Имам Магьди фила удучIвуру?..

Имам Магьди фила удучIвуру?..

Имам СуютIийин «АльГьави» китабдин 472-пи машнаъ дупна: «Имам Магьди, футнайин вахт улулубкьди ва вари гьарам гьялалси дарапIкьан гагьди, гъидар».

Хъа имам Магьди чав фуж ву? Думу ухьу вари чаз ккилигурайи, Пайгъамбарин ﷺ гьядисариъ дупнайи кас ву. Аллагьу Тааьлайи думу гьаъди, жилиин лазим дару ляхнар лап артухъ гъахьиган, гьякь’вал илимдруган, хъанара жилиин гьакь’вал дебккуз кIури. Хъа учву фикир тувраданчва, хъа белки думу вахт дубхьнашул-гьа? Гъи вари гьаци илтIибкIна, харжиб гъапIган кIубнир шула, хъа уж’вал – кьувватсузвалин лишанси дибисна. Аьраб гьюкуматариъ шулайибдикан ктибтубкьан ге-рек шуладар, варидариз думу ачухъди рябкъюра. Душвариъ шулайи ляхнари вари мусурмнариз хажалатвал тувра. Исламдиз, мусурмнариз къаршуди, саспидари фу ляхнар апIураш, ухьуз рябкъюрахьуз. Думу шулайиб вари нафтлихъди аьлакьалу вуйиваликанра ухьуз хабар ахьуз. Фу-жариз-вуш гьадму ккадабгъурайи нафтли эйсйир хьуз ккунди а, кIури, фукьадар инсанарин ифи удубзура. Гъачай, Имам Магьди гъювалин лишнарихъди таниш хьухьа ва дурар ихь гъийин йигъахъди тевхьа. Ибн Гьяжар Аль-Гьайтамийи чан вахтари Имам Магьди гъювалин лишнарикан китаб гъибикIну. Магьа думу гьядисарикан сабунуб: «Мусурмнарин арайиъ футна хьибди. Саб терефнаъ думу (футна) цIиб гъабхьиган, жара терефнаан ккебгъди.

Ва гьамци гъубзди, завариан «Дугъриданна ичв амир (аьхюр) Имам Магьди ву», кIури дарпиди-кьан гагьди. Фици гьаму гьядис гъийин йигъахъди алакьалу вуда! Варидариз рябкъюрахьуз аьраб гьюкуматариъ шулайиб. Сабан Египетдиъ разисузвалар ккергъну, хъасин Тунисдиъ, хъа Кувейт-диъ, Бахрейндиъ, Иорданияйиъ, Ирандиъ, Мароккойиъ, Жибутдиъ, Алжириъ, Иракдиъ, Емен-диъ. Хъа ухьу зиихъ дупнайи гьядисдиъ му ляхнарикан кIваин апIурадаринхъа: «Мусурмнарин арайиъ футна хьибди. Саб терефнаъ думу (футна) цIиб гъабхьиган, жара терефнаан ккебгъди». Абу Саид аль-Гьудрийихьан дуфнайи гьядисдиъ Пайгъамбари ﷺ кIура: «Аьхиримжи вахтна йиз уммайиина чпин гьякимарихьан аьхю кьаза-балйир гъиди …» Гъавриъ гъахьунчву? Бала гъибди гьякимарихьан. Гъачай фикир апIухьа: гьадму гьюкуматариъ шулайи ляхнар фу бадали шула? Думу ляхнарин себеб гьякимарин политика ву, дурариз шлин вушра ифи удубзну, чпин жибар ацIуз ккун шула. Имбубдикан учву фикир апIинай. Хъа саб ляхин ашкарди ву – Магьди гъювал лапра багахь дубхьна! Багарихьди му футнайин аьхир хьибди. Ва гьядисдиъ дупнайиганси: «Дугъу (Имам Магьдийи) му дюн’я гьякь’валихъна хибди». Уьмур гьадмукьан уткан вуйиб хьибдики, чIивиди айидариз, Аллагьди (I) кечмиш дапIнайидарра чIиви дапIну, дурариз, фукьан Магьдийи девлетнахъди ва Аллагьдин (I) рягьматдихъди дюн’я абцIнаш, улупуз ккун хьибди».