Сугьюриъ уьл ипIбан дережайикан
Сугьюриз гъудужвуб, сигьриндиккна уьл ипIуб - мурар ушв бисувалин суннатарик кахьри айидар ву. Саб бицIи тикисибкьан фукIа гъипIиш, суннат тамам гъапIу гьисаб шула. Эгер фукIа ипIуз ккунди адаш, гъудужвну, шидкьан убхъуб ужи ву.
Ибну Гьиббандихьан вуйи гьядисдиъ дупна: «Учву сугьюриз гъудужвган, штуз саб хумпIкьан апIинай».
Сугьюрин вахт гьацIишварихъанмина ккебгъну, гвачIиндин гъудгниз азан урхру вахтнахьнакьан давам шулу. Хъа гъудгнин вахт багахь шули сюгьюр апIуб, анжах азан урхайиз саб 10-15 дакьикьа ккимиди дибккуб, хъана ужу ву. Ушв гьибтруганра, кьан дарапIди, вахт улубкьубси гьибтиш ужи ву. Ушв таза хурмайихъди, думу адарш, гъеебццу хурмайихъди, думура адарш - штухъди гьибтуб сунна ву. Хурмйирихъди ушв гьибтруриз шубуб хурма итIбиинди гьибтиш ужи ву.
Ушв гьибтруган, гьаму дюаь урхуру:
«Аллагьумма лака сумту, ва аьла ризкьика афтIарту, ва бика аманту, ва аьлайка таваккалту, субгьянака ва бигьямдика такьаббаль минни иннака анта ссамиуьль аьлим».
Хъа ярхи дюаь урхуз ккунири, гьамци урхиди:
«Аллагьумма лака сумту, ва аьла ризкьика афтIарту, ва бика аманту, ва аьлайка таваккалту, субгьянака ва бигьямдика такьаббаль минни иннака анта ссамиуьль аьлим. Аллагьумма ззагьаба ззамау, вабталлатиль уьрукьу, ва сабаталь ажру ин ша Аллагьу тааьла. Я васиаьль фазли игъфир ли. Алгьямдулиллагьи ллази ааьнани фасумту. Ва разакьани фа афтIарту. Аллагьумма ваффикьни лиссиями ва баллигъна фигьиль кьияма ва аинна аьлайгьи ваннасу ниямун ва адхильналь жанната бисалам».
Эгер ушв гьибтрудариз ипIруб тувуз мумкинвал адаш, дурариз ушв гьибтуз шид хьади гъюбра гизаф ужувлан ва аьхю савабнан ляхнарикан гьисаб шула. Жара касдиз ушв гьибтуз ужуб тувган, гьаму дюаь урхуру:
«АфтIара индакуму ссаимуна, ва акала тIааьмакумуль ах’яруль абрар, ва назалат аьлайкумуль малаикату».
Мяна: «Ушв дибиснайидари учвухь ушв гьибтну, ичв тIяаьм ужудар ксари гъипIну ва учвухьна малаикар ис гъахьну».
