Бицlи гъулан аьхю игит
Хасавюрт шагьрин Саидбег Даитовдин ччвурнахъ хъайи медресейиъ гьарйисан жигьил аьлимарин ва гьяфизарин Вариурусиятдин талитар гъахура. Магьа ццира, 17-18-пи майди, душваъ нубатнан Вариурусиятдин 22-пи талит кlули гъубшну.
Му талитарин «Диндин илмар» наминацияйиъ Табасаран райондин Гьарихъ гъул’ан вуйи Дагъустандин диндин университетдин выпускник Закир Идрисов гъалиб гъахьну.
Му ихь халкьдиз аьхю хъуркьувал ву. Шаду хабар мялум апIбахъди сабси, сабпи нубатнаан Закирин абйир-бабариз, хъасин дугъаз дарсар туву мялимариз чухсагъул кlурахьа.
Чпин веледдиз 7-8 йисандин арайиъ илимдин аьгъювалар гъадагъуз гьаувал дугъан абйир-бабарин тяриф апIру заан ляхнарикан ву. Гъит Аллагьу Тааьлайи дурариз женнетдин заан дережа туври.
Му талитнаъ гъалиб гъахьидар ва призёрар Дагъустандин муфтий Аьгьмад Афандийихьна гъушну.
«Жвуван веледдин хъуркьувалар гъахьиган абйир-бабар фици шад шулуш, ари гьаци узура учвкан разиди вуза. Му аьхю хъуркьуваларин ляхин ву. Баракаллагь тешкилатчйиризра. Магьа швнуд йисандин муддатнаъ му талитар кlули гъахурачва. Мушваъ жара регионариан вуйидарра иштирак шула, думура чиб-чпин арайиъ ужудар аьлакьйир мюгькам апIру ужуб заан ляхин ву. Му талитариъ иштирак гъахьи гьарсар кас гъалиб гъахьирик мисал ву», - гъапну Дагъустандин муфтийи.
23-пи майди Табасаран райондин Хючна гъулан клубдиъ Закир гъалиб хьпаз бахш дапIнайи серенжем кIули гъубшну.
Душваъ райондин глава Мягьямед Къурбанов, Муфтиятдин ЮТО-йиъ айи вакил Мугьяммадрамазан Ражабов, райондин имамарин советдин председатель Ансар Рамазанов, диндин илмарин доктор Мугьяммадамир Мевлютов, Сертlларин кьялан мектебдин директор Гьясан Аьлиев ва гьацира жарадар иштирак гъахьну.
Райондин главайи чан улхбаъ Закирин мектебдиъ урхурайи вахтна гъахьи вари хъуркьуваларикан мялумат тувну, ва му кас жигьил аьлимарин талитнаъ гъалиб хьувалиин чав лап рази вуйиваликан гъапну. Мягьямед Сиражутдиновичди Закириз Аферин мялум апIру кагъаз, главайин ччвурнахъ вуйи сяаьт ва саб тонна машиндихъ хъубзру бензин пешкеш вуди тувну.
Уч духьнайидарин улихь улхури, Мугьяммадрамазан Ражабовди медресйириъ урхурайи табасаран тялимарин хъуркьуваларикан ктибтну ва чан терефнаан Закириз варж агъзур манат тувну.
Ислам илмарин доктор Мугьяммадамир Мевлютовди чан улхбаъ гьамци гъапну: «Медресйириъ урхуб думукьан рягьят ляхнарикан дар. Думу ляхин апIбан бадали, аьхю сабур айи кас духьну ккунду. Гъи магьа Закири, сабурра дапlну, ужудар, заан ерийин аьгъювалар улупна. Гъит Аллагьу Тааьлайи дугъаз хъанара заан хъуркьувалар туври».
Сертlларин кьялан мектебдин директор Гьясан Аьлиевди, Закири чпин хликк урхури гъахьи вахтарикан ктибтури, гьеле мектебдиъ имидитlан дугъу урхбаъ заан хъуркьувалар гъазанмиш апIури хьубкан мялумат тувну.
Табасаран райондин имамарин советдин председатель Ансар Рамазановди чан терефнаан вари уч духьнайидариз чухсагъул мялум гъапIну, думутIанна гъайри, Закир гьязур гъапlу мялимариз, дугъан абйир-бабариз баракаллагь гъапну ва чан терефнаан Закириз Уьмрайиз путёвка тувну.
Мушваъ кIваин апIурухьа: улихьнаси Дагъустандин диндин университетди тешкил гъапlу Вариурусиятдин талитариъра Закири сабпи йишв гъибисну.
Хъа гьамус Хасавюртдин Саидбег Даитовдин ччвурнахъ хъайи медресейи тешкил гъапIу талитариъ гъалиб хьпан дугъаз пешкеш вуди Гирами Калам ва Киа Рио машин тувну.
Идрисова Закир Камиловичди 2017-пи йисан Сертlларин кьялан мектебдин урчlвубпи класс заан хъуркьувалариинди ккудубкlну.
2024-пи йисан Мягьячгъала шагьриъ кlули гъубшу Вариурусатдин жигьил аьлимарин талитариъ сабпи йишв гъибисну ва дугъаз пешкеш вуди машин тувну.
2024-пи йисан Казандиъ кlули гъубшу БРИКС гьюкуматариан вуйи иштиракчйирра айи аьраб чlалнан конкурсдиъ кьюбпи йишв гъибисну.
2025-пи йисан Хасавюртдиъ кIули гъубшу Вариурусатдин жигьил аьлимарин ва гьяфизарин талитариъ сабпи йишв гъибисну ва мушваъра дугъан гъалибвал пешкешди машин тувбиинди къайд гъапIну.
Гъит Аллагьу Тааьлайи ихь жигьил аьлимдиз хъанара заан хъуркьувалар туври.
