Ичв суалариз жавабар
Ичв суалариз жавабар
Суал: Дишагьлийириз хулаъ айи вахтна жилиринубсиб шалвар алабхьуз ихтияр айин?
Жаваб: Дишагьлийи Шариаьтдиинди жара чаз мягьрам дару жилар хьайи йишвахь чан жандак ккебкну ккунду. Эгер дишагьлийири, шубари гьяятдиъ заълан туника, юбка алдарди шалвар алабхьбакан кIури гъахьиш, дици хай шулдар, гьаз гъапиш заълан фукIа алдарди шалвар алабхьган, диди шубарин къамат айиси улупуру. Эгер дугъу хулаъ анжагъ чан мягьрам хьайидарин улихь алабхьуруш, душваъ гьярам вуйиб фукIара адар, яни хай шулу. Хъа дугъу думу мягьрам вуйидарин улихь алабхьурайиб жилариз ухшарвал апIуз кIури ният ади алабхьуруш, думу дюшюшдиъра гьярам ву. Аммаки, эгер жилириз дугъу шалврин зиин фукIара алдарди алабхьну ккундарш, ари гьаму дюшюшдиъра хай шулдар. Гьаци ву жара палатдин гьякьнаанра: эгер жилириз кьабул шулдарш, алабхьну ккундар.
Дишагьлийи гьарвахтна палат Исламдиъ улупнайиганси алабхьуб ужи ву, гьятта хулаъ учв сарна-сарди айиганра, гьаз гъапиш дишагьлийин кушар рякъру йишвазди рягьимлувалин малаикар учIвурдар - ари гьамци дупна Пайгъамбарин ﷺ суннайиъ.
Мужрийигъ лизи чIарар…
Суал: 30 йис хьпалан кьяляхъ жилижвуван мужрийигъ са-сабди шлу лизи чIарар удудуз ихтияр айин?
Жаваб: Саб-кIуруб, Пайгъамбарин ﷺ гьядисдиъ дупна: «Лизи чIарар гъитай, гьаз гъапиш думу мусурман касдин нур ву. Фуну касдин чIар лизи гъабхьиш, дугъаз ужувлан ляхнар дикIуру, думу Женнетдиъ саб дережайиз за шулу, ясана дугъан саб гунагьнан аьфв апIуру».
Имам Аьгьмадди «Муснад» китабдиъ дупна: «Пайгъамбари ﷺ лизи чIарар удудуб гъадагъа дапIна, думу чIар мусурмандин нур ву. Фуну жигьилин вушра, эгер дугъан чIар лизи гъабхьиш, Аллагьу Тааьлайи думу дережайин за апIиди, дугъан гунагьнан аьфв апIиди ва дугъаз ужувлан ляхин бикIиди».
Кьюб кIуруб, Имам Муслимдихьан вуйи гьядисдиъ дупна: «Мекка гъибису йигъан Абу Кухафа хьади гъафну, дугъан кIулин ва мужрийин чIарар лизидар вуйи. Пайгъамбари ﷺ гъапну: «Дурар рангламиш апIинай, амма кIаруди рангламиш мапIанай».
Имам Аьгьмаддихьан дуфнайи гьядисдиъ дупна: «Лизи чIарар рангламиш апIуз варитIанна ужудар хна ва катам ву (катам – хнайиз ухшар айи кушар рангламиш апIруб ву).
Натижа:
Жигьилди имидира лизи гъахьи чIарар удудуб карагьат ву - гьамци кIура аьхюну пай аьлимари.
Хъа лизи чIарар рангламиш апIуб гъадагъа дапIнадар, аммаки кIаруди рангламиш апIуз хай шулдар.
