яв гъуллугъар
Тамам апlур…
ИншаАллагь!
МаншаАллагь!
Мигьраж
Мигьраж гъапlган
Ихь Пайгъамбри
(Салават ва
Салам дугъаз),
Сар Аллагьди
Фарз иливну
Гъудгнар апlуз
Мугьямаддин
Умматар`ин.
Ахиратдин
Акв ву гъудган,
Рякъ улупруб
Ву женнетдиз.
Даимади
Шулва бахтлу,
Фикир апlин,
Адамдин бай.
Ихь Пайгъамбар
(Салават ва
Салам дугъаз)
Ва шагьидар,
Гьякьлу лукlар,
Вали касар
Шулувухъди
Даимади
Женнет багъдиъ.
МаншаАллагь!
Нумуналувал
Шюкюр ибшри
Сар Аллагьдиз!
Марцци кlваан
Гъудган апlру
Инсан жил`ин
Нумуна ву.
Нафсдизра чан
Йишв улупну,
Шейтlнин васвас
Ярхла дапlну;
Чан марцци кlваъ
Дюрхну пакди
Первердигар,
Анжагъ Дугъаз
Икрам апlру
Инсан жил`ин
Нумуна ву.
Ярхла духьну
Писвалархьан,
Футнайихьан,
Гъибайихьан;
Ужуб ният,
Мурад, метлеб,
Дугъривалин
Аьмал ади;
Ва чак кади
Ягьна намус;
Ади гъир`ят,
Эдеб, гьюрмат;
Дикъат аьгъюр
Ислам илим,
Мюгькам гъапlур
Аьршдин калам,
Гьарган фарзар
Тамам апlру
Инсан жил`ин
Нумуна ву.
МаншаАллагь!
Мугъаз гъудган
Вартlан заан
Савкьат шулу
Аллагьдихьан.
МаншаАллагь!
Вали шулу
Сар Аллагьдин
Женнетдизди
Рякъюъ айир.
МаншаАллагь!
Сар Аллагьдиз
Му ву багахь,
ИншаАллагь!
Мицдар лукlар
Ккунду Дугъаз.
СюбгьянАллагь!
Сар Аллагьди
Тафикь туври
Ухьуз вардиз
Гъудган апlуз,
Кьур`ан урхуз,
Вафалуди
Уьмур хъапlуз.
Амин! Амин!
Аьршдин бурж
Шюкюр ибшри
Сар Аллагьдиз!
Улупну а
Мусурмнариз
Суткайиъ хьуб
Гъудган апlуб.
Фарз ву дурар
Варидариз,
Кlваин уьбх гьа,
Адамдин бай!
Гьяжат гъапlган,
Марццшин дапlну,
Вахтниинди
Дикъатлуди
Гъудган апlуз
Аьгъю апlин,
Адамдин бай!
Сар Аллагьдин
Бурж ву гъудган
Чан лукlариз
Му дюньяйиъ.
Гьязур гъахьиш
Ахиратдиз,
Нур шулувуз
Женнет багъдин,
Багахь шулва
Сар Аллагьдин.
ИншаАллагь!
Гъадагъа
Гъудган гъибтуб
Гъадагъа ву
Ихь мусурман
Умматариз.
Гъибтиш, шулвуз
Гунгьарин гъагъ
Лап аьхю дагъ.
Гьисаб-суал,
Сиратlил гъяд –
Имтигьян яв
Рягьятиб дар.
Тувну авуз
Аннамиш`вал.
Хъа инсандиз
Тувну айи
Уьмур ярхиб
Дар думукьан.
Хабарсузди
Гъюру аьжал,
Рюгьна беден
Шулу жара.
Фикир апlин,
Адамдин бай,
Закур шул кьан.
