Аьршдин нур ал Жулжагъ гъул`ин
Му гьядиса
Гъабхьнийи сач.
Бик1уз дидкан
Вузуз, хъугъ, нач.
Сикинсузди
Шулу муч1муч1,
Аллагьдихьан
Кашра зуз гуч1.
Сахси, дубхьна
Гьяркатнаъ к1ул,
Абгури чаз
Дюз-дугъри хул.
Гурпа-гурпди
Либхура юк1в,
Дап1ну узкан
Гьиссарин лук1.
Булагъдиин
Шулу шейт1ан,
Аьгъя дидиз
Бикьуз айт1ан.
Бална бала
Хуру мелзну,
Васвас тувра
Дидиз юк1вну.
Улар, ибар
Шул гьяркатнаъ
Ашкар ап1уз
Ц1ийи аьмал.
Футна, гъиба…
Гьиссарик ка
Ялав зурба
Иблисдихьан.
Яв сир уьбхюр Сар Аллагьди
Саб ражари
Пайгъамбрихьан
(Салават ва
Салам дугъаз)
Гьерхну сари:
«Я Аллагьди
Гьаъну айир,
Гъиямат йигъ
Улубкьиган,
Аьрасатдин
Майдандиин
Хьибган вардин
Дивандин йигъ,
Йиз гъалат1ар
Ва йиз гунгьар
Ккундарзуз, ваъ,
Дяркъну вардиз.
Жаваб гъап1у
Ихь Пайгъамбри
(Салават ва
Салам дугъаз):
«Аькьюл, эдеб
Ади дикъат,
Мюгькамди вуш
Му яв иман,
Уву гъюбхиш
Жарарин сир,
Яв сир уьбхюр
Сар Аллагьди».
Шюкюр ибшри
Сар Аллагьдиз!
Эгер иман
Вуш яв мюгькам,
Иблис шавли
Шулу айт1ан.
Вари аьршт1ан
Тувну авуз,
Фикир ап1ин,
Адамдин бай.
Нивк1
Скорый поезд
Рязань – Дербент.
Хьубпи вагъун,
Заан кьас`ин
Дахъну, зикир
Ап1урайир
Хабарсузди
Гъушза нивк1уз,
Шинтак кайи
Шерефтеси…
Рябкъюразуз:
Завун аьршдиъ
Т1ирхури а
Кьасум аба,
Малайикар
Хъа дугъахъди,
Зикрин сесну
Аьрш рабхура,
Нур алди а
Жулжагъ гъул`ин,
Ц1ийи мистхьан
Ярхла дарди.
Ихтиятди гъузай
Вари аьлам
Уч дубхьну а,
Сабси к1ура:
«Аллагьу акбар!
Аллагьу акбар!
Аллагьу акбар!»
Аьраб хъана
Гъулаз гъюра.
Шюкюр ибшри
Сар Аллагьдиз.
Салам тувну,
Аьршт1ан к1ура
(Кьасум аба
Ву к1урайир):
«Я жям`аьтар!
Му кевшанар
Ву гирами.
Ихтиятди,
Сабурлуди,
Абурлуди
Гъузай гьарган.
Ишру пирар
Йирси мистан
Исихъ хъайи
Аьхю пирар
Ву ишрудар;
Дердер-гъамар,
Гизаф гъяркъдар,
Умун вушра,
Эрхну цирклар;
Рюгьникк ккайи
Шагьидарси
Ву рякърудар.
Фу-вуш ккунди
А пуз айт1ан,
Хявиди ву
Юк1в пирарин,
К1ажарилан
Ахьри п1илтар.
Вушул нивгъар
Хажалатнан.
Исикк дубхьна
Аьхю дагар.
Тарих
Табасаран
Вилаятдиз
Ихь ислам дин
Тасдикь ап1уз,
Аьршдин калам
Мюгькам ап1уз
Сифте гъафну
Аьрабарин
Халифари
Гьау шихар.
Мут1и дарди,
Гъап1ну женгар
Табасаран
Кьягьялари.
