Халкьдиз хайир ибшри!
Халкьдиз хайир ибшри!
Дяъват отделин цlийи регьбер
Табасаран райондин дяъват отделин регьберди Аьбдулжалил Исрафилов тасдикь гъапlну.
Дяъват отдели Табасаран райондиъ ляхин апlури магьа 5 йистlан зиина ву. Му вахтнан муддатнаъ отделин гъуллугъчйири райондин вари школйириъ бицlидариз жюрбежюр диндин аьгьвалатарикан мялумат туври, дурарин арайиз дуфнайи суалариз жавабар туври гъахьну.
Хьуд йисандин арайиъ, дугъриданна, му отделин гъуллугъчйири заан дережайиинди му ляхин кlулиз гъабхури гъахьну.
Гьаму вахтназкьан му отделин регьбер Чвулатl гъулан имам Аьгьмад Сеферов вуйи. Табасаран райондин имам Ансар Рамазановди заан дережайиинди му ляхин кlулиз гъабхбан Аьгьмад Сеферовдиз аьхю вуйи чухсагъул къайд гъапlну.
Райондиъ дяъват отделин улихь цlийи метлебар арайиз гъювал, таза месэлйир гьял дапIну ккуниб себеб вуди, дидин регьберди Аьбдулжалил Исрафилов тасдикь гъапlну.
Аьбдулжалил Исрафиловдиз му ляхин заан дережайиинди кlулиз адабгъуз вари мумкинвалар а.
Аллагьу Тааьлайикан му касдиз тавфикьвал ва хъуркьувалар ккун апlураза. Гъит му касдикан диндиз аьхю мянфяаьт ибшри, дугъан гележег акуб, сагъвал хъайиб ва бахтлуб ибшри.
Гали-Гюхрягъ цlийи имам
Мирза халу фаркьат апlбан кьяляхъ жямяаьтдин ва райондин имамадин улихь читин месэла дугъубжвнайи: жямяаьтдин улихь имамди фуж дерккруш. Гьамкьан йисари Мирза халуйи утканди ккабалгнайи жямаьт гьадму къайдайиъди уьбхру кас ккундийи.
Аьхиримжи вахтари Мирза халуйи чаан удудубкьру вахтна чпин гъулаз жвумийин гъудган апlуз Чвулатl гъулан агьали Аьгьмад Сеферовдиз теклиф апlури гъахьну.
Гьадму ляхинра фикриз гъадабгъну, жямяаьтдин ва райондин имамдин саб гаф дубхьну, Аьгьмад Сеферов гъулан имамди ктагъну.
Аьгьмаддиз заан диндин образование а, думу ужуб насигьят айи ва уткан хасият хъайи кас ву. Мирза халусир касдин кьяляхъ имам шлур гьамци сабурлу, абурлу ва илим айи кас дахьиш, ужи даршул дупну, му кас имамди тасдикь гъапlну.
Гъит Аллагьу Тааьлайи Аьгьмаддиз му жямяаьдиз аьхю мянфяаьт тувуз тавфикьвал туври.
