Гъудгнихь хьадарди апlуз хай даршлу ляхнар
Гъудгнихь хьадарди апlуз хай даршлу ляхнар
Гъудгнин дижикlну адру касдиз исихъ улупнайи ляхнар апlуб гунагь шула:
- Гъудган апlуб. Гьамциб гьюкум шула Кьур’ан урхбан суждайизра (Суждату Ттилават), шукур апlбан суждайизра.
- Кябайилан илдицуб (тlаваф апlуб).
- Кьур’андик кучуб. Гьацира Кьур’андин кlажарик, жилдарик ва думу иврубдикра кучуз хай шулдар, эгер айитl Кьур’ан аш. Хъа эгер думу аятар урхуз дубгъуз кlури ваъ, хъа саб йишвак берекетназ дидикlнайидар вуш, дурарик кучну кlури, ясана жвувахъди гъибтну, кlури, гунагьвал адар. «Икьнаъ» китабдиъ дибикlна, жвуван гардандикк ккабхъру себеб мулахдикан дапlнайи мутмуйигъян гъибиржну ккунду кlури. Хъа гъийин йигъан дурар целлофандигъян гъидиржишра, ужи ву. Гъудгнин дижрикlди, вари Кьур’ан жвувахьди гъабхуз ихтияр адар.
Эгер ккурттарик аятар дидикlнаш, гъудгнин дижрикlди дидик кучуз вая алабхьуз хай шулдар. Хъа гъабрак аятар дидикlну, штухъди марцц дапlну себебназ ва берекетназ думу шид убхъуз хай шулу. Аятар дидикlнайи кlаж ипlуз, хътlюбкъюз ихтияр адар. Кяфир касдиз Кьур’андик кучуз мумкинвал тувну ккундар. Гьацира дицир касдиз Кьур’андин аьгъюваларра тувну ккундар, эгер думу дидихъ хъугърадарш. Хъа эгер дицир касди Ислам ва Кьур’ан инкар апlурадарш ва дугъу му аьгъювалар гъадагъну Ислам дин кьабул апlур кlури умуд кивраш, дицириз аьгъювалар тувуз хай шулу. Ужубна харжиб жара апlуз даршлу бицlидарихьан кучуз шлу йишвахьра Кьур’ан гъибтуз хай шулдар ва дурарин хиларигънара тувуз хай шулдар. Ургуд йистlан артухъ вуйи бицlириз Кьур’андик кучуз, думу хьади дарсназ гъягъюз ихтияр а, гьеле гъудгнин дижикlну адаршра. Имбу дюшюшариъ, дурариз Кьур’андик кучуз, мина-тина гъабхуз ихтияр тувну ккундар.
Гъудгнин дижикlну адарди Кьур’андик кучуз хай шулу, эгер думу чан тафсир, яни мянара туври дибикlнайиб вуш ва эгер дидин мяна саб гьярфнииндикьан Кьур’антlан артухъ вуш. Гьацира гъудгнихь хьтарди дидик кучуз хай шулу, эгер думу имбу мутмйирихъди гъабхурайиб вуш ва хусуси метлеб Кьур’ан гъабхувал дарш. Гъудгнин дижикlну адаршра кьалмихъди, ручкайихъди Кьур’андин жилдар, кlажар ккидирцуз шулу (хилар кудрукIди).
Гъудгнин дижикlну адарди кlваъланди Кьур’ан урхуз, зикир апlуз, салаватар урхуз хай шулу, хъа гъудгнихь хьади му ляхнар апlури гъахьиш, хъанара ужи ву, ва думу касдиз савабра артухъ шул, иншаАллагь.
