Аллагьу Тааьлайи Гъиямат йигъ гьаз халкь дапlнайиб ву?

Аллагьу Тааьлайи Гъиямат йигъ гьаз халкь дапlнайиб ву?

Гьарсар мусурман касдиз якьинди аьгъяди ккунду: гьаму жилиин алиб вари Аллагьу Тааьлайинуб ву ва Дугъахьна кьяляхъ гъябгърубра ву. Гьаму жилиин ихь уьмур фукьан ярхиб гъабхьишра, аьхир саб ву.

Дидиз далил гирами Каламдиъ а:

ثُمَّ إِنَّكُم بَعْدَ ذَلِكَ لَمَيِّتُونَ ثُمَّ إِنَّكُمْ يَوْمَ الْقِيَامَةِ تُبْعَثُونَ

Мяна: «Дидин кьяляхъ учву кечмиш хьидичву»; Хъасин, Гъиямат йигъан, учву чlиви апlиди» (сура «Аль-Му’минун», аяты 15-16).

Аллагьу Тааьлайихъ хъугъувал, Гъиямат йигъахъ хъугъувал адарди, тамам шлуб дар, гьаз гъапиш Аллагьу Тааьлайихъ хъугъувал Дугъу Чан китабдиъ дупнайибдихъди ва Чан пайгъамбрарихьанмина хабар тувнайибдихъди аьлакьалу дапIна. Ухьуз аьгъюганси, Гирами Каламдиъ Гъиямат йигъкан варжариинди аятар а, муъминариз думу йигъкан мялумат тувра ва гьякь рякълан улдугдариз чlурувал ккилибгура. Гирами Каламдиъ ачухъди дупнаки, му дюнья гъудрубзруб ву ва му жилиин алибра вари гъудрубзруб ву, хъа дидин кьяляхъ жара уьмур улубкьиди, аьхир адруб.

Аллагьу Тааьлайи гьапlубдикан Гъиямат йигъахъ хъугърудар гьякьлудар ву. Гьарсар пайгъамбари Гъиямат йигъ улубкьбакан, дидин читинваларикан чан умматдиз мялумат туври гъахьну. Му жилиин вуйи уьмур читинвалиъ инсан имтигьян апIуз, хъа Аьхиратра гьарури чав гъазанмиш гъапlуб кьяляхъ рубкьруз халкь дапIнайидар ву. Шли ужувлан ляхин гъапlиш, дугъаз Аллагьу Тааьлайихьан ужара хьибди, хъа шли чlуруб гъапlиш, дугъаз - аьзаб.

Аллагьу Тааьлайи ухьу му жилиин имтигьян апIура, хъа думу вари ляхнарин натижйир йивру вахт Гъямат йигъ ву, душваъ гьарсар касдиз чав гъапlу ужувларихъан савабар тувди, хъа чlурубдихъан аьзабар - гьадмукьан Гьякьлур ву ихь Аллагь.

Думу йигъ аьламатнануб хьибди: Исрафили кьюб ражари ил ипувалиан аьхю сес хьуб (сабпи ражари гъапlубдиан вари кечмиш шулу, хъа кьюбпибдиан вари чlиви апlиди), вари Аьраса чюлиз уч апlиди, гьарсарин ляхнар ерциди, ужувланна харжувлан ляхнар кайи кагъзар тувди ва гьякьлу суд, душваъ Пайгъамбариз ﷺ шафааьт апlуз мумкинвал тувди, гьарур Сиратl гъядлан улдучlвиди, Аллагьу Тааьлайин рягьимлувалиинди ужудар ксар женнетдиз гъягъиди, ва гьацира Аллагьу Тааьлайин гьякьлувалиинди гунагькрар жегьеннемдиз гъягъиди. Му ляхнарикан гирами Каламдиъ ва Пайгъамбарин ﷺ гьядисариъ дупна, ухьуз аьгъю хьпан бадали, му жилиин гъапlу гьарсаб ужувлан ляхнихъан саваб хьибди, хъа чlурубдихъан аьзаб хьибди.

Суд фтиз герек ву? Аллагьу Тааьлайихьан, суд адарди, ужударна харжидар жара апlуз шулдарин?

Аллагьу Тааьлайихьан, суд адарди, инсанар женнетдизна жегьеннемдиз жара апlуз шулдарин, кlури, гизафдари гьерхри шулу. Му суалназ гьамци жаваб тувуз шулу: я йиччврар-терезар, я суд адаршра, Аллагьу Тааьлайихьан гьякьлуди вари жара апlуз шулу, хъа думуган инсанари чпи гьякьлу дарди жара гъапlну пуб мумкин ву. Гьаддиз вари махлукьатариз Аллагьу Тааьлайи, Чан заанвал ва гьякьлувал улупури, гьамциб къайда дебккна. Гъиямат йигъахъ хъугъувалиан инсандин чав апlру ляхнарихъан жавабдарвал шулу. Гъиямат йигъахъ гьякьлуди хъугъувалиан гьамциб натижа арайиз гъюру: чlуру ляхнарихьан уьрхюру, ужувлан ва хайирлу ляхнар апlуру, чан хасият уткан апlуру. Гьамциб иман айи инсанари чlуруб дарапlур. Дурарикан гьарсар тмунурихьна гьюрмат ади, артухъдиси ужувлан ляхнар апlури хьиди.

Гъиямат йигъахъ хъугъру касди чан Аьхират ужуди ккабалгуру. Ярхи рякъюъ учlвуз гьязур шулайи кас фици дикъатниинди гьязур шулуш, Аьхиратдиз гъягърурра гьаци духьну ккунду. Эгер дици дарш, дугъан ярхи сафар батlил хьуз мумкин ву.

Гьациб къайдайиинди инсанар Гъиямат йигъахьнара гьязур духьну ккунду. Гьаддиз сабур апlури, иман гужал апlури ва Аллагьу Тааьлайин амрар тамам апlури духьну ккунду. Фуну кас кlваантlан гьязур гъахьиш, дугъаз Аьхиратдиъ заан йишв рубкьур, хъа фуж гьязур шулдарш, учв йикlру вахтна кlваин шул, амма сарун кьан вуди шул. Дугъаз хъанара яшамиш хьуз, ужувлан ляхнар апlуз ккун шул, амма сарун дициб мумкинвал хьибдар.

Гъиямат йигъахъ хъугъувал инсанариз сикинвал ву

Гъиямат йигъахъ хъугъувал гьаму жилиин шлу нягьякьваларикк ккюгъну, сабур апlру, кlваъ сикинвал ипру ляхнарикан ву. Му жилиин гьаци шулуки, мисалназ, сар касди ужувлан ляхин апlуру, амма чухсагъулра адарди Аьхиратдиз гъягъюру. Саспидариз зулум апlуру, амма зулумкрар саб жюрейин жавабдарвал, аьзаб адарди Аьхиратдиз гъягъюру. Хъа Гъиямат йигъан гьарсар касдиз чав гъазанмиш гъапlу гьякъи тувди. Ужувлар гъапlуриз - саваб, чlуруб гъапlуриз - аьзаб, зулумкриз - чан аьзаб.

Кечмиш хьувал аьхир адру уьмрин рякъюъ учlвувал ву.

Гъит Аллагьу Тааьлайи ухьуз ужуб аьхир туври, чlуруваларихьан ярхла апlри ва Гъиямат йигъан ухьу пашман шлу агьларикан даришди.