Мялум дару
Му уьлкейиъ
Убгну айи
Аьраб кьушум
Дестйир`инди
Жара гъабхьну.
Бина йивуб
Аьрабарин
Улихь хьайир
Ву сарчавай
Исрафил, хъа
Пайдагъ хьайир
Ву ших Шябан –
Сихилдикан
Ву мударин.
Булагъдихъна
Хъуркьган, мурар
Яваш гъахьну
Эргвал йивуз,
Йикьрар ап1уз.
Пирарихьан
Ярхла дарди
Тикмиш гъап1у
Жаларикан
Аллагьдин хал,
Ибадатназ,
Бина йивуз
Ният ади.
Сикинсузвал
Му шихарин,
Аьрабарин
Сикин уьмур
Гъабхьундайи.
Гьергри, хъана
Кьяляхъ гъюри,
Гъушу вахтар
Ва заманйир.
Ишру пирар
Ву шагьидар,
Дердер-гъамар,
Уьмур гъяркъдар…
Амриинди
Сар Аллагьдин
Табасаран
Вилаятдиъ
Кьабул гъап1ну
Ихь ислам дин.
Жара деврин
Гъиган вахтар,
Пис касари
Алдат1нийи
Ишру пирар,
Сихил думу
Ккадабхънийи... –
Уларилан
Гъяри нивгъар,
Давам гъап1у
Дугъу гафар,
- Жямяаьтар,
Ихтиятди
Гъузай гьарган.
Мист али йишв
Ву гирами,
Ихь пирарин
Гизаф нивгъар
Курк1ну душвак.
Ибадатназ
Вафалуди
Гъузай гьарган», -
К1ури, завуъ
Жин гъахьнийи
Аьраб-Кьасум.
Хабарсузди
Телефонди
Зенг гъап1нийи,
Уягъ дап1ну
Узу нивк1`ан,
Хабар туву:
«Ц1ийи мистаъ
Убч1вну иблис,
Гьяркат ап1ин,
Гъач увура!»
Куч1вуб
Шюкюр ибшри
Сар Аллагьдиз!
Салават ва
Салам вуйиз
Ихь Пайгъамбар
Мугьяммаддиз,
Хъасин дугъан
Хизанариз,
Аьсгьабариз
Ва мусурман
Умматариз,
Жулжагъ гъулан
Жямяаьтдиз,
Урхурайи
Муъминариз.
Дустси халис
Амриинди
Сар Аллагьдин
Аьршт1ан тувна
Ухьуз вари.
Иблис хъавухъ,
Дустси халис.
Мугъаятди
Шулу гьарган,
Аьгъя дидиз
Зяиф йишвар,
Тяриф хъап1уз,
Гьевес кап1уз,
Чан лук1 ап1уз.
Нафсра шулу
Дидкан рази,
Гъубзиганси
Хут1лиъ рузи.
Ниятна кьаст,
Хиял, метлеб
Ву лап яман,
Адабгъуру
Диди аман.
Сюгьюрчивал
Тувна дидиз.
Гьацира ву
Аьмлин устад.
Яваш-яваш
Жегьеннемдиз
Рякъюъ т1аъру
Фалабахан
Вуки иблис.
Фикир ап1ин,
Адамдин бай.
Буш иман
Иман бушди
Вуйи инсан
Иблисдин лук1
Шулу гьарган.
Насигьят бис,
Адамдин бай,
Иб хъив минди,
Гьяркат ап1ин
Вахтниинди
Мюгькам ап1уз
Аьгъювалар
Каламарин,
Ихь Пайгъамбрин
(Салават ва
Салам дугъаз)
Гьядисарин.
Дадмиш ап1ин,
Аннамиш`вал
Тувну авуз.
Нафснахъди яв
Дяви ап1ин,
Ниятна кьаст
Марцциди гъуз.
Илим
Илимдихъди
Мап1ан гьюжат,
Эгер дибар
Мялумди дарш.
Хуру диди
Душманвалар.
Авамвалин
Му яв лишнар
Ашкар мап1ан,
Адамдин бай.
