Фикир тувай бицlи дустар
Ассаламу аьлейкум, йиз бицIи дустар! Му макьалайиъ йиз улариинди узуз гъябкъю саб гьядисайикан ктибтидизачвуз.
Сад йигъан ярхла рякъди гъягъюрайза. Думу лап аьхъю йигъ вуйи. Мици гьава дигиш шлуб аьгъдарди, узу, аьдати вуди, маниди алахьнадайза, ва гьаддиз сацIиб рякъ ккадапIубси, лап аьхъю гъабхьунзуз. Жибариан хиларкьан ададагъди, хулаз гъягъюз хъанара гьялакди ликар алдагъуз хъюгъза. Гьадмукьан гьялакди ликар алдагъурайзаки, гьятта кIул за дапIну гъирагъдизкьан лигурадайза. Йиз кьяляхъди сар риш гъюрайи, хъа ич гъаншарназди, хиликк сумкара ккади, сар яшлу дишагьли гъюрайи. Саб дупну дугъан хил’ан сумка адабхъуру ва дидиъ айиб вари жилиина адабхьуру.
Узуна йиз кьяляхъди гъюрайи риш дугъаз кюмек апIуз гьялак гъахьича. Яшлу дишагьлийи, учуз чугъсагъулра дупну, хилариз гьадмукьан аьхъю гъабхьнийиз ва хил’ан сумка фици адабхъурашкьан аьгъю гъабхьундарзуз, гъапи. Му гафар гъеерхьган, дугъаз кюмек апIурайи шуру, гьамус милинтина сумка фици гъабхурва, кIури гьерху. Яшлу дишагьлийи, машнаъ инчIра ади, гъапну: «Думу читин ляхин дарки! Дюн’я ужудар ксарихъди тухъди ву: эгер фукIа гъабхьиш, узуз кюмек апIрудар хъана хьидида». Му гафар гъеерхьган, лап шад гъахьунза. Му шуру лап ужувлан ляхин гъапIну, хъа йиз дици апIуз гьеле фикризкьан гъафундай-гьа… Чан хилариин али элгжар алдагъну, му шуру яшлу дишагьлийихьна туву. Гьеле дугъу, ваъ, герек дар кIурашра, яшлуйи чан хилариин дурар алалахьдикьан гагьди, му риш хътакундайи.
Шуран терефнаан мициб ужувлан ляхин гъабхьиган, фукьан уткан ляхин гъапIундаринхъа кIури, кьадар адрукьан дугъкан рази гъахьнийза. Гьякь кIуруш, дициб ляхин узкан ктубчIвундар кIури, лап начра гъабхьунзуз. Амма гьамциб фикри сикин апIурайзу – гьямд ибшри Аллагьдиз ﷻ, му дюн’яйиъ ужудар ксар гизаф а. Ужудар ляхнар апIури, кюмек апIури, ухьу Аллагьу Тааьлайихьна багахь шулхьа. Ва му ляхин ихь арайиъ гележегдиъра гьаци гъубзур кIури, умуд кивраза. Закур шлихъдикIан фициб дюшюш гъабхьиш, дугъаз кюмек дарапIди, гьичра гъидритур. Ихь газат урхурайидариканра, фужкIа сар жара кас мюгьтаж’валиъ ади гъахьиш, дугъаз кюмек дарапIди гьудучIвну гъягъюр кIури, фикир дариз.
Ав, йиз бицIи дустар, учвура шлиз-вушра читинвалиъ айириз кюмек дарапIди гъидритуб аьгъязуз, гьаз гъапиш Аллагьу Тааьлайи ихь юкIвариъ тмуну касдихьна вуйи рягьимлувал ипна. Пуз ккундузузки, ухьу ужувлан ляхнар апIрубкьан, жвувазра, жвуван жямяаьтдизра дидкан аьхю мянфяаьт а - гъапIу уж`вал ужуб натижайихъна дарфиди гъудрубзур.
АЛЬФИЯ ИДРИСОВА
