Дадайин никк
Дадайин никк
Узуз гьаму бицIи макьалайиъ, велед бабкан гъахьиган, дугъу чан веледдиз мухрилан тувру никк фукьан мянфяаьт айиб вуш, ктибтуз ккундузуз. Ислам диндин къанунариинди, веледдиз мухрилан никк тувуб лап ужудар ляхнарикан гьисаб апIура.
Гьядисдиъ дупна, веледдиз чан дадайин никктIан ужуб фукIара адар. Чан веледдиз мухрилан никк тувру дадайиз Аллагьу Тааьлайи аьхю саваб тувру. Хъа саспи дадйири чпин аьгъдрувалиан, ясана чпин жандин утканвал чIур шулич кIури, велед дишлади бабан никкдихъан хътатIуру. Саспидари, гьеле чпи больницайиъ имиди, чпин веледар жюрбежюр смесарихъдина соскйирихъди вердиш апIуру. Сабпи 6 вазли бабу чан веледдиз тувру никкдик думу велед сагъ вуйир хьпан бадали, вари лазим вуйиб кади шулу. Ихь диндиъ улупнаки, веледдиз 2 тамам йисари никк тувуб ужи ву. Аллагьу Тааьлайи гирами Кьур’андиъ дупна: «Гъит дадйири чпин веледариз 2 тамам йисари никк туври, эгер чпиз тамамди никк тувуз ккундуш» (сура «аль-Бакьара», 233-пи аят). Гирами Кьур’андиъ кмиди му ляхникан айи мянфяаьтнакан дупна. Дадайи чан веледдиз туву никкдин гьарсаб литIниз, чав веледдиз никк туври имидикьан гагьди, сабур апIбаз, аьхю саваб бикIуру.
Пайгъамбари ﷺ дишагьлийирин терефназди дупна: «Учву рази хьидарнучвахъа: Учвкан шлинкIа фуник чан жилирикан велед кади гъашиган, жилирра чаин рази вуди гъахьиш, дицириз чан фуник велед кади гъахьи гьарсаб йигъан, йигъандин вахтна ушв гъибисуризсиб ва йишвну ибадатдиъ гъахьиризсиб саваб тувру. Хъа дугъу велед арайиз адаъру вахтна завариин ва жилариин алидариз Аллагьу Тааьлайи дугъаз фициб саваб гьазур дапIнаш, аьгъдар. Хъа велед бабкан гъахьиган, веледди гъубхъу никкдин гьарсаб литIнихъан Аллагьди ﷻ дишагьлийиз аьхю саваб тувру. Хъа бицIир ишури, дадайиз нивкI апIуз гъидритруган, дугъаз 70 лукI азад гъапIгансиб саваб бикIуру. Учвуз аьгъянчвуз, узу фицдар дишагьлийирикан кIураш? Узу Аллагьу Тааьлайихъ ва чан жилирихъ хъпехъру дишагьлийирикан улхураза» (ТIабарани).
Гизаф дишагьлийириз Аллагьу Тааьлайи чпиз гьязур дапIнайи пешкешарикан хабар адар, хъа хабар айидариканра саспидарин кIваълан гъябгъюру, яни аьгъяди вушра, тамам апIурдар.
Пайгъамбарин ﷺ гьядисдиъ дупна: «Дишагьли бицIир кайи вахтна, бицIир апIру вахтна ва веледдиз никк тувру вахтна Аллагьу Тааьлайин рякъюъ айирик мисал ву. Эгер гьадму вахтна думу кечмиш гъахьиш, дугъаз шагьиддизсиб саваб хьибди» (ТIабарани).
Веледдин ипIрубдикан варитIан ужуб дадайин никк ву. Гьар ражари дадайи, велед мухрикк ккитуз хъюгъяйиз гъудгнинра дижикIну, «Бисмиллагьи Ррагьмани Ррагьим» дупну никк туври, чан веледдин улихь вуйи гьякьяр тамам апIури гъахьиш ва мид`инди Аллагьу Тааьлайин разивал абгури гъахьиш, велед хъайи бабаз варитIанна ужуб гьадму ву.
