Мекка шагьур мютlюгъ гъапlу
Мекка шагьур
Мютlюгъ гъапlу
Мусурмнари,
Аквар кархьу
Ислам диндин.
Аллагь сар ву,
Пайгъамбар гьякь
Мялум гъабхьи
Варидариз.
Гизаф тухмар,
Сатlи духьну,
Гъюри гъахьну
Пайгъамбрихьна
(Салават ва
Салам дугъаз)
Гюрюшмишдиз,
Насигьятназ,
Ихь ислам дин
Кьабул апlуз.
Ихь Пайгъамбри
(Салават ва
Салам дугъаз),
Гьюрмат ади,
Юкlв хьуз имшагь,
Кьабул гъапlну,
Ислам диндин
Ялав кипну
Ургцlуртlан
Артухъ тухмик.
Сакифтарин
Гъафну аьхюр
Пайгъамбрихьна
(Салават ва
Салам дугъаз).
Хъасин гъапну:
-Ихтияр тув,
Таифдизди
Гъягъидиза,
Йиз тухмарихь
Гъитидиза
Кьабул апlуз
Ихь ислам дин.
Ихь Пайгъамбри
(Салават ва
Салам дугъаз)
Туву жаваб:
-Лиг, Увра ибн
Максуд. Сабур.
Пубси даршул,
Ихтият йихь.
Мумкинвал а
Уву йикlуз,
Дициб рягьят
Ляхин дар му.
Я, Аллагьди
Гьаур! Узу
Фукьан ккундуш
Йиз тухумдиз
Мялум вунуз?
Дурариз чпин
Веледартlан
Ккунду узу.
Амма дици
Гъабхьундайи –
Чан тухмари
Кьялаъ чlимир
Абсну гъачlи.
Васият ву,
Шагьидарси,
Фаркьат апlуб
Таифайиъ,
Дявдиъ хьубси.
Шагьидарин
Арайиъ му
Фаркьат гъапlу
Мусурмнари,
Амур гъапlган
Ихь Пайгъамбри
(Салават ва
Салам дугъаз).
Хъасин хъана
Сакифтари
Йикьрар апlуз
Пайгъамбрихьна
(Салават ва
Салам дугъаз)
Чпин вакилар
Мединайиз
Гьау дишла.
Ваз улубкьна
Рамазандин,
Кьабул гъапlу
Ихь ислам дин
Му хялари.
Мистан хянаъ
Дивну айи
Сакифтариз
Вуйи чадур,
Ебхьуз кlури
Урхру Кьур`ан,
Рябкъюз, фици
Ибадатвал
Апlури аш
Мусурмнари
Сар Аллагьдиз.
Пайгъамбрикан
(Салават ва
Салам дугъаз)
Гъапlнийи ккун
Тувуб дугъу
Чпиз ихтияр
Икрам апlуз
Бут аль-Латдиз,
Чяхир убхъуз,
Девлетнахъ хьуз.
Ихь Пайгъамбар
(Салават ва
Салам дугъаз)
Рази хьундар.
Дюзди кlуруш,
Дуфну айи
Жигьилари
Гизафдари
Кlваълан гъапlу
Аятар ихь
Кьур`андиан.
Уьсман вуйи
Бажаранлу,
Хътакру вахтна
Хулаз дугъкан
Имам гъапlу.
Инкарвалар
Гъахьну хайлин,
Амриинди
Сар Аллагьдин
Сакифтари
Кьабул гъапlу
Ихь ислам дин.
Хъасин гъвандин
Лат кlуру бут
Гъарабгънийи
Мусурмнари,
Теклиф гъапlган
Ихь Пайгъамбри
(Салават ва
Салам дугъаз).
Хъа Наджиран
Кlуру йишв`ан
Гъафи йирхьцlур
Хачпересар.
Жилиина
Ярхи палат
Вуйи кlаздин.
Хилихъ хъайи
Гъизил тlублнар.
Дигиш гъапlган
Уткан палат,
Ихь Пайгъамбри
(Салават ва
Салам дугъаз)
Теклиф диву
Кьабул апlуз
Ихь ислам дин.
Хялари кlур:
«Учу ич дин
Ухди кьабул
Гъапlуб вуйич,
Ичвсиб дарич».
Пайгъамбри кlур
(Салават ва
Салам дугъаз):
«Учвуз машат
Фти апlуруш,
Аьгъя узуз.
Ичв икрам ву
Рукьаз – сабпиб;
Хъа кьюб-кlуруб,
Слин йикк учву
Ипlуручва;
Шубуб-кlуруб,
Иса гьисаб
Апlурачва
Аллагьдин байди».
Жаваб вуди
Хялари кlур:
«Уву затра
Гъяркъюр вуна
Адаш хътарди
Гъахьи велед,
Му Исаси?
Фуж вуш адаш,
Йипа учуз».
Ихь Пайгъамбри
(Салават ва
Салам дугъаз)
Туву жаваб:
«Ав, хъебехъай:
Адамдизра
Адар адаш
Ясан дада,
Амма гъахьну
Амриинди
Сар Аллагьдин,
Сихил ккебгъну
Му жилиин.
Гьаци вуйган
Иса даршул
Аллагьдин бай».
Хъасин дугъу
Кьур`андиан
Гъурху аят
Иса бабкан
Хьуваликан.
Наджирантар
Кьяляхъ гъушу,
Хайлиндари
Кьабул гъапlу
Ихь ислам дин.
Ихь Пайгъамбри
(Салават ва
Салам дугъаз)
Гъапнийи чан
Аьсгьябариз:
«Ригъ гьудубчlвру
Терефнаан
Багарихьди
Гъиди вартlан
Ужудар ксар,
Ву ислам дин
Хушниинди
Кьабул гъапlдар».
Дугъриданна,
Цlиб вахтналан
Гизаф хялар
Гъафи мистаз.
Ихь Пайгъамбри
(Салават ва
Салам дугъаз)
Гъапи гафар:
«Шагьад келима
Йипай варди:
Аллагь сар ву,
Пайгъамбарра
Ву Мугьяммад».
Гъудган дапlну,
Гъапlу давам:
«Закат тувай,
Ушвар дисай,
Улубкьиган
Ваз Рамазан.
Дакьатар аш,
Апlинай гьяж».
Рази гъахьи
Вари хялар.
Пайгъамбрихьна
(Салават ва
Салам дугъаз)
Емендиан
Гъафну тухмар:
Бану Бали,
Бану Муррат
Вая Хавлан.
Кьабул гъапlу
Ихь ислам дин.
Ихь Пайгъамбри
(Салават ва
Салам дугъаз)
Насигьятнан
Гафар гъапи:
«Гъуншйирихъди
Ичв албагай,
Гиран ктапlну
Ккундар затра.
Ярхла йихьай
Фалчйирихьан,
Нягьякь, угъраш
Ляхнарихьан».
Хъасин дугъу
Кьур`андиан
Гъурху хайлин
Аятарра.
Гьамци гъушу
Хайлин йигъар.
Хъасин кьяляхъ
Гъушу хялар.
