Гьямд апIбан сужда
Гьямд апIбан суждара суннат ву. Думу инсандиз саб ниъмат тувган, ясана саб кьаза-балайиккан ккадахъган апIруб ву. Гьацира му сужда апIуру, эгер увуз сар кас читин уьзрикк, ясана кьаза-балайикк ккади гъяркъиш - яни му сужда апIувал уву Аллагьу Тааьлайиз гьаддихьан уьрхбан Дугъаз гьямд апIувал гьисаб шула.
Гьацира му сужда апIуб ужи ву, эгер увуз сар шликIа инсанарихьан жиниди дарди, ачухъди гунагь шлу ляхин апIури гъябкъиш, Аллагьдиз ﷻ аьссивал улупураш - уву дицдар ляхнарихьан уьрхбан ва увуз иман тувбан Аллагьдиз ﷻ гьямд апIури.
Аьзарлуйир, ясана кьаза-бала улубкьнайидар гъяркъган апIру сужда дурарихьан жиниди апIуб ужи ву. Хъа варидариз рябкъюри гунагь апIурайир хьади вуш, ари суждара гьадгъаз рябкъруганси апIуб ужи ву, эгер дугъкан жвуваз зарар шул кIури, гучI’вал адарш. Гъудгник кайи вахтна гьямд апIбан сужда апIурдар. Гьямд апIбан суждайинна Кьур’ан урхбан суждайин чиб-чпин арайиъ айи фаркьвал анжагъ ниятнаътIан дар.
Кьур’ан урхбан ва гьямд апIбан суждйириз аьдати гъудгниз фицдар шартIар аш, ари гьамраризра гьацдар шартIар а. Гъудган батIил апIру ляхнари му суждйирра батIил апIуру. Гьямд апIбан суждайиз себебра ади, амма тамам гъапIундаш, хъасин саб вахтналан кIваин гъабхьну кIури, думуган сужда апIурдар ва кьазара апIубра адар. Эгер Кьур’ан урхбан суждайиз, ясана гьямд апIбан суждайиз себебра ади, амма фици вуш гъабхьундарш, ясана сужда апIуз ккун гъабхьундарш, думу суждайин ерина гьаму гафар 4 ражари текрар дапIну ккунду:
سُبْحَانَ اللهِ وَالْحَمْدُ للهِ وَلاَ اِلَهَ اِلَّا اللهُ وَاللهُ اَكْبَرْ وَلاَ حَوْلَ وَلاَ قُوَّةَ اِلَّا بِاللهِ الْعَلِيِّ الْعَظِيمِ
«Субгьяна Ллагьи, вальгьямду лиЛлагьи, ва ла илагьа илла Ллагьу, ваЛлагьу акбар, ва ла гьявла ва ла кьуввата илла биллагьиль аьлиййиль аьзим».
