Гувлигъ гъулаъ цlийи мист ачмиш гъапlну

11-пи майди Табасаран райондин Гувлигъ гъулаъ мист ачмиш апlбан аьхю серенжем кlули гъубшну.

Му мажлисдиъ райондин глава Мягьямед Къурбанов, райондин имамарин советдин председатель Ансар Рамазанов ва гьацира жюрбежюр гъулариан имамар иштирак гъахьнийи.

Мажлис ачмиш апlури, Гувлигъ гъулан имам Ариф Гьяжиибрагьимовди уч духьнайидар тебрик гъапIну, чан ва гъулан жямяаьтдин терефнаан дурариз чухсагъул гъапну.

«Гьюрматлу гъуландар ва дуфнайи хялар! Гъи ихь жямяаьтдин арайиъ аьхю шадвалин серенжем кlули гъябгъюра. Гъулаъ мист ачмиш апlувал Аллагьу Тааьлайин улихь заан савабнан ляхнарикан ву. Гьаму мистаз ляхниинди, пулиинди, гафниинди кюмек гъапlдариз Аллагьу Тааьлайи аьхю савабар туври. Фукьан вушра уткан мист гъабхьну. Хъа му мистаз жямяаьт гъудгнариз гизаф инсанар гъюб варитIан ужуб ляхин хьибди», - гьамци дупну, гъулан имамди мажлис кlули гъабхуз Чвулатl гъулан имам Аьгьмад Сеферовдиз табшурмиш гъапIнийи.

Сарпир вуди райондин имам Ансар Рамазановдиз гаф тувнийи.

«Гьюрматлу Гувлигъ гъулан жямяаьт, дуфнайи имамар, аьлимар! Гъи, дугъриданна, гьаму гъулаъ аьхю шадвалин серенжем кlули гъябгъюра. Гьямд ибшри Аллагьу Тааьлайиз ухьуз мицдар мумкинвалар тувбан. Гьямд дапlну ккунду гьацира гьаму жямяаьтди, гьаз гъапиш гьаму наслариз гьамциб гирами уткан мист тикмиш апlуз мумкинвал гъабхьну. Му мистаъ гъадган гъапlу кьадар инсанарикан гьарурихъан гьаму мист дивдариз аьхю саваб хьибди. Гъи фукьан вушра мистар ачмиш апlура, ихь арайиъ дин мюгькам шула, амма бязи инсанариан мидиз кьимат тувуз удукьурадар. Гьамдихъди сабси пуз ккундузузки, Аллагьу Тааьлайи ухьуз вари ниъматар тувнашра, гьямд апlуз аьгъдархьуз. Гъи мистар утканди ву, амма гъюрайидарин кьадар лап цlибтlан дар. Гъачай гьямд апlуз дубгъухьа, чухсагъул пуз аьгъю апlухьа. Аьхириъ гьаму мист тикмиш гъапlдариз варидариз кlваантlан чухсагъул кlураза. Гъит Аллагьу Тааьлайи учву гъизигу зегьмет кьабул апlри, хулаъ берекет, шадвал ибшри, хъуркьувалар ва бахтар ишри», - гъапну райондин имамди.

Мажлиснаъ иштирак шулайи райондин глава Мягьямед Къурбановдира чан терефнаанра варидариз чухсагъул къайд гъапlну.

«Гьюрматлу Гувлигъарин жямяаьт! Учву вари му уткан мист ачмиш апlбахъди тебрик апlураза. Дугъриданна, му савабнан ляхин ву, учву гъизигу зегьметнан аьхю савабар тувричвуз. Гьацира ихь рягьматлу Аьбдукьадир халу кlваин дарапlди гъитуз шулдар. Думу касди му мистахъ, гьаму гъул-жямяаьтдихъ гизаф зегьмет гъизигнийи. Гъит Аллагьу Тааьлайи дугъан гунгьарин аьфи апlри. Мистар артухъ шула, уткан шула, амма чиб-чпихьна вуйи гьюрмат ухьу гюзлемиш апIурйи кьадар артухъ шуладар. Гьадму ляхнизра ухьу фикир тувну ккунду», - гъапну райондин главайи.

