Муфтийи тебрик апlура!
Ассаламу аьлайкум ва рагьматуллагьи ва баракатугьу!
Гьюрматлу чвйир ва чйир! Учву вари кlваантlан улубкьурайи Ураза-байрам машкврахъди тебрик апlураза.
Думу гирами Рамазандин ваз ккудубкlру, ибадатдихъди, тавбуйихъди ва дюъйирихъди абцlнайи йигъ шулу.
Му машквру ухьуз Ислам диндин лап заан къайдайикан шагьидвал апIура – рягьимлуваликан, чиб-чпиз кюмекназ гъюваликан, мусурмнарин арайиъ айи сабваликан. Мирасарихъди аьлакьйир мюгькам апIинай, мюгьтаж’вал айидариз кюмек тувай, шадвалиъ йихьай – му машквран метлебра, инсанариз шадвалра ву.
Му йигъан ухьу ихь ватандин сяргьятар уьрхюрайи баярихъан хъанара артухъ дюаь апlурхьа. Гъит дурар Аллагьу Тааьлайин амриинди сагъ-саламатди кьяляхъ гъюру агьларикан ишри! Гъит Аллагьу Тааьлайи ихь ругариин гьаммишан ислягьвал, шадвал уьбхри.
Аллагьу Тааьлайикан ихь гъидису ушвар, гъапlу ибадат, таравигь-гъудгнар, садакьйир заан дережайиинди кьабул апlуб ккун апlураза. Гъит му машкврахъди ихь арайиъ ислягьвал, гьюрмат артухъ ибшри!
Машквар мубарак! Гъит гьарсариз Аллагьу Тааьлайин рягьимлувал ибшри!
