Адашин васият

Адашин васият

Ассаламу аьлайкум, аьзиз газат урхурайидар! Аьхиримжи вахтари йигълан-йигъаз аьламатнан ляхнар арайиз гъюра. Веледариз аба-баб аьгъдру, бицlидариз аьхюр аьгъдру вахтар дуфна.

Магьа улихьнаси йиз адаш кечмиш гъахьну. Адаши учв чlивиди имиди чан веледарин арайиъ жвуваз айи мал-мутму гьаруриз алабхъруси жара гъапlну ва, учв кечмиш гъахьиган, чав гъаписи тамам апlинай, кlури, васият гъапlну.

Адаш фаракьат гъапlча. Хъа фаракьат гъапlну кlури, рюгьникк инсанар ккимиди, мал-мутму пай апlури аьдат дар, аьхи, думу аьйибнан ляхин ву. Гьаддиз адаш фаракьат дапlну кьюб ваз арайиан гъубшган, му суал чвйир-чйирин арайиъ за гъапlча. Гьич саринра, мициб аьламат шул кlури, хиял дайи. Лигру гьялариан, дугъриданна, мал-мутму гъябкъган, инсан деллу шулу. Учу вари, ихь адаши гъапибси мал-мутму пай апlурхьа кlури уч гъахьиган, ич сану гъардши гьамцдар гафар гъапну: «Узу учвутlан аьхюр вуза ва узу кlуруганси варидари дапlну ккунду. Гьаму фулануб йизуб ву, хъа имбуб учвуз ккунибси пай апlинай».

Му гафар гъеерхьган, гьич сарихьанра гаф апlуз даршули дугъужвунча. Я Рабби, му гафар гьапlрудар ву? Гьич сарихьанра гаф апlуз даршули, алдагъунча. Магьа сацlиб вахт арайиан гъубшган, хъанара уч гъахьича, белки хъанара гаф-чlал апlуз шул кlури, умуд кади. Лигру гьялариан, ич аьхюну чвуччвуз дидин гьякьнаан гафкьан ебхьуз ккунди адайи, ва маш чlуру дапlну дугъужву. Чвена дугъан хпир, му мал-мутмуйикан аьхюну пай чпинуб ву, хъа имбуб учвуз пай апlинай, кlури, дугъужву. Чвйирин арайиъ гиранвал дарибшди кlури, гизаф зегьмет гъизигча, амма гиранвалар лап аьхю гьялнахъна гъафи. Саризра тмунурилан хил алдабгъуз ккунди адайи, ва гьамци саб утканди ккабалгнайи хизан саб дупну чlур гъабхьи.

Рягьматлу адашиз учу фукьан вушра мясляаьтнаъди яшамиш духьну ккундийи, гъулаъ варитlан мясляаьтнан хизан вуйихь кlури, гьарган тярифар апlури шуйи, амма учв гьаму жилилан душну саб бицlи вахт хьайиз магьа гьамциб дюшюш гъабхьи.

Аьзиз ватанагьлийир, учвузра васият вуйиз, аба-бабан гаф ликрикк миккиванай. Йиз абайи, учу аьхю апlурза кlури, гизаф читинвалар аьгь гъапIну, учуз образование тