Зарар туву касдиз фициб жаваб тувну ккундуш
Пайгъамбарин ﷺ гьядисдиъ дупна: «Учву душмнихъди гюрюшмиш хьуб ккун мапIанай, Аллагьдикан ﷻ балйирихьан уьрхюб ккун апIинай, хъа эгер учву дурарихъди гюрюшмиш гъахьиш, сабур апIинай». Гьаму гьядисдиъ кяфирарихъди вуйи жигьаддин гьякьнаан дупнашра, мушваъ гьацира гъийин йигъан инсанарин чIурувал аьфв апIбахъна теклиф апIура.
Шлиз инсанариз зулум апIуз ккун гъабхьиш, Аллагьу Тааьлайи гьадму чIуру ният гъапIу касдихьинди дугъхьан дидиз гъаршу удучIвуз даршлуси илтIибкIиди. Аллагьу Тааьлайин лукIру гьарган Аллагьдикан ﷻ инсанарин макврарихьан, чIуруваларихьан уьрхюб ккун апIури духьну ккунду. Эгер шлинкIа терефназди нагьякь’вал гъапIиш, Исламдиинди дугъан чIурувализ жаваб вуди уж’вал апIуб варитIан хайирлу ву. Эгер дугъхьан дици апIуз шулдарш, Аллагьу Тааьлайи дупнайиганси, аьфв дапIну, хил алдабгъуб ужу ву. Амма дугъазра, чIуруб апIарза кIури, нияткьан дапIну ккундар. Эгер инсанарихьан вуйи зарар цIиб шулдарш, уткан гафниинди, ужудар ляхнариинди жаваб тувуб ужи ву. Эгер ухьхьан дицира апIуз шулдарш, дицдар ксарихьан ярхла духьну ккунду. Мицира апIуз шулдарш, шлубкьан цIиб вуйи зарартIан дархьуз чалишмиш духьну ккунду, ва гьаддихъди сабси, Аллагьу Тааьлайикан инсанарин чIурувалихьан уьрхюб кIваантIан ккун апIури, сарун дурарин чIурувалариз жаваб тувуб лазим дархьуб ккун апIури гъузну ккунду. Му суалнан гьякьнаан диндин гьюкум гьамциб ву. Дишлади, хъял ктабгъурза кIури, жвуваз зарар тувдариин алархьну ккундар. Дици гъапIиш, инсанарин терефнаан хъанара артухъ зарар, чIурувал хьуз мумкин ву, дидин натижара лап читниб хьибди. Ва думу Аллагьу Тааьлайи гъапибдихъди гъягъюб гъибтбан дугъаз аьзабра хьибди. Фицики эгер дугъу кIваантIан, чан аьжузвал улупну, Аллагьу Тааьлайикан ккун гъапIнийиш, Дугъу жаваб тувдийи. Ясана Аллагьу Тааьлайи дугъаз зарар туврудар сикин апIиди, ясана дугъаз зарар тувуз ккайидариз гьаци ижми жара имтигьян тувдики, гьятта дурариз жарарихьинди лигуз мумкинвалкьан даршлуси. Ясана Аллагьу Тааьлайи дугъаз гьацдар имтигьнар сабур апIуз мумкинвал тувдийи. Эгер гьамци гъапIиш, дугъаз Аллагьу Тааьлайихьан гьаму дюн’яйиъра, Аьхиратдиъра аьхю саваб бихъур.