Гьяркат ап1ин
Гьякь адабгъуз
Арайизди
Шариаьтдин
Гьюкмарихъди.
Ччвурнахъан йип
Сар Аллагьдин.
Гуч1 ап1ин ва
Начра ап1ин
Аллагьдихьан.
Жаза тувру,
Гьяркат дап1ну.
Ихь Жабраил
Малайикди
Амриинди
Сар Аллагьдин
Гьява бабна
Адам аба
Женнетдиан
Адаънийи
Жвуми йигъан.
Аллагьу акбар!
Аллагьу акбар!
Аллагьу акбар!
Иблис мистаъ
Жулжагъ гъулан
Ц1ийи мистаъ
Хабарсузди
Убч1вну иблис.
Айт1ан, ч1атан
Цалик мистан
Чан шил гъибтну
Ва жин гъабхьну.
Гъудгниз гъафи
Жям`аьтари,
Думу ляхин
Дябкъну, гъапи:
«Гъиямат йигъ
Багахь шула,
Диван ап1ри
Сар Аллагьди!»
«Амин! Амин! -
Аьршдианси,
Тасдикь ап1ру
Сес ат1абгу
Аьхю-зурба
Дараматдиъ –
Малайикар
Вушул мурар!»
Шюкюр ибшри
Сар Аллагьдиз!
Къарар
Гъудгнин кьяляхъ
Зенг гъап1нийи
Гьюкумдрариз.
Гъафну, хъади
Гъулан к1улра.
Аьгъю дубхьну
Му аьгьвалат,
Гьисаб-суал
Ап1бан кьяляхъ
Сабур тувну
Жям`аьтариз:
«Эгер аьгъдарш
Аллагьдин хал,
Фу ккундучвуз
Иблисдикан???
Аннамиш`вал
Адру авам
Диди гъап1ну
Чав чан диван –
Аьгъювалар
Адру йишваъ
Шулу иблис,
Шейт1анна жин.
Фикир ап1ри
Имамдира,
Гьаз ва наънан,
Фици мици
Ц1ийи мистаъ
Убч1внуш иблис.
Ашул мушваъ
Аьмална сир.
Мялум вуди
Ясан жинди
Фалабахан шул
Сюгьюрчи».
СюбгьянАллагь!
Аьсрариан гъубзу гьюкум
Жям`аьтдикан
Шли-вуш гъапну:
«Жвуми йигъан,
Гъудгнин кьяляхъ,
Мистан цалихъ
Дивну Кьур`ан,
Аьгьт ап1урхьа
Хулахъ сари.
Ав, гьациб ву
Ихь абйирин
Аьсрариан
Гъубзу къанун.
Къанун, къайда
Ч1юргъну ккундар».
Сабур. Абур
Ади дикъат
Аннамиш`вал,
Аьршдин калам
Эзбер гъап1у;
Шариаьтдин
Гьюкум, къанун
Аьгъю устад –
Насигьятчи
Аьраблин хтул
Жулжагъ Амир
Мугъаят ву.
Хъасин думу
Гъудужвнийи
Ва гъапнийи:
«Жямяаьтар,
Сабур, сабур,
Хъана сабур.
Иб хъивувал
Ккун ап1урза.
Аьдатар дар
Аьршдин калам,
Савадсузвал
Аьвамвал шул,
Диди хуру
Биябурвал.
К1урза узу
Гьядисдикан
Ихь Пайгъамбар
Мугьямаддин
(Салават ва
Салам дугъаз).
Китабдик ка
Аль Бухарин.
Жикъи мяна
Учвуз магьа:
«…Шлиз алабхъиш
Аьгьт ап1увал,
Аьгьт ап1инай
Аллагьдихьна.
Дарш, ккебехъай…»
Сунна вухьуз
К1ваин уьрх гьа,
Адамдин бай,
Калам фу вуш,
Сунна фу вуш,
Шариаьтдин
Къанун фу вуш,
Ихь абйирин
Аьдат фу вуш.
Аьгъю ап1уб
Сунна шулу
Ихь мусурман
Умматариз.
