Ич дюаь кьабул апIин, я Аллагь
Бисми дупну ккергъраза му йиз назмар
Аллагьдикан ккун апIури уж`валар
Амур апIри ухьуз Аллагьдин гъуллугъна
Ич дюаь кьабул апIина я Аллагь.
Жандин сагъвалдихъ мюгьтаж мапIан учу,
Хулан хизандихъ мюгьтаж мапIан учу,
Хулан берекетнахъ аьжуз мапIан учу,
Ич дюаь кьабул апIин, я Аллагь.
Уларин аквнахъ мюгьтаж мапIан учу,
КIулин фикирнахъ мюгьтаж мапIан учу,
Ебхьувалихъ русвагь мапIан учу,
Ич дюаь кьабул апIина, я Аллагь.
Абана-баб веледарихъ мюгьтал мапIан,
Веледар абихъ-бабахъ аьжуз мапIан,
Дурар гизаф аьссивалихъ махъаан,
Ич дюаь кьабул апIина, я Аллагь.
Учу яв аьсси-мисккин лукIар вуча,
Гъи-закур яв гъапдихъна гьязур вуча,
Учу яв женнетдихъна мунтазир вуча,
Ич дюаь кьабул апIина, я Аллагь.
Васият дарди дюн’яйиан маадагъан,
Аьфи дарди дюн’яйилан маалдаан,
Кьур’ан-ясин учуз кьисмат апIина,
Ич дюаь кьабул апIина, я Аллагь.
Йисар-вазар, йигъар - вари ккудукIну,
Дакьикьайин му ихь нефес алабхъну,
Амур апIин шагьадат-келме пуз учуз,
Ич дюаь кьабул апIина я Аллагь.
Думу йигъан кюмек хьидар байна-риш
Багахь дусну ашра ихь гъардашна-чи
Кьисмат апIин ич кIулихъ убхуз ясин
Ич дюаь кьабул апIина, я Аллагь.
КIару ругдик ширин жандак кивиган
Мункар-накирди суал гъадабгъруган
Думу йигъан учуз кюмек апIин, я Гьуда
Ич дюаь кьабул апIина, я Аллагь.
СиратIдин гъядухъна учу гъухиган
РякътIан яркьуб учуз думу апIина
Арччул лик улихь дивуз амур апIина
Ич дюаь кьабул апIина, я Аллагь.
Женнетдин багъ учуз кьисмат апIина
Зам-замдин шид учуз кьисмат апIина
Женнетдин йимишар учуз кьисмат апIина
Ич дюаь кьабул апIина, я Аллагь.
Аман Аллагь, Аман Аллагь, я Аллагь
Ич гунгьарин аьф апIина, я Аллагь
Жигьилгандин гъафилвалин хил алдабгъ,
Ич дюаь кьабул апIина, я Аллагь.
Имбудариз сагъвал туври Аллагьди,
Ислам диндиз амур апIри Аллагьди,
Жигьилариз ужувлар-бахтар ишри,
Ич дюаь кьабул апIина, я Аллагь.
Ла илагьа иллаЛлагьу, я Аллагь
Ла илагьа иллаЛлагьу, я Аллагь
Ла илагьа иллаЛлагьу, я Аллагь
Ич дюаь кьабул апIина, я Аллагь
