Яв унчIв марцц апIин!
Саб хизан цIийи хулариз удучIвну.
ГвачIнинган нивкI’ан уягъ гъахьибси, хпир унчIв’ан гъилигиган, дугъаз гъуншди ккурттар ерццуз илирчури рякъюру.
- Лиг, фукьан марцциди дарди ккурттар дурччнаш, - гъапи дугъу жилириз.
Жилири газат урхурайи ва хпири кIурубдиз фикир туврадайи.
- Белки, дугъан сябун ужуб даршул, ясана дугъаз ккурттар урччуз аьгъдар шул. Дугъаз урччуз улупну ккунду, - давам гъапIу хпири.
Магьа гьамци гьар ражари гъуншди ккурттар гьерхрукьан, хпир дугъан марцци дару ккурттариин мюгьтал шуйи.
Сад йигъан гвачIнинган улдариан дилигну, дугъу гъапну:
- Магьа, фици-вуш гъи гъуншдин дурччнайидар марцциди ву! Урччуз гъудубгъси ву!
- Ваъ, - гъапну жилири, - узу гъи ухди гъудужвну, ихь унчIин гюзгйир марцц гъапIунза, ари гьаддиан ву.
Магьа гьамци ву ихь уьмриъра! Ухьу жарарин нукьсанвалар агуз чалишмиш шулхьа, амма ихь чпин юкIвар алацIнайибдикан хабар шуладархьуз, ухьу лазим вуйи терефнаан лигурадархьа. Сар шлизкIа фукIа кIайиз, дугъан нукьсанарикан улхайиз, сабан жвуван унчIв марцц дапIну ккунду, жвуван юкIв ва ниятар марцциди ккунду. Хъа ухьу алабцIнайи унчIв’ан лигури имидикьан гагьди, ухьуз вари дюн’я кIаруди рябкъюри гъубзди.
Саб ражари Уькьба бин Амир асгьябди Пайгъамбарихьан ﷺ гьерхну: «Я Аллагьди ﷻ Гьаънайир, фу ляхниъ архаинвал ва азадвал а?» «Жвуван мелз уьбх, жвуван хизандин нукьсанар гъайри касдиз аьгъю даришри! Ва жвуван гунгьарин гьяйифвалар зиг!» - магьа гьамциб жюрейиинди Пайгъамбари ﷺ гьаму асгьябдиз жаваб тувру.
Хъа ихь гъийин йигъан фици шула? Хиял апIарваки, Аллагьу Тааьлайи ухьу жарадарихъди ул хъипуз халкь дапIнайидар ву. Ухькан гизафдар дустарихъди, гъуншйирихъди гъалмагъалариъ ади шула. Хъа фу себеб вуди? Чиб-чпикан вуйи нягьякь фикрар себеб вуди. Чиб-чпиз варитIан багахьлу дустар футнайиланмина аьхю душмнар шула.
Гьаци вуйиган, гъачай сабур апIурхьа, гьюрматлу гъардшар ва чйир! Мусурмнар, жарарин уьмриъ учIври, жарарин нукьсанар агури, футнйир апIури, духьну ккундар. Жарарин нукьсанарихъан, гунгьарихъан ваъ, хъа жвувандарихъан ухьу нивгъар удурзну ккунду. Эгер ухьу гьарсар жвуван нукьсанариз лигури гъахьиш, мусурмнарин арайиъ йигълан йигъаз чиб-чпихьна вуйи ккунивал артухъ хьибди.
Гъит Аллагьу Тааьлайи ухьу жарадарин нукьсанар агувалихьан ва жвуван камивалариз фикир тутрувди гъитувалихьан ярхла апIри! Амин!
