Рягьти суалариз читни жавабар

Мусурман кас чан уьмриъ жа-жара гьялариъ ади шулу: дугъаз, ужударси, кlваз хуш дару дюшюшарра алахьури шулу, ясана жюрбежюр читинвалар алахьури шулу. Аллагьу Тааьлайихъ кlваантlан хъугъу касдин имбударихьан айи фаркьвал гьадму вуки, фуну дюшюшдиъ вушра, думу сабпи нубатнаан диндин терефназ лигуру ва вари чав апlру ляхнар шариаьтдиъ гъадагъа дапlнаш, дапlнадарш лигуру.

Гьаму макьалайиъ ихь газат урхурайидаризра магьа чпин фикриз гъадагъуз гьаму суалар туврахьа. Му суаларикан фикир апlури, гьарсар касди чаз мянфяаьт ктабгъур кlури, умуд киврахьа. Магьа дурар:

1. Уву яв ляхин ккудубкlган, яв аьхюри увуз хулаз гъягъюз ихтияр тувну, амма увухъди лихурайи дустру чан жандин гьялар ужуйи адрувалиан чаз кюмек апlуб ккун гъапlну. Гьаму дюшюшдиъ гьапlдива?
2. Уву ляхниъ айиган, чай ясана кофе хьади гъюб тlалаб гъапlва, амма увуз мичlли чай хьади гъафи. Гьаму дюшюшдиъ гьапlдива?
3. Официантди саб дупну яв лизи ккуртниин кофе улубзну. Гьапlдива?
4. Коллегайи урхуз кlури увхьан китаб гъибисну, хъа кьяляхъ тувруган, лигуруш, саб кlаж дячlябгъна. Гьаму дюшюшдиъ гьапlдива?
5. Маршруткайиъ гъягъюрайган, душвазди яшлу дишагьли учlвну, амма дугъаз дусуз йишв адар. Гьапlдива?
6. Ляхниъ премия тувруйиз кlури, ккилигурава, амма яв аьхюр премия яв коллегайиз тувбанди гъахьну. Гьаму дюшюшдиъ гьапlдива?
7. Увухъди лихурайидарикан сари увуз, ичв гъарашугъ руш’ват бисрур ву ва ляхинра лазим вуйибси апlурдар, гъапи. Му дюшюшдиъ гьапlдива?
8. Саб вазлилан яв магазиндиъ айи гизаф кьадар продуктарин срок ккудубшура ва дурар чlур шула, амма дидкан саризра аьгъдар, гьаз гъапиш дурарик срок фила ккудубкlураш, дибикlнадар. Му дюшюшдиъ гьапlдива?
9. Увуз гирами Калам урхбан аьхю пешкешра ади ужуб талит шлуб мялум гъабхьунвуз, амма увуз Калам урхуз аьгъдарвуз, хъа яв гъуншдиз ужуди урхуз аьгъя, амма яв дугъахьна даккнишин аяв, ва дугъаз талитнакан хабарра адар. Гьаму дюшюшдиъ гьапlдива?
10. Уву заан гьюрмат айи ксарикан сар вува, уву саризкьан аьгъдру йишваз гъушунва, ва сарира увуз йишв улупурадар. Гьаму дюшюшдиъ яв кlван гьялар фицдар шул?
11. Уву заан ад айи инсанарикан вува, хъа яв гъардаш касибвал кайир ву. Увухьна гьацир заан ад айи кас хялижвди гъафи вахтна, увухьна яв гъардашра дуфнади гъабхьну. Гьаму дюшюшдиъ гьапlдива?
12. Увухъди дуствал апlури ляхниъ лихурайи кьюр коллега а. Дурарикан сар ужур ву, хъа тмунури чаз мумкинвал ккабхъси гьаму коллегайикан футнийир апlури шулу. Гьаму дюшюшдиъ гьапlдива?
13. Уву девлетлу кас вува, ва гьамусяаьт я оборотдиъ адарди, ясана дидиъ яв ихтияж’вал адарди, саб кьадар пул дивнава. Сар касди увуз дурар саб ляхниъ харж апlурхьа, ужуб мянфяаьт кайиб ву кlуру, хъа гьаму вахтна яв кlулиз гьамукьадар пул диндин рякъюъ харж апlуйкlан кlури, фикир гъюру. Гьаму дюшюшдиъ гьапlдива?
14. Уву лихурайи йишваъ сар касди саб мутму гьитlибкlури гъябкъюнвуз, думу ляхин апlурайирра заан гъуллугъчи ву. Гьамус увуз шагьид вуди дих апlиди. Амма уву гьякь гъапиш, яв уьмриз хатlа апlурза, кlура, хъа жиниди гъибтиш, гизаф кьадар пул тувурза, кlура. Гьаму дюшюшдиъ гьапlдива?
15. Увуз рябкъюравуз: варитlан кlулиъ айири варийишвариъ руш’ват бисувал ипра, хъа гьаму дюшюшдиъ саб десте инсанари, гьадгъу апlурайи чlуру ляхнариз гъаршу удучlвурхьа, кlури, тмундаризра чпин дестейиз теклиф апlуру. Гьаму дюшюшдиъ уву гьапlдива?
16. Кючейиъ сар дишагьлийиз намуссуз гафар апlури сар жилир рякъюрвуз, амма думу касдихьан варидариз гучl кади шулу. Уву гьапlдива?
17. Уву магазиндиан шейар гъадагъну хулаз гъафиган, магазинчийи увуз пул артухъди кьяляхъ тувуб аьгъю гъабхьивуз. Магазин ярхла ву, ва дугъаз уву фуж вушра аьгъдар. Гьаму дюшюшдиъ гьапlдива?
18. Увуз ляхин тувра: яв хиликк 50-тlан артухъ инсанар ккади, ужуб заан маважиб айи регьбервал апlруб, ваяки увуз гьич саркьан кас аьгъдру йишваъ мялимвал апlуб. Гьапlдива?
19. Гвачlнинган уву ляхниз гъягъюз кlури машиндиъ дуснайи вахтна гъуншди чан улдарианмина гатlабхьу кьалу шид яв машиндиинди улубзуру. Му дюшюшдиъ гьапlдива?
20. Уву машиндиъди гъягъюрава, лигуруш маршруткайиз ккилигури увуз сацlиб даккни кас дугъужвнади шулу, думу арагъ убхърур ву ва дугъан маршрутра увухъди сабсиб ву. Му дюшюшдъ гьапlдива?
21. Уву ляхниан гъюрайи вахтна, гъагъи сумкйирра хьади рякъюъ гъуншдин хпир алахъурувуз. Му дюшюшдиъ гьапlдива?
22. Уву яшамиш шулайи кючейиъ рякъ ужуб дар, гизаф ичlар а. Увузра, имбударизра манигъвал апlура. Гьапlдива?
23. Уву яв хизандин зирзибил гатlабхьуз гъягъюрайган, гъуншдин хуларин улихьра зирзибил гъябкъюнвуз. Гьапlдива?
24. Яв дустарикан сари увуз пешкеш тувну, амма увуз думу лазим шлуб дар. Хъа думу пешкешнаъ мюгьтаж’вал айи дустра авуз. Гьапlдива?
25. Яв дустарикан сари увуз лап ккуни шейъ тувру, яв адашизра думу шейъ лап ккуниб ву. Гьапlдива?
26. Убхъру, аьхю гунгьар апlру гъунши авуз. Гьапlдива? Дугъахьна фициб аьлакьа шула?

Магьа учву вари суалариз жаваб тувчва. Жавабар гьарурин жараси хьуз мумкин ву, гьаз гъапиш инсанар чпин фикриинди, аькьвлиинди, хасиятниинди жюрбежюр шулу. Амма гьамрарикан саспи учвуз читинди алахьу суалариз жавабар аьгъю агьларихьан, аьлимарихьан ва имамарихьан аьгъю апlинай.

Гьарсаб дюшюшдиъ ухьу жвуван жаваб шариаьтдиз тялукь шулаш, дарш къаршу вуш, дилигну ккунду.

Гъит Аллагьу Тааьлайи ухьуз аьгъювалар гъадагъуз, дурарикан жвуваз мянфяаьт ктабгъуз ва имбударизра хайир тувуз тавфикь туври.

Мугьяммад Кахиби