Хьуз дюз рякъюъ
Ихь Пайгъамбрин
(Салават ва
Салам дугъаз)
Эзбер ап1ин
Аьршдин калам.
Фарзар, суннтар
Ап1ин дикъат.
Бахтлу шулва
Му дюньяйиъ,
Ахиратдин
Йигъан увуз
Женнетдизди
Урнар арццур.
ИншаАллагь!
Насигьятчи
Абу Аьли
Ад-Даккак ву
Насигьятчи
Ислам диндин.
Дугъу гъябкъюб
Ктибтури а:
«Сар бедуин,
Мистаъ уч1вну,
Ч1ат кудубч1вну
(Биц1иб вуйи).
Аьсгьябариз
Гъяркъну угъраш,
Гат1архьуз ккун
Гъахьну мист`ан.
Ихь Пайгъамбри
(Салават ва
Салам дугъаз),
Сабур тувну
Аьсгьябариз,
Ва гъапнийи:
«Бедуинди
Гъап1у ляхин
Ву лайикьсуз
Ва эдебсуз.
Бедуин ву
Угъраш инсан,
Дургну айир
Ягьна намус,
Гъир`ят, эдеб.
Гьап1руш дугъкан,
Гизаф гъагъи
Месэла ву…»
Уьзриз дарман
Гьарсаб уьзриз
Дарман а чан,
Вахтра шулу
Диванбеги.
Гуч1 ап1инай
Аллагьдихьан,
Нач ап1инай
Аллагьдихьан.
Вари тувна
Ухьуз аьршт1ан,
Хабарсузди
Гъюру аьжал,
Накьвдик гьарсар
Шул йишвахь чан.
Фикир ап1ин,
Адамдин бай,
Жегьеннемдиз
Рякъюъ ахънаш
Нагагь уву.
Аннамиш`вал
Тувну авуз.
Мист
Сар Аллагьдин
Хал вухьуз мист,
Ибадатназ
Дап1на тикмиш.
Юк1в марцц ап1ин,
Адамдин бай,
Пис ва угъраш
Ляхнарихьан.
Ярхла дап1ну
Иблисна жин,
Яв нафснахъди
Жигьад ап1ин.
Мюгькамди хьуз
Му яв иман
Эзбер ап1ин
Аьршдин калам.
Аьгъювалар
Хьиди артухъ,
Илимдихъди
Хьидива тухъ.
Жвуми йигъан
Малайикар
Илт1ик1ури
Ал урнар`ин.
«Буюр! Буюр, –
К1ура, - Буюр!
Ибадатназ
Сар Аллагьдиз!»
Гьарсар лук1ран
Вафалувал
Бик1ури, ал
Гъюнариин.
Тарих
Адамдин бай,
Ихь тарихдин
Гьарсаб аьсриъ
Ади гъахьну
Бажаранлу
Вуй аьлимар,
Таржумачйир
Аьраб ч1алнан,
Хазна гъибтдар
Багъри халкьдиз.
Зюрдюгъярин
Гьяжи Сяид
Сабпи ражну
Гьяж гъап1ур ву
Табасаран
Миллетдикан.
Кьюрпир вуди
Гьяжи гъахьир
Кьулиф гъул`ан
Аьбдуллагь ву –
Илимдин гьюл,
Кьюб Гьярамдин
Гьяжи гъашир.
Шубурпирра
Вуйи Кьулфан –
Кьази гъахьи
Шябан аба,
Юк1вниинди
Рябкъру аьлим,
Дугъривалин
Акв тувнайир,
Кьур`андихъди
Фун абц1найир.
Йиз бабан ву
Аьхю аба,
Сихилдикан
Гьяшимарин.
Гъира ими
Кьулиф гъулаъ
Гележегдиъ
Гъюрай наслиз
Дугъу гъибту
Аьршдин хазна.
Хянягъ, Хюрикк,
Ругуж, Кюрягъ,
Хъана жара
Гъулариан
А устадар
Ва аьлимар,
Шихар – Гьесхъан,
Ислам диндиз
Рякъ улупуз
Сар Аллагьди
Ухьуз гьаъдар.
