Мекка шагьриз...

Кьасумов Амир Мирзаевич,

Жулжагъ гъул.

Дагъустан Республикайин культурайин лайикьлу работник (2004 й).

РФ-йин журналистарин Союздин член (2005 й).

РФ-йин уьмуми образованияйин лайикьлу работник (2006 й).

РФ-йин президентин грантдин сагьиб (2009 й). РФ-йин мялимарин устадвалин бина конкурсдин дипломант (1 степен, 2017 йис.)

Саб ражари

Зайд гъафнийи

Пайгъамбрихьна

(Салават ва

Салам дугъаз),

Рази дайи

Чан хпириин,

Жара хьуз ккун

Дубхьну айи:

«Бицlидарра

Адар учуз,

Чиб-чпин гъавриъ

Шуладарча».

Тlалакьарра

Дупну мугъу,

Жара гъахьи

Зейнабна Зайд.

Ихь Пайгъамбри

(Салават ва

Салам дугъаз),

Дапlну нюкягь,

Зейнаб хпирди

Гъадагъу чаз.

Чан халайин

Риш вуйи му,

Думу вахтна

Аьрабарин

Айи аьдат –

Кьабул гъапlу

Балин хпир, чпи

Жара хьпахъан,

Адашди чаз

Хпирди дитуз

Ихтияр зат

Адар кlуруб.

Хайлин вахтна

Гъабхьи футна:

«Чlюбгъюри а

Кюгьне аьдат

Мугьяммадди,

Улихь гьучlвну».

Сар Аллагьдин

Амриинди

Аьдат чlюбгъюз

Мисал вуди

Ихь Пайгъамбри

(Салават ва

Салам дугъаз)

Улупу рякъ

Гележегдиз.

***

Бакр тухумди

Чlюргъюрайган

Сяргьятар чпин,

Мусурмнари

Гъапlу аьрза

Пайгъамбрикна

(Салават ва

Салам дугъаз).

Дугъу кьушмар

Гьау дишла.

Бакр тухумдин

Аьхюр Сумам,

Йисир дапlну,

Аьсгьябари

Мединайиз

Гъахнийи ва

Мистахъ гьар`ин

Илитlнийи.

Ихь Пайгъамбри

(Салават ва

Салам дугъаз)

Суал гъапlу:

-Узу йикlуз

Ккунди авуз?

Лиг, узхъанди

Вуш фукьандар.

Жаваб гъабхьи

Сумамдихьан:

-Эгер узу

Деетнийиш,

Тувидийза

Увуз девлет,

Фукьан ккундуш.

Ккуни кьадар

Думу азуз.

Шубуд йигъан

Текрар гъахьи

Думу жюре

Суал-жаваб.

Ихь Пайгъамбри

(Салават ва

Салам дугъаз)

Аьхирки кlур:

-Деетай му,

Гьич фукlара

Лазим дархьуз

Мицир касдин.

Хайлин рякъюъ

Гъушу Сумам,

Фикир гъабхьи

Дугъан кlваан

Гъудгнин жикlуз,

Кьяляхъ хътаркуз.

Мистаз дуфну,

Кlуру дугъу

Ихь Пайгъамбриз

(Салават ва

Салам дугъаз):

-Аьгьт апlурза

Сар Аллагьдиз,

Жил`ин алдай

Явсиб суфат

Зуз хуш даруб.

Хътругъарва гьа,

Гьамус думу

Вузуз имшагь.

Диди дугъри

Нур туври а,

Аку дюнья

Дюз-дугъри хьуз,

Аьхиратдин

Хал ккабалгуз.

Ислам динра

Кьабул гъапlза,

Гьякь ву дупну,

Шагьид вуза.

Хъасин дугъу

Теклиф диву

Чан тухмариз

Кьабул апlуз

Ихь ислам дин.

Ва гъадагъа

Диву дугъу

Мекка шагьриз

Мугагьназси

Рузи масу

Тувуз сарун.

Кьурайшитар

Дайи рази.

Сумамдин му

Ляхнарикан

Гъибикlнийи

Аьрза-кагъаз

Ихь Пайгъамбриз

(Салават ва

Салам дугъаз).

Дугъу теклиф

Диву мициб

Пис гъадагъа

Батlил апlуз.

Мекка шагьриз...