Санкт-Петербург шагьриъ табасаран халкьдин йигъ гъабхьну
Пайгъамбар ﷺ бабкан гъахьи ваз фукьан берекетнануб ва заануб даринхъа?! Магьа фукьан йисар, аьсрар гъягъюрашра, мусурмнари ккуни Мугьяммад Пайгъамбар бабкан гъахьи йигъ-ваз кIваълан гьапIрадар.
ДумутIанна гъайри, йислан-йисаз хъанара заан дережайиинди му ваз адапIуз чалишмиш шула.
Дюн’яйин жюрбежюр кIакIариъ Пайгъамбарин ﷺ ччвур заан апIура. Магьа ихь Урусиятдиъра жюрбежюр шагьрар-районариъ Пайгъамбариз ﷺ гюрюш вуйи мажлисар-мавлидар кIули гъахура.
2-пи октябри Санкт-Петербург шагьрин «Амарант» ресторандиъ табасаран халкьдин Пайгъамбариз ﷺ бахш вуйи уткан мажлис кIули гъубшну.
Му мажлиснаъ Табасаран райондин имам Ансар Рамазанов, Билижи поселокдин имам Ризван Гьябибов, Дагъустандин Муфтиятдин ГТО-йин вакил Казим Темербулатов ва гьацира жара имамар, аьлимар иштирак гъахьну.
Мажлис ачмиш апIури, сабпи нубатнаан, табасаран халкьдин агьлари ихь республикайиъ ва жара йишвариъ заан къайдайиинди гъахурайи ляхнарикан кIваин гъапIнийи.
Гьарсар улхурайири, Пайгъамбарин ﷺ уьмрикан ктибтури, ихь читин гьялнаъ айи баяриз дюаь апIури, вахтниинди ихь гьюкуматдиъ ислягьвал хьуб ккун апIури, Аллагьу Тааьлайихьна илтIикIну.
Мажлиснаъ гьарсаб улхбан кьяляхъ нашидар-мавлидар, зикрар урхури артухъси Расулюллагьдин уьмрикан кIваин апIури гъахьну.
«Ухьу гъи артухъди дюъйир дапIну ккунду. Гизаф абйир-бабарин уларилан нивгъар улдузура, веледарихъ ишура. Гьаму гирами вазли шлубкьан артухъ Аллагьу Тааьлайикан ккун апIурхьа» - гьаму гафариинди илтIикIну Ансар Рамазанов уч духьнайидарихьна.
Мажлис варидари сатIиди дюаь апIбиинди ккудубкIну.