Аллагь рази
Ишри чпикан.
МаншаАллагь!
Аьсрин вахтар
Фици дубхьна
Гъи замана!
Малла, кавха,
Имам, устад…
Гьарсарихъди
Чан мюридар.
Саспидари
Бикьури а
Аку дюнья,
Футна, гъиба,
Пис хиялар
Рагъури а,
Дурарихь хьа
Т1ибдин дафтар.
Аьршт1ан мициб
Гьап1ну адар.
Вари ккунду,
Даккниб – аьжал.
Шули адар
Затра мажал,
Абгура чаз
Лап чагъу йикк.
Жарариз – миркк.
Аргъуз гъитра
Наслин маар,
Аба-бабаз
Туври дердар.
Азад ибар
Фукьан ахьуз
Азад ибар?
Савадсузвал
Ву аьвамвал.
Пулиз аьгъя
Фунубра ч1ал,
Мааринра
Ап1ур ач1ал.
Яваш-яваш
Уву увуз
Жегьеннемдин
Аьхю урнар
Арццри ава,
Адамдин бай.
Айфон
К1ваълан гьаъну
Багъри бабан
Ва абайин
Насигьятар,
Гьап1ри ава,
Адамдин бай?
Аьлимдихъди
Гьаз гьюжатар
Ап1урава,
Адамдин бай?
Айфон аьршт1ан
Гьап1найиб дар,
Думу деврин
Саб алат ву.
Вари тувну
Ухьуз аьршт1ан,
Сар Аллагьди
Аьршт1ан гьап1ну
Ухьуз калам,
Вердиш ап1уз
Вари аьлам.
Аллагь сар ву,
Кьур`анра – саб.
Думу гьап1ну
Чан лук1арин
Ахтармишназ,
Му дюньяйиъ
Вафалуди
Хьуз Аллагьдиз.
Вари тувна
Ухьуз аьршт1ан.
Ризкьна аьжал,
Кьадар, кьисмат
Артухъ шулдар.
Фу ккундувуз,
Адамдин бай?
Жил`ин уьмур
Вусаб герен.
Сюгьрин вахтар
Дуфна ухьуз
Сюгьрин вахтар,
Аьжайибнан,
Гъавриъ адру.
Накь ву касиб,
Гъяни марччсир –
Гъи имамди
Дусна мистаъ,
Аьмлин рякъюъ
Уч1вну бегьем,
Аьвамариз
Духьна дарман.
Му баяри
Дубгъну ляхин,
Фила шулуш
Хут1лиъ дяхин.
Гьарсариз
Йишв улупуру,
Садакьайин
Шулу «Агъа»,
Жарадариз
Ву гъадагъа.
Дарцц кайибди
Ч1ал ккат1абццур.
Накь – кумайиъ,
Гъи – гъалайиъ,
Шубуб жюре
Иномарка
Заанвалин
Дережа ву.
Лап агъирди
Лицури а,
Хиял ап1ин,
Вуйиганси
Ших, эфенди,
Гьяжи, султан,
Накьшибенддин
Т1арикьатдин
Устад, халиф.
Дигиш гъап1ну
Мугъу чан ччвур
Багахьна хьуз
Пайгъамбрариз,
Халифариз,
Аьсгьябариз,
Устадариз,
Аьлимариз…
Белки ччвурнаъ
Ашул иман?
Мюгьтал шулу,
Гьяйран шулу
Деврин ляхнар
Гъяркъю инсан.
Багъри бабан
Ч1ал мялум дар,
Урус ч1алнан
Гъавриъ адар,
Аьраб ч1алнан
Таржумачи,
Айфондихъди –
Мугъан девран.
Варибдикан
Пуз шуладар,
Гъюбранси, шид
Убч1вру ушвниъ.
Гуч1 ап1инай
Аллагьдихьан!
Нач ап1инай
Аллагьдихьан.
Аллагь сар ву,
Пайгъамбар гьякь,
Гъавриъ адрур –
Авам, нягьякь.
Гьядисдикан
Кюгьне вахтнан
Ляхнарикан
Шагьидари
Ктибтури а…
Саб ражари
Имамдихьна
Гъудгнин кьяляхъ
Гъафну сар кас.
Дугъу гъапну:
- Узуз мистаз
Сарун затра
Гъюз ккундарзуз.
- Гьаз? Гъаврикк ккаъ.
- Мяна адру
Хабар-хана
Ва гим дубхьна
Гъи гъулан мист.
- Иб хъив узухъ,
Фикир ап1ин,
Аннамиш`вал
Тувну авуз.
Йиз табшуругъ
Тамам ап1ин.
Сабри дерккна
Завар-жилар.
- Дикъатлуди
Хъпехъураза.
- Саб астакан
Абц1ну шид убз.
Думу хьади
Илт1ик1 мистлан.
Муулдубзан
Саб лит1анкьан,
Хъасин хъана
Гъач узухьна.
Тамам дап1ну
Му табшуругъ,
Гъафи му кас
Имамдихьна.
Ктибту дугъу
Гьунарнакан
Дикъатлуди.
Имамди к1ур:
- Мялум вувуз
Гьаз гъи яв шид
Улдубзундарш?
Лап к1ваант1ан
Гъап1унва кьаст,
Ижми ният,
Хиял, метлеб.
Сабур ап1ин,
Фикир ап1ин,
Аннамиш`вал
Вуяв мюгькам.
Фици гъюру
Ухьу мистаз?
Агъзур фикир,
Васвас ади!
Гьикма
Гьикма кайин
Ихь юк1варик?
Фу ккундувуз?
Гьаз дуфнава?
Аллагьдин хал
Ву гирами,
Яв бурж тувуз
Дуфну ава.
Ибадатназ,
Икрам ап1уз
Сар Аллагьдиз,
Жарариз – ваъ
Аллагьдин хал
Тувна аьршт1ан
Чан лук1ариз.
Аькьл, эдеб,
Гъир`ят, намус
Диндин юк1в ву
Ихь мусурман
Умматарин.
Заан гьюрмат
Ап1ин вардиз.
Эзбер дап1ну
Аьршдин калам,
Аьгъювалар
Ва яв иман
Мюгькам гъап1иш,
Бахтлу шулва
Му дюньяйиъ,
Ахиратдиъ
Урнар арццур
Вуз женнетдиз.
ИншаАллагь!
Шюкюр ибшри
Сар Аллагьдиз!
Аллагьу акбар!
Аллагьу акбар!
Аллагьу акбар!
Гьядис
Ихь Пайгъамбри
(Салават ва
Салам дугъаз)
Гъапну ухьуз:
«…Саб замана
Гъибди учвуз,
Мистаъ улхуб
Дюньяйикан
Хьибди гизаф…
Дицдар лазим
Дар Аллагьдиз,
Дицдарихъди
Мудусанай…»
Лукьман аль-Гьяким
Дарпиди гьич
Гъибтуз шулдар,
Лукьман Гьяким
Ву пайгъамбар.
Аьлимари
Бик1ури а:
«Лукьмназ гъапну
Чан эйсийи:
- Т1алаб вуйиз,
Чарва дубккну,
Ужубсиб йикк
Хуб узухьна».
Лукьмну гъахну
Эйсийихьна
Чарвайин юк1в
Ва дидин мелз.
Ц1иб вахт гъубшган
Арайиан,
Хъана т1алаб
Шул эйсийин,
Анжагъ жараб
Му ражари:
Варт1ан харжи
Йикк хуб чахьна.
Лукьмну хъана
Эйсийихьна
Чарвайин юк1в
Ва мелз хуру.
Мюгьтал духьну,
Эйсийи к1ур:
«Мици фици?
Варт1ан ужуб,
Варт1ан харжиб,
Хъа йикк саб ву».
Лукьмнан жаваб
Гьамциб гъабхьну:
«Мелзну тувру
Йиччвна агъу.
К1ураб адар,
Ккуниганси
Ккибирцуру.
Хъа юк1в к1уруш,
Ву аьламат,
Дидиз дюнья
Гьубк1ри адар.
Инсандин юк1в
Ву нафсдин лук1.
Бална бала,
Ужуб, харжиб…
Вари хуру
Мелзну, юк1ву.
Гьаддиз дурар
Ву ужудар
Ва харжидар».
СюбгьянАллагь!
Иблис
Аллагьдин лук1
Вали касди
Вари уьмриъ
Дикъатлуди,
Вафалуди
Сар Аллагьдиз
Ибадатвал,
Фарзар, суннтар
Ап1урайи.
МаншаАллагь!
Иблис фикрикк
Ккабхъну айи,
Диди аьмлар
Агурайи.
Ва, инсандин
К1албиъ убч1вну,
Хялижв гъабхьну
Валийиз му.
Гьарсаб гъудган
Ап1ру вахтна
Йивури а
Чан балабан.
(Агь агъдабан!)
Инсан гъафил
Шул саспиган,
Ижмиб вушра
Дугъан иман.
Му суткайиъ
Гъап1ундайи
Валийи чан
Сабкьан гъудган.
Кьанди йишвну
Дабхъну айи
Иблис хул`ан
Гьебгуз хъюбгъю.
Уягъ духьну
Ширин нивк1`ан,
Гьарай гъап1у
Валийи: «Вагь!
Кьанди наан
Гъягъюрава?
Узкан гиран
Гъабхьнун увуз?»
Хъа иблисди
Жаваб туву:
«Суткайиъ яв
Фарз вуй гъудган
Гьич сабкьана
Гъап1ундаршра,
Архаинди
Ахурава.
Узхьан яв тай
Хьуз шуладар».
Фукьан ижмиб
Вушра иман,
Мугъаят йихь,
Адамдин бай.
Аллагьди халкь
Ап1ру вахтна
Инсан, аьршдиъ
Иблис гъабхьну
Суратнаъди
Малайикдин.
Фикир ап1ин.
Адамдин бай,
Аннамиш`вал
Авуз аьршт1ан.
Эгер уву
Накь духьну аш,
Фила духьну
Ашул иблис?
Аллагьу акбар!
Аллагьу акбар!
Аллагьу акбар!
Гьядис
Шюкюр ибшри
Сар Аллагьдиз!
Хъебехъ узухъ,
Адамдин бай.
Ккебехъувал
Вухьуз гъизил,
Ккебехъну гъуз,
Сабур ап1ин.
Фикир гъап1иш,
Фу ву гъизил?
Гъатху рукь ву,
Багьалу шейъ.
Амма гъабхьну
Му гьядиса,
Тарихдиан
Ву ихь диндин.
Амриинди
Сар Аллагьдин
Ихь Жабраил
Малайикди
Женнетдиан
Адаиган
Гьява бабна
Адам аба,
Ибшуз хъюбгъну
Вари аьлам –
Яратмишар
Сар Аллагьдин.
Гъизилна арс
Гъишундайи.
Амриинди
Сар Аллагьдин
Суал тувну:
«Гъизилна арс,
Йипачва, гьаз
Гъишундарчва?
Ибшури а
Вари аьлам».
Гъизилина
Арсру гьамциб
Жаваб тувну:
«Гъадагъади
Улупнайиб
Гъап1нухъа гьаз?
Аьршдиз мют1югъ
Дарударин
Язухъ шулин?»
Гьаддиз дурар –
Гъизилна арс –
Багьалуди,
Кьиматлуди
Гъузди гьарган,
Инсан жил`ин
Илмидикьан.
Шюкюр ибшри
Сар Аллагьдиз!
Вари аьгъюр
Ву Сар Аллагь.
Аллагьу акбар!
Аллагьу акбар!
Аллагьу акбар!
Аллагь рази
Шулай ляхнар
Ап1уз тафикь
Туври ухьуз,
Ихь мусурман
Умматариз Сар
Аллагьди.
Амин! Амин!
Сабур
Сабур, сабур,
Сабур ап1ин,
Адамдин бай.
