Дагъустандин Муфтийи тебрик апlура
Ассаламу аьлайкум ва рагьматуллагьи ва баракатугь!
Гьюрматлу гъардшар ва чйир! Ухьуз гирами Рамазандин ваз туву Сар Аллагьдиз гьямд ибшри, думу гунгьарин аьфв апlру ва рягьимлувалин ваз ву.
Мусурмнариз му ваз варитlан заанди дебккнайиб ву. Саб «Рамазан» кlуру гаф ебхьувалиинди мусурмнарин кlваъ шадвал, рягьимлувал арайиз гъюру. Му ваз имтигьяндин, ибадатдин ва ккудудубкlру кьадар савабар тувру ваз ву, ва думу савабнан кьадар анжагъ сар Аллагьдизтlан аьгъдар.
Гьямд ибшри Аллагьу Тааьлайиз, магьа йислан-йисаз мусурмнарин арайиъ йигъандин вахтна ушв бисрудар ва йишв ибадатнаъ адапIрудар артухъ шула. Хъа гьяйифки, саспидари му ляхнихьна кагьалвал апlура. Дурариз Пайгъамбарин ﷺ гьядис кlваин апlурхьа: «Шли сад йигъан ушв гъибисиш, Аллагьу Тааьлайи дицир касдинна жегьеннемдин арайиъ гьаму жилихьан заварихьнакьан манзил айи ичI адабтIну дебккди» (Тlабарани).
Аьгъю йибхьайки, учву гъибису гьарсаб ушв Аллагьу Тааьлайин улихь лап заанди ву, ва дидин саваб му жилиин сабдихъдира тевуз шлуб дар. Му вазли ухькан гьарсар кас жвув ужуб терефназди илтlикlуз чалишмиш духьну ккунду, чиб-чпиз кюмек апlури, асас вуди ихь кюмекназ ккилигурайидариз фикир тувну ккунду.
Пайгъамбарин ﷺ гьядисдиъ дупна: «Фуну касди Рамазандин вазли Аллагьу Тааьлайихъ кlваантlан хъугъну, Дугъак умуд кади ушвар гъидисиш, дугъан ккудушу гунгьарин аьфв апlур» (Бухари, Муслим).
Аллагьу Тааьлайи, ихь варидарин гъидису ушвар кьабул дапlну, ихь вари гунгьарин аьфв апlур, кlури, умуд кивраза.
Вари мусурмнар гирами Рамазандин вазлихъди кlваантlан тебрик апlураза! Гъит ухьу му ваз артухъди ибадат апlури, ужувлан ляхнар апlури лайикьлуди кlулиз адабгъру агьларикан ишри! Амин!
