Хив гъулаъ аьхю серенжем

Хив гъулаъ аьхю серенжем

Инсан я аьлим духьну ккун, я тялим, ясана гьамрари кlурубдихъ хъпехъурайир. Эгер гьаму рякъярикан сабкьан ктабгъиш, инсандиз чан уьмриъ гизаф рягьят шул.

Ав, жюрбежюр себебар ади, варидарихьан аьлимарна тялимар хьуз шлуб дар, хъа аьлимарина тялимари кlурубдихъ хъпехъури, гьадму рякъюъди гъягъюз варидарихьан шулу.

Гьадму фикри гъадабгъну, жюрбежюр шагьрар-районариъ илимдин мажлисар гъахури шулу.

Магьа 19-пи июли Хив райондин Хив гъулаъ «Кьур’андин мажлис» ччвур али аьхю серенжем кlули гъубшну.

Му мажлисназ Хив райондин саки вари гъулариан инсанар уч духьнайи.

Мажлис ачмиш апlури, Хив райондин имам Шябан Салиховди вари уч духьнайидариз, дуфнайи аьлимариз, хялариз  заан чухсагъул къайд гъапlну.

«Гьюрматлу ватанагьлийир! Магьа нубатнан ражари ихь райондиъ илимдин мажлис кlули гъабхурахьа. Мицдар мажлисарин метлеб ихь халкьдин ахлакьар за апIуб, халкьдин сабвал айибтIан мюгькам апIуб, ислам диндин аьгъювалар рагъуб ва илимдин заан дережайин мянфяаьтлувал ачухъ апlуб ву. Мидихъди сабси му мажлисариъ Аллагьу Тааьлайи ухькан тIалаб апIурайи къайдйирихъди, Пайгъамбарин ﷺ уьмрихъди ва суннайихъди артухъдиси таниш апlура. Гъийин ихь серенжемдиъ иштирак шулайи аьлимарира ухьуз гьаддин гьякьнаан кlура. Гъачай гьамцдар мажлисариъкьан ихлас ният дапlну, Аллагьу Тааьлайин разивал абгури, Пайгъамбарин ﷺ рякъ бисуз чалишмиш хьухьа», - гъапну Хив райондин имамди.

Мажлиснаъ улхбарин арайиъ Йемендиан вуйи Гирами Каламдин гьяфиз Ибрагьим аз-Зубайжийи чан уткан сесниинди аятар урхуйи. Уч духьнайидар Аллагьдин ﷻ Каламдихъ дикъатниинди хъпехъуйи.

Серенжемдиъ Хазар гъулан имам Къурбан Рамазанов, Белиджи гъулан имам Ризван Гьябибов ва гьацира жара имамар иштирак гъахьну.

Му мажлиснаъ халкьдихьна вуйи имамарин теклиф саб вуйи – Аллагьу Тааьлайихьна багахь хьувал. Хъа думу рякъюъ лазим вуйи диндин аьгъювалар адарди, Аллагьдихьна багахь хьуз шлуб дар.

Думутlанна гъайри, аьлимари бицlидариз тербия тувбан гьякьнаанра яркьуди ктибтну.

Илимдин мажлисар инсанариз гизаф мянфяаьтлудар ву. Саб мажлиснан арайиъ фукьан жвуваз аьгъдру месэлйирикан аьгъю шулу. Жвуваз аьгъюб имбудариз ктибтузра шулу. Гьаддиз му ляхниъ ихь имамари, аьлимари гьадмукьан зегьмет зигура.

Хив райондиъра аьхиримжи йисари инсанарин диндихьна ужудар рафтар арайиз гъюра, диндин тIалабар уьрхюб ужуб къайдайиз дуфна. Гьаму райондиъ лихурайи имамарин Советдин председатели ва дугъан хиликк лихурайи имамари му терефнаан аьхю зегьмет зигура.

Магьа гьаму мажлиснаъра гьаци гъабхьну. Мажлиснан аьхириъ Хив гъулан имам Мансур Везировди варидариз чухсагъул мялум гъапIну. Хъасин дюаь дапlну гьамдиинди му серенжем ккудубкlну.

Мажлис ккудубкlган, вари чпин шадвал сар-сарихъди пай апIури, чиб-чпиз тебрик апlури гъахьну. Му аьхю берекетнан хъуркьувал ву.

Гъит Аллагьу Тааьлайи му мажлис кьабул апlри ва дидин берекет Хив райондиз вари терефариз рубкьруганси ибшри.