Дикъатлуди
Фикир ап1ин,
Адамдин бай.
Вари увкан
Ву асиллу.
Яв гьендемар
Уву уьрх гьа.
Ушв, хил ва юк1в
Гъит сикинди.
Хъа гъадагъа
Вуйибдихьан
Ихтият йихь.
Сабур ап1ин,
Яв дарубдиз
Тямягь мап1ан.
Хъугъ, увура
Уьрхюр аьршт1ан.
Сабри дерккна
Завар-жилар
Амриинди
Сар Аллагьдин.
Ибар, улар
Ярхла ап1ин,
Увуз гьярам
Вуйибдихьан.
Гьяркат мап1ан
Увуз теклиф
Дарубдихьна,
Яв к1ул`ина
Бала мап1ан.
Иблисдиз гуч1
Шулу гьарган
Аьриф, дугъри,
Гьякь лук1рахьан
Сар Аллагьдин.
Мюгькам, ижми
Ап1ин иман,
К1ваъ уьрхюри
Первердигар.
Тафикь туври
Сар Аллагьди
Чан лук1ариз
Ислам диндин,
Шариаьтдин
Гьюкмарихъди
Гъягъюз. Амин!
Диалог
Ктибтрур ухьуз
Ву Ибн Аббас:
«Саб ражари
Ихь Пайгъамбриз
(Салават ва
Салам дугъаз)
Гъябкъну иблис
Убч1ври мистаъ.
Гьарай гъап1ну:
- Я нянати,
Йип, уву гьаз
Дуфну ава
Му йиз хулаз?
- Узу мина
Сар Аллагьди
Гьаъну аза.
Хъана гьерхиш,
Увуз жаваб
Туварзавуз.
- Я нянати,
Йип, уву гьаз
Му йиз уммат
Дебккри ава?
Жям`аьтдихъди
Гъудган ап1уз
Мистаз гъюз гьаз
Манигъвалар
Ап1урава?
- Хъа яв уммат
Уч шулайган,
Жям`аьт гъудган
Ап1уз к1ури,
Гъудган дап1ну
Алдагъайиз
Гук1ни шулза,
Ц1ийир уьзур
Кайиганси.
- Йип, гьаз уву
Му йиз уммат
Илим аьгъю
Ап1ру вахтна
Убгри ава?
Дурар уч хьуз
Гьаз гъитдарва?
- Му яв уммат
Уч гъабхьиган
Аьгъювалар
Мюгькам ап1уз,
Му мажлисар
Ккудук1айиз
Узу сакъур,
Кар шулуза.
- Йип, уву гьаз
Кьур`ан убхуз
Йиз умматдиз
Манигъвалар
Ап1урава?
- Убхурайган
Шли-вуш Кьур`ан,
Ерц1урза, ц1игъ
Гъургъушумси.
- Йип, гьаз уву
Манигъвалар
Ап1урава
Жигьад ап1уз
Йиз умматдиз?
- Жигьад дап1ну
Ккудубк1айиз
Йиз ликарихъ
Кандалар хъа.
Гьяркат ап1уз
Шулдарзухьан.
Яв умматди
Чпин садакьа
Пай ап1руган,
Дярхюру зу
К1ул`ан к1аназ.
Сюгьяналлагь!
Руг убгуру ц1ин ялавну
Инсанарин
Фикриз тясир,
Хъа к1ваз васвас
Туври айиб
Шулу иблис.
Ихь табариъ
Либцури шул,
К1ваз гъафиган,
Хъап1ри тяриф,
Гьиссарик ихь
Гьяркат кап1ри,
Ч1уру, угъраш
Ляхин ап1уз
Ялав кипру.
Дидин метлеб,
Кьаст ва ният
Ву лап яман.
Иман бушди
Вуйи инсан
Жегьеннемдиз
Рякъюъ ауз
Гьяркатнаъ шул.
Аьгъя дидиз:
Учв ву ц1икан,
Хъа инсанар
Ву ругдикан.
К1ваинди гъибт,
Адамдин бай:
Руг убгуру
Ц1ин ялавну.
