Гирами Кьур’ан кlваълан гъапlну
Ассаламу аьлайкум, гьюрматлу ватанагьлийир! Гирами Калам инсаниятдиз Аллагьу Тааьлайи туву варитlан аьхю савкьат ву. Му гирами Калам гьарсар мусурман касдин терефнаан аьхю гьюрмат айиб, варитlан заанди дебккнайиб ву.
Хъа гирами Калам кlваълан гъапlу касра Аллагьу Тааьлайин улихь заанди шулу.
Магьа Табасаран райондизра гьациб шаду хабар хъубкьну. Улихьнаси ихь жигьил бали Чlарада райондин Ириб гъулаъ айи гьяфизар гьязур апlру мадрасайиъ гирами Кьур’ан эвелиан аьхириз кlваълан гъапlну. Думу ляхин ихь халкьдиз аьхю ниъмат ву.
Ихь жигьилин заан хъуркьувалар къайд апlури, 17-пи майди Табасаран райондин Хючна гъулан клубдиъ аьхю серенжем кlули гъубшну.
Душваъ Табасаран райондин имамарин советдин председетель Ансар Рамазанов, райондин глава Мягьямед Къурбанов, ихь ватанагьли, меценат Гьяжимурад Гьяжиев, райондин гъуларин имамар ва жигьил гьяфиздин багахьлуйир уч духьнайи.
Мажлис жигьил гьяфиз Имран Дадашевди гирами Кьур’андин сурйир урхбиинди ачмиш гъапlу.
Уч духьнайидарин улихь сарпир вуди райондин глава Мягьямед Къурбанов удучlвну гъулхнийи. Дугъу сабпи нубатнаан Имран му заан хъуркьуваларихъди кlваантlан тебрик гъапlну ва чан терефнаан Имрандиз ва дугъан дадайиз чухсагъул къайд апlру кагъаз тувну. Думутlанна гъайри, Имрандиз 200 агъзур манат пулра тувну.
Гьяжимурад халуйи чан улхбаъ ихь арайиъ мицдар гьяфизар арайиз гъюваликан лап разиди вуза кlури, къайд гъапlну ва чан терефнаан жигьил гьяфиздиз 500 агъзур манат пул пешкеш вуди тувну.
Райондин имам Ансар Рамазановди, сабпи нубатнаан, Имрандиз кlваантlан тебрик гъапlну.
«Гьюрматлу уч духьнайидар, имамар ва хялар! Гъи ухьу лап шаду серенжемдиз уч духьнахьа. Ихь райондиъ сарпир вуди гьяфиз арайиз дуфна. Гьамциб жигьил вахтна му касди гирами Кьур’ан кlваълан апlуб - му лап ужудар ляхнарикан ву. Гъит Аллагьу Тааьла му жигьиликан, дугъан абйир-бабарикан рази ишри. Аьхиримжи йисари исламдин аьгъювалар гъадагъурайи ихь жигьилари аьхю хъуркьувалар улупура. Гьамусяаьт ухьуз ислам диндин илмарин кьюр доктор ахьуз, урхурайидарин арайиъ шулайи талитариъ гъалиб гъахьидар ахьуз. Дурарихьна, магьа, жигьил гьяфизра. Му ляхнарихъан ухьу Аллагьу Тааьлайиз гьямд дапlну ккунду. Улихь вахтарира ихь халкьдин арайиъ гизаф аьлимар ади гъахьну. Гьамус магьа ихь жигьил аьлимари думу рякъ давам апlура», - гъапну райондин имамди.
Ансар Рамазановди жигьил гьяфиз Имрандиз «Лада-Гранта» машин пешкешди тувну, хъа дугъан дадайиз Уьмрайиз путёвкара тувну.
Мициб серенжем тешкил апlуз даягъ гъахьидариз аьхю чухсагъул. Му, дугъриданна, Аллагьу Тааьла ва Дугъан Пайгъамбар ﷺ рази шлу заан дережайин ляхнарикан ву.
Ухьу му жигьил касдин хъуркьувалариин лап рази вухьа. Гъит ихь халкьдин арайиъ мицдар баяр артухъ ишри.
Кlваантlан Имрандин уьмриъ хъана заан хъуркьувалар ккун апlураза.
«Ас-салам» редакцияйин теревнаан дугъан абйир-бабаризра аьхю чухсагъул кlурахьа. Гъит гьаму чпин бали гъудубгъу гирами Каламдиан вуйи гьарсаб гьярфнахъ мурариз саваб артухъ туври.
