Рамазандин ваз кIваин апIури

Магьа гирами Рамазандин ваз ктабхъну. Улихь йисан Рамазандин вазли, читин уьзур ади, чиб-чпихьна гъягъюз, аьхю ифтарар апIуз гъабхьундайи. Гьаддиз гьаму йисан кми-кмиди вари шагьраррайонариъ аьхю ифтарар гъахьну.

Табасаран халкьра му ляхнин гьякьнаан кьяляхъ гъузундар. Сабпиб вуди Мягьячгъала шагьриъ Табасаран халкьдин аьхю ифтар гъабхьну. Душваз Мягьячгъалайиъ яшамиш шулайи табасаранлуйир уч духьну, сатIиди ушв гьибтну. Му ифтариз жюрбежюр гъуллугъариъ айи ихь табасаранлуйир иштирак гъахьну. Дидин кьяляхъ Дербент шагьрин тарихдиъ сабпи ражари вуди табасаранлуйирин зурба ифтар гъабхьну. Душваъ агъзурихьна инсанар уч гъахьну, Табасаран ва Хив райондин имамар гъафну, улхбарин арайиъ нашидар урхури лап заан дережайиинди му серенжем кIули гъубшну. Хив райондин Хив гъулан стадиондиъ варирайондин аьхю ифтар кIули гъубшну. Душваъра имамар, жямяаьтлугъдин гъуллугъчйир, мялимар иштирак гъахьну.

Улхбарин арайиъ «Батлух» кIуру нашидар урхру группайи чпин уткан сесериинди му мажлис уткан гъапIну. Хив райондиъ гьацира дишагьлийириз жаради ифтар гъабхьну. Душвазра гизаф дишагьлийир дуфну, дурари, чпиз аьгъдруб аьгъю апIури, нашидарихъ хъпехъури, Аллагьу Тааьлайин разивал абгури вахт адапIну. Огни шагьрин площаддиин аьхю ифтар кIули гъубшну. Думу ифтариъ Огни шагьрин глава Жалалудин Аьлирзаев, шагьрин имамар, муфтиятдин вакилар, депутатар иштирак гъахьну. Му шагьриъра ифтар ва серенжем лап заан дережайиъди гъубшну.

Санкт-Петербургдиъ айи табасаранлуйири нубатнан ражари чпин диндихьна ву ккунивал тасдикь гъапIну. Магьа нубатнан ражари Дагъустандиан вуйи табасаранлу имамариз, аьлимариз теклиф дапIну, вяаьз-насигьят апIури, мавлидар-назмар урхури му серенжем кIулиз адабгъну, хъасин варидари сатIиди ушв гьибтну, Аллагьу Тааьлайикан мусурмнарин арайиъ сабвал хьувал ккун гъапIну. Москва шагьриъ аьхиримжи вахтари йисан кьюб ражари мицдар серенжемар кIули гъахбанди ният дапIна ва магьа гьаму йисанра думу ният кIулиз адабгъуз мумикнвал гъабхьну. 250-тIан артухъ табасаранлуйир уч духьну сатIиди ушв гьибтну. Душваз гъафидар лап шад гъахьну, фицики ушв гьибтувал себеб вуди фукьан ихь ватанагьлийир душваъ чиб-чпихъди таниш шула ва чиб-чпиз кюмек шула. Хючна гъулаъ «Терек» кIуру кафейиъ «Инсан» фондди вари мюгьтаж’вал айидар уч дапIну, дурарихъди ифтар гъапIну. Душваз дуфнайидар лап шад гъахьну ва дурариз гьаруриз пешкешарра тувну.

Дупну ккундуки, «Инсан» фондди му гирами вазлиъ читин гьялнаъ айидариз зурба фикир туври гъахьну. Гъит Аллагьу Тааьлайи мицдар серенжемар кIулиз адагъуз себеб гъахьидариз жандин сагъвал, кIван шадвал туври! Гъит дурарин гележегра акуб, ягъурлуб ибшри!