Редакцияйиз кагъаз

Гьюрматлу ватанагьлийир! Ихь газатдин редакцияйиз кми-кмиди жюрбежюр кагъзар гъюри шулу. Ич терефнаан дурарикан гьарсаб фикриз гъадабгъурача ва учву ккун апlури шлу темйириан макьалйирра дикlури шулча. Чухсагъул учвуз.

Хъа гьаму исихъ туврайи кагъаз магьа ичв фикризра туврача. Думу гъибикlур ухьуз варидариз лап ужуйи аьгъю, ихь халкьдин арайиъ фукьан вушра ужувлан, хайирлу зегьмет зигурайи Исамутдин Зейнутдинович Рамазанов ву.

Магьа дугъан гафар:

«Ансар Уьмарович, ассалам алейкум! Яв ва яв вари хизандин, редакцияйин коллективдин улубкьнайи Ц1ийи йис мубарак ибшри! Варидариз сагъвал, ужувлар, берекет ади ислягьвал айи уьмур ибшри!

2-пи январи табасаран чlалниинди удубчlвурайи «Ас-салам» газат ичв пишекари ич хулаз хьади гъафну. Чухсагъул дугъаз ва газатдин ляхин кlули гъабхурайидариз!

Ансар, гъурхунза яв кьюбиб макьалйирра. Гизаф маракьлуди дидикlнава.

12-пи машнаъ айи «Суал-жаваб» рубрикайин суаларигъ «...арагъи, ясана папрус айин, кlури гьерхри шулзухьан....ич адарич, хъа фулану магазиндиъ масу тувра кlури жаваб тувунза. Гьаддикан узуз гунагь айин, - кlури суал тувна. Редакцияйин жаваб хайирлуб ву. «Ваъ» йип ва наан туврашра улупуб герек дар. Думутlанна гъайри, эгер магазиндин сабуну йишвак «Вари пиян апlруб гьярам ву» кlуру гьядис гъибикlнийиш, хъанара ужи хьибдийи», - кlури дибикlна.

Ав, дюз кlурачва. Арагъи, папрус инсандин, хизандин уьмур ккидипрудар ву.

Мидланра гъайри, аьлимари, фагьумлу ксари кlура: «Алкоголь — это оружие геноцида. Что такое водка? Это этил «одетый» водой. То есть, Химическая формула этила С2Н5ОН. Это яд! Подобно водке все остальные спиртные напитки также содержат этил!

Гиран мапlан, узу урус чlалниинди гъибикlну кlури. Эгер ихь сар-кьюр аьлимдихъди ичкийин зарарнакан вуйи интервью газатдиъ чап гъапlнийиш, хъанара ужи шлийи.

 Дугъри касдин гаф гьарган заанди шул, ва думу заанди аьсрариъ гъубзну ккун!

Гьюрматниинди, Исамутдин Зейнутдинович Рамазанов»

Чухсагъул Исамутдин халу, увуз му макьалйирикан вуйи яв фикир улупбаз. Дугъриданна, арагъ, папрус ва имбу инсандин бедендиз зарар тувру мутмйирихьан ухьу халкь ярхла дапlну ккунду. Ихь газатдин гъюру нумрариъ ихь аьлимарихъди вуйи интервью чап апlидихьа.

Ихь газатдин мурад-метлеб халкьдиз мянфяаьт тувуб ву, хъа увуси уьмрин зурба тажруба, халкьдихъди гьарган аьлакьа айи касдин гаф учу заан дережайиинди кьабул апlурача. Чухсагъул увуз!