Бабан дидар фу-вуш хабар адарнуз?
Бабан дидар фу-вуш хабар адарнуз?
Бабан мухриъ гъургъушумси убхьури,
Улариан гьаз крюбхюраш аьгъдарнуз?
Цlайлапанар хътlюкъюрайи дагъдинси,
Бабан дидар фу вуш, хабар адарнуз?
Гьич саб гьюкмиз мютIюгъ дару бабан сир
Ачмиш апlру ачар, бай вуш, яв хлиъ а.
Бабкан увуз адаршра вижна, фикир,
Думу гьарган яв дидарнан ялвигъ гъя.
Назук улариъ убхьури гъургъушум,
Цlадлар йиз кlвак кирчра, фу-вуш пуз ккунди.
Му веледдин баб ву, гьаз духьна мягьрум,
Веледдин дад дамиш апlуз даршули.
Бабан дюаь мустажаб ву, гучl апlин,
Дугъан агьнакк ккахъру велед даришри.
Бабан сирар зурбадар ву, нач апlин.
Дугъаз йивру йирфар балихъ даришри.
Бабан дидар абгурайи бенде, йиз
Багъри вува, гъач, йиз мухриъ йишв авуз.
Увуз махсус гафар гьуркIри адариз –
Хъана буржлу вуди гъузраза увуз.
Абйир-бабар яв улихь ликриин илмиди, дурариз вафалу йихь. Шубуд-юкьуд йисариинди аьзарлу духьнайи абайин вая бабан дахънайи йишв дурарин маш дярябкъю веледарра гъи ихь арайиъ алахьура. Гъачlиган, малар дурккну, садакьа тувра, Кьур’ан урхуз, зикирра апlуз гъитра. Мяна фу а? Азгъунвал, учв заанди улупувал. Сарун жара мяна мушваъ фукlара адар.
Кьабивал ва жара саб уьзур себеб вуди, гаф-чlалназ, гъягъювализ бязидарик ярумчугъвал кабхъру. Рякъюъ-хулиъ, базарариз бязи веледари дурар чпин абйир-бабар вуйивал улулупри, аьйиб вуйиси гьисс апlури шулу. Хъа жвуван абйир-бабар такабурлуди апlувалтlан зиина вуйи къанажагъдикан лишанра хьуз мумкин дар.
Эй аьзиз веледар! Эгер ичв абйир-бабар дин Исламдихьан ярхла вуйи чиркин ниятариин алди гъахьиш, ичв иллаж вуйибкьан гъаврикк ккауз зегьметар зигай, амма ичв йирфар дурариз миванай.
