Дадайикан вуйи аьжайиб нивкl

Учву узу наана гъахурачва?! Мушваъ уьцIюхъюразу, мучlуди ву, узуз гучlуразуз, нефескьан хътабгъуз шуладарзухьан… Варидарикан ккун апlураза, кюмек апlинайчва!! Багъри сесер гъеерхьиган Дианайин юкlв читинвалихъди абцlу. Диана вари му шулайибдиз ярхлаан лигурайиганси гъахьну, я кюмек апlуз даршули, амма вари читинваларикан хабар айиганси.

Дугъаз душваъ айи манишин, цlин аржлар, цlигъ убгурайибсиб кlару руг ва ярхлаанси жара аьжайиб аьламатар гъяркъну. Жвуван багхьан му гьарйир гъюрайи дугъу кlул за дапlну лигуруш, му гьарйир апlурайир чан дада гъахьну. Дугъан маш саб аьламат дубхьнайи, ва дугъан багахь кьюб аьламатнан ва гучl шлу шей`ар хьайи. Дада гьавайиъ айиганси рякъюйи, дугъан ликар жилик куркlрадайи, хъа ликарин кIанакк цlигъ ургурайи аржлар ккайи.

Дианайин дада наана вуш гъахурайи, хъа дугъура, наана гъахурачва, гучl шулаазуз кlури, гьарйир апlурайи. Дианайиз гьарйир апlуз ккун гъабхьну, амма гьичра шуладайи,дугъан мелзналан анжагъ гьаму гафар алдахьу:

- Дада, наан ава? Му фу ву? Уву фу гьялнаъ ава?

Дианайиз хъанара гизаф гафар пуз ккунди айи, амма шуладайи. Саб кьадар читинди вушра, дугъу хъанара гъапи:

- Деетай йиз дада. Учву гьапlрайидар вучва? Кюмек йихьайчва фужкlа…

Гьаму вари жвуван улариинди рябкъюри, амма Дианайихьан кюмек апlуз шуладайи. Гьамци читин гьялнаъ дада рякъюрашра, му ляхнар узухъди шуладар кlури, Диана саб бицlиди мицдар фикрарихьан ярхла хьуз хъюгъю. Гьаци дугъаз нивк"ан уягъ хьуз ккун гъабхьи.

Нивк’ан уягъ хьуз гъабхьундар, амма гьамциб дюшюш гъабхьну. Дианайин «му ляхин узухъди шулайиб дар» кlуру фикрар гъахьибси, дугъан дада, кьяляхъ илдицну, саб чlуруди дугъахьинди гъилигу.

Диана гъаври гъахьи: мурариз саризра узу рякъюрадар, хъа дадайиз рякъюра. Дадайи гьарйир апlури гъапи:

- Диана! Кюмек йихьа, йиз риш! Узу вари уву бадали апlури гъахьунза, яв шадвал бадали, гьич саб ражарикьан увуз «ваъ» гъапундарза! Кlваинди иминуз, уву ишури, уларилан нивгъар гъягъюри, шубарихъди ресторандиз однокурсникарихъди вуйи вечеринкайиз деетуб ккун гъапlнийва! Узу думуган яв адашиз, уву йиз чуччухьна йишвазди гъягъюра кlури, кучlлар дапlну деетнийза! Хъа уву! Гьаму узухъди шулайиб вари увхъанмина шулайиб ву. Диана, му вари увхъанмина шулайиб ву, кlваинди гъибт!

Дадайи гьамци гьарйир апlури гъахьи, хъа Дианайиз лап гучl гъабхьи ва чпи наана хъади гъягъюраш, аьгъюра гъабхьи.

Дурар саб аьхю чюлиз хъади гъафну, душваъ адру аьламат адайи, гучl шуйи. Багахьна гъушган, дугъаз душваъ саб фицдар-вуш мутмйирик дишагьлийир ккерхну рякъюру. Дурар кечмиш духьнайидар дайи, амма гьаци гьаруриз чан аьзаб туврайи.

- Ди-а-на, - кlури дугъаз шлин вуш сес ебхьуру.

Кьяляхъ илдицну, Дианайи гъапну:

- Альфият хала!

Кушарихъан ккерхнайир машниин али лиъ алдабхьурайи ва улар имдруганси духьнайи Дианайин гъунши Альфият хала вуйи.

Дианайин Альфият хала, чпихьна дуфну, фукьан ихтилатар апlури дусру вахтар кlваин гъахьи. «Узу дугъахъ гьаз хъпехъуру? Гъит чан чйириз ягълухъ хъабхь йипри. Думу йиз эйси дар! Узуз ккуниб апlурза!» - гьамци кlуйи Альфият халайи чан жилири ягълухъ хъабхь гъапиган. Жилири дугъаз уву гьидитурза, тlалакь тувурзавуз кlури, гучlарра ккаъри гъахьну, амма Альфият халайи чав кlурубтlан апlурдайи. «Ав, гьадму ягълухъар хъахьрударра аьгъязуз, чпи апlру вари ляхнар ягълухъикк жин апlурайидар ву. Рякъюзкьан ккундарзуз дицдар. Дурар, ягълухъар хъа кlури, заткьан ужудар дар. Узу кlурубдихъ хъебехъ» - кlури гъахьну Альфият халайи. Ва Альфият халайихъ хъпехъури йизра гьацдар фикрар шуйи.

– Ди-а-на, – хъанара дих гъапlу Альфият халайи, – яв дадайиз увхъанминара аьзаб тувра.

Сарун дугъхьан гафар апlуз гъабхьундар, иццрушнаан, читинвалиан гьарйир апlури. Дугъаз я Диана, ясана дугъан дада рякъюри имдайи. Хъа Дианайиз Альфият халайизси аьзаб туврайи имбу дишагьлийирра гъяркъю.

Саспидар мелзарихъан ккерхнайи ва дурарин ушвниан кIару гъир удубзурайи. Тмундарин хилар кlуликинди ккетlнайи, хъа ликар - ришвуз даршлуганси жандик, ва дурарилан битlар ва аькьрабар илдицурайи… Хъасин дугъаз хъанара чан дада гъяркъю ва дугъаз гьязур апlурайи саб чlуру йишвра гъябкъю. Гьаму вахтна Диана нивкl’ан уягъ гъахьну. Гьеле мучlуди имийи. Думу учв чlуру нивкl’ан уягъ духьнайибдин дишла гъаври гъахьундар. Мучlу хулаъ думу гучl кади вари терефаризди лигуз хъюгъю, гьамус саб фукlа чаз нивкlук гъябкъю чlуру шейъ гъюйкlан кlуруганси. Думу хулаъ сарна-сарди айи. Думуган гвачlниндин сяаьт юкьуб вуйи.

Дианайиз гъудужвуз ккун гъабхьи, амма ликариъ аман имдрувалиан алдаку ва, чаан удукьруси гьарйир апlури, ишуз хъюгъю. Дугъан дада 10 ваз улихьна кечмиш гъахьнийи. Авария дубхьну дада кечмиш хьайиз, дурар кьюрид магазнариз гъягъюри, гьарган маникюр апlуз жюрбежюр салонариз гъягъюри гъахьнийи. Хъа Дианайиз сарун чахьан дадайиз фукlара апlуз даршлуб аьгъяйи, амма дада чlивиди имиди дугъаз кемек апlуз ккунир вуйи. Гьамцдар фикрариккди думу ачмиш гъахьи.

Хъайигъан саб ягълухъра кlулихъ хъипну, думу мистахъна гъушу: кечмиш гъахьирихъан дюаь апlуб шликан ккун апlуз шулу, кlури, мистан гьяятдиъ гьерхри гъахьну. Дугъаз мистаъ лихурайи сар аьлимдин кабинет улупу. Думу гьадина душну, чаз гъябкъю чlуру нивкlкан аьлим касдиз ктибтну.

– Гъудган апlури шулна? – гьерхнийи дугъхьан

- Гъудгнар апlуз аьгъдарзуз, - жаваб туву Дианайи ва ишуз хъюгъю…

Дугъу аьлимди гъапиб вари гъибикlну, дишагьлийириз гъудгнар улупру центрин координатарра гъидисну, гьадму йигъан хулазди гъафибси чаз гъапиб вари тамам апlуз хъюгъну: тамамди жандак дижибкlну, гъудган дапlну, дугъу чан дадайихъан дюаь гъапlу. Дугъу Аллагьу Тааьлайикан чан дада му чlуруваларихьан азад апlуб ккун гъапlну. Дианайи чан ччвурра дигиш гъапlну, магьа гьамус дугъан ччвур Хадижа вуйи. Хадижайин му чlуру нивкl чан уьмрин аьхиризкьан сарун гьичра кваълан дурубшур.

– Хиларра, ликарра дийитlнайи дишагьлийириз фтихъан аьзаб туврайикlан? – гьерхнийи дугъу аьлимдихьан.

- Дурари тамамди чпин жандак жибкlури, гъусул алдабхъури гъахьундар, - гъапну аьлимди.

Ухьу му дюн’яйиъ гьарсаб гъапlу ляхнихъан жаваб тувну ккунду. Футна гъапlдариз дидхъан улупнайи аьзаб тувди, кушар ккедреркди лицрудариз чпин аьзаб, жилирихъ хъпебехъруриз чан аьзаб – амма мурар вари лап чlуру жегьеннемдин аьзабар ву. Гьаддиз му ляхнарикан фикир дапlну ккунду.

Гьюрматлу абйир-бабар! Учву ичв веледари гунагь апlбаз себеб духьну ккундар. Хъа эгер ухьу дурарихь вуш-дарш саб шариаьтдиъ гъадагъа дапlнайи ляхнар апlуз гъитраш, Гъиямат йигъан ухьуз лап аьхю хажалат шул.

Гьамдихъди саб дюшюшра кlваин апlурза. Думу улихьнаси сар касди ктибтуб ву: саспи абйир-бабари чпин 11-пи классдиъ урхурайи чпин шубар, жара гъулариан дуфнайи баяриз рякъбан бадали, гужниинди мярака айи йишваз гьаъри шулу, гьадрари вахтниинди швуваз гъадагъбан бадали. Гьяйиф, мукьадар ужуз гьаз шуйкlан саспидар. Гьаз мурариз Аллагьу Тааьлайин кьадарнакан хабар адайкlан?! Хъа мицдар дюшюшарихъан жаваб тувбакк ккуркьди аьхир йигъан.

Гъит Аллагьу Тааьлайи ухьу жвуван ктучlву гунгьарихъан кlваантlан туба апlрударикан апlри! Амин!

АЬЙША ТУХАЕВА