Бицlидариз дарсар!
Аьхиримжи йисари, Дагъустандин Муфтиятди тешкил дапlну, гьар хьадну мектебариъ тятlилар ккергъхъан мистариъ ва медресйириъ бицlидариз вуйи курсар гъягъюра.
Душваъ, сабпи нубатнаан, абйир-бабарихьна, мялимарихьна, жвувтlан аьхюдарихьна гьюрмат уьбхюз улупуру.
Думутаlанна гъайри гьаму саб-кьюб вазлин арайиъ дурариз гъудгнин жикlуз, гъудган апlуз ва, яваш-явашди гьярфар аьгъю апlури, Гирами Калам урхуз улупуру.
Тятlиларин вахтна жвуван веледар гьаму курсариз гьаъри гъахьиш, гизаф ужи шул.
Дагъустандин вари шагьрариъ, районариъ, гъулариъ думу дарсар гъягъиди.
Магьа ккудубшу йисан гизаф абйир-бабарикан мицдар курсар арццбан чухсагъул кlури гъеебхьунзуз.
Вари абйир-бабарихьан сабси чпин веледариз гъудган апIуз улупуз шуладар. Саспидари, гьеле чпи гъудгнар апlурашра, амма гъалатl кади шул кlури, веледариз улупурадар.
Хъа бязидари му ляхниз зат фикиркьан туврадар.
Гьаддиз жвуван гъулан, шагьрин имамди магьа бицlидариз вуйи курсар ккегърахьа, кlури хабар тувубси, дина ичв веледар гьауб ккун апlурача.
Мектебдиъ айи бицlир гьарйисан тятlиларин вахтна кьюб вазлин муддатнаъ дарсариз гъягъюри гъахьиш, школа ккудубкlайиз, дугъу саб кьадар диндин аьгъювалар гъадагъуру. Жараб дарш, гъудган апlуз, ушв бисругандин фарзар кIули гъахуз ва Гирами Калам урхуз аьгъю шулу.
Табасаран, Хив ва Дербент районарин вари гъулариъра мистариъ думу дарсар гъягъиди. Хъа шагьрариъсана кlуруш, учвуз багахь вуйи мистаз душну, душваъ ичв веледарра дарсариз гъягъруганси йикьрар апlуз шулу.
Му ляхин абйир-бабарилан гизаф асиллу ву. Эгер учвуз ккун гъабхьиш, веледаризра ккун хьибди. Саб-кьюб ражари дурар дарсариз гъушган, дураринра аьшкь шул ва дарсар урхуз ккун шул.
Гъит Аллагьу Тааьлайи ухьуз му ляхин кlулиз адабгъуз кюмек туври, гъит ухьуз жвуван веледариз илим урхуз гъитуз, дурариз диндикан мялумат тувуз кюмек туври! Амин!
