Жигьилар улихь гьауз буржи вухьа
Дюньяйиъ вари гьюкуматарин жигьиларин сабвал хьпан бадали, «День молодежи» кlуру йигъ тасдикь дапlна. Думу йигъ 24-пи апрели къайд апlуру.
Мициб йигъ тасдикь апlбан метлебра жигьилариз асас фикир тувуб ву.
Аьхиримжи йисари, жара йишвариъси, ухьухьра Табасаран жигьиларихъди вуйи центри дидин гьякьнаан ляхин гизаф гъабхура, чпин улихь дивнайи месэлйир кlулиз адагъуз центрин гъуллугъчйир чалишмиш шула. Ихь жигьиларикан, улихь гьучlвну, ислягьвалиинди, сагъ-саламатди инсанариз хайир кайи ляхнар гьял апlуб ккун апlурахьа. Ичв кlулиз адагъуз ният айи хайирнан фикрар Аллагьу Тааьлайи тамам апlри.
Гьюкуматдин терефнаанси, диндин регьбрарин терефнаанра жигьиларихъди ляхин гъабхру тешкилатар а. Гьарсаб шагьриъ-райондиъ айи имамарин председателиз жигьиларихъди ляхин гъябхру чан кюмекчи а. Дугъан вазифа жигьилариз артухъдиси фикир тувуб ву.
Эгер ухьу Табасаран райондикан улхуруш, аьхиримжи йисари имамарин советдин председатель Ансар Рамазановдин регьберваликкди ихь райондиъра думу ляхин ужуб къайдайиъди тешкил дапIна.
Думу касди гьаму ихь «Ассалам» газатдин редакторвалра апlури, райондиъ айи аьжузар-мискинариз кюмекра апlури, райондиъ айи кми-кмиди вари мистариъ тятlиларин вахтна бицlидариз дарсар туври, жигьил наслариз диндихъна гъюз теклиф апlура. Гъит Аллагьу Тааьлайи му касди зигурайи зегьмет кьабул апlри, гъит гележег акуб апlри.
Табасарандиъси, Дагъустандин Кьибла терефнан имбу шагьрар-районариъра гьаци ву. Му гьякьнаан, саб кlуруб, райондин имамариз, кьюб кIуруб, ихь гъулариъ лихурайи имамариз аьхю чухсагъул къайд апlураза.
Улихь вахтариси дарди, гьамус имамари жямяаьтлугъдин арайиъ аьхю ляхин гъабхура, ва дидин натижара ужуб дубхьна.
Гьамус саб суал арайиз гъюра: гьюкуматдира, диндин регьбрарира жигьилариз мукьадар фикир гьаз туврайкlан?
Жигьил насил ихь гележег ву. Магьа ухьуз, саб яш дубхьнайидариз, кьабидар кlура, ихь уьмур яваш-явашди чан аьхириз гъюра. Гьамус сарун гьякимар шулашра, гьюкуматдин вая диндин регьбрар шулашра, дурар ихь йишв`ина гъюрайи насларикан шулайидар ву. Гьаддиз варидари, закурин йигъкан фикир апlури, жигьилариз асас фикир тувру.
Жигьиларихьнара илтlикlури пуз ккундузузки, учу учвук умуд киврача, учвухьна ихь вари важиблу ляхнар табшурмиш апlурача, лигайгьа, учвуз тувнайи аманат лайикьлуди уьбхяй.
Йисар-вахтар гъягъюри, саб вахтна учвура кьаби хьиди, хъасин ичв кьяляхъ гъюрайи наслари имбу ляхнар кlулиз гъахур. Хъа дурари гьякьлуди халкьдин ляхнар кlули гъахбан бадали, ухьу дурариз ужуб тербия тувну ккунду, яшлуйирихьна - гьюрмат, бицlидарихьна рягьимлувал улупну ккун.
Гъит Аллагьу Тааьлайи ухьуз варидариз ужувлар туври, гъит гъюрайи насларизра берекет ва бахт ибшри.
