Гъудгник кьибла терефназди илтIикIбакан
>
Гъудган апIруган, инсан Кяба рябкъру ва дярябкъру йишварихьра хьуз мумкин ву. Кяба рябкъру йишвахь гъудган апIурайи кас, саб ражарикьан думу терефназди дилигну, жвув кьиблайихьинди дишди илдицнаш дилигну ккунду, яна шаклувалдархьуз.
Дицир кас тмунури гъапибдихъ хъпехъуз хай шулдар, яна эгер сар касди кьибла жара терефназди ву кIураш, гьаддиз жвуван улариинди саб ражарикьан кьиблайихьинди илдицну аш, адарш дилигну ккунду. Эгер гьадму саб ражари гъудган гъапIу йишвахь имбу гъудгнарра апIураш, гьар ражари Кябайихьинди лигувалиъра мюгьтаж’вал адар.
Меккайиъ Масжидуль Гьярам мистаъ гъудган апIурайири вари мухур кьибла терефназди илбицну ккунду, яна Кябайихьинди. Дици дарш, ясана мухрин гьацIкьан Кябайихьан гьидибцнаш, гъудган гьисаб шулдар.
Фуну шагьрар, гъулариъ вушра, кьибла мистарин мигьрабарииндира аьгъю апIуз шулу. Эгер уву жара гьюкуматдиъ ади вуш, гьадушваъ айидари гъапибсира кьиблайихьинди илдицну гъудган апIуз шулу, амма гьадму кIурайири чан фикриан ваъ, хъа мистаз дилигну, кIураш. Гьацира компасдихъдира гъягъюз шулу, эгер думу дишди либхурайиб вуш. Компас айи вахтна, гьаддихъди душну ккунду, анжагъ жвуван ижтигьаддиинди цIиб арччул-гагул тереф дибисну. Гьамци дибикIна «Тугьфат аль-Мугьтаж» китабдиъ.
Эгер гъулаъ айи мистан мигьраб кьиблайихьинди гьибицну адар кIури, далилра хури, сар касдикьан кIураш, думуган мистаз лигури гъудган апIурдар, жвуван ижтигьаддиинди апIуру, яна жвуву фикир дапIну.
Хъа Пайгъамбари ﷺ гъудган гъапIу мист кьиблайихьинди гьибицнадар кIури, фукьан аьгъю касди гъапишра, дугъан гафар фикриз гъадагъурдар, гъудган гьадму мистан мигьрабдихъди апIуру.