Уч духьнайидарин улихь гьацира ЮТО-рин полпреддин кюмекчи Магьди Асланов, Агъул райондин имам Кьурбан гьяжи, Дербент райондин имам Мугьяммадтlагьир Аьгьмадов, Белижи гъулан имам Ризван Гьябибов удучIвну гъулхну.

Дербент райондин имам Мугьяммадтlагьир Аьгьмадовди чан улхбаъ жигьиларин гъийин йигъан артухъдиси шлу суаларикан мялумат тувну, яни мазгьабарихъди, аьлимарихъди душну ккунивалин гьякьнаан. Дугъу чан улхбаъ, далиларра хъади имамарин, аьлимарин гафар гъахну, ва хъпехъурайидариз дугъан насигьят лап кьабул гъабхьну.

Мицдар мажлисариъ насигьятар туври, чиб-чпихъан аьгъдруб дубгъури духьну ккун. Мажлисарин мурад-метлебра гьадму ву.

Уч духьнайидарин улихь гьацира Гувлигъ гъулан яшлу кас, мист ккебгъхъанмина думу ляхниъ иштирак шулайи Пирмягьямед халура гъулхну.

«Сабпи нубатнаан, гьаму ухьу бадали дуфнайи имамариз, аьлимариз чухсагъул пидихьа. Гъит ичв алдагъу ликар женнетдиъ айидар ишри. Кьюб кlуруб, ихь жямяаьтариз аьхю чухсагъул. Гьаму уткан мист ихь жямяаьтди дивуб ухьуз баркаллу ляхнарикан ву. Эгер ухьу му мистаз гъюри, мистаъ ибадат апlури гъахьиш, Аллагьу Тааьла ухькан рази шул. Мист гъапlдар Аллагьу Тааьлайин гъуншйир гьисаб шула, ва гъиямат йигъан Аллагьу Тааьлайи чан гъуншйириз теклиф гъапlган, инсанар мюгьтал хьиди ва, увузра гъуншйир ануз, я Рабби, кlури гьерхди. Думуган Аллагьу Тааьлайи, мистар тикмиш гъапlдар йиз гъуншйир вуйиз, кlури жаваб тувди. Гьаддиз, жямаьтар, ухьу гьамциб заан ляхнин иштиракчйир вухьа», - гъапну Пирмягьямед халуйи.

Улхбарин арайиъ ихь чlалниинди назмар ва аьраб чlалниинди мавлидар гъурхну.

Вари уч духьнайидариз ипlрубра гьивну, гьамци заан дережайиинди му гъулаъ мажлис кlули гъубшну.

Магьа му мажлисназ уч духьнайидарикан саспидарин гафар.

«Узу Каспийск шагьрианмина дуфназа. Гьамциб мист заан Табасарандиъ ачмиш апlура гъапиган, дарфиди гьичра гъузуз гъабхьундарзухьан. Му ляхниин гизаф шад вуза. Жямяаьт заан дережайиинди гьязур хьувал рябкъюра», - гъапну Муслимди.

«Избербашдиан ич хизандиинди дуфнача. Аллагьдин хал ачмиш апlруган, мушваъ иштирак дархьиди гъузуз шулдар. Гъит му мистахъ зегьмет гъизигдариз аьхю савабар ишри», - гъапну Зейнабди.

Дугъриданна, Гувлигъ гъулан жямяаьтдиз кlваантlан чухсагъул дупну ккунду. Гьарсар гъафи хялижвувахьна гьюрмат улупури, дурариз хъайивал апlури, заан дережайиинди му мажлис кlулиз адабгъну.

Гъит Аллагьу Тааьлайи мистахъ Аллагь бадали зегьмет гъизигу гьарсар касдиз заан дережайиинди савабар, ужувлар, бахтар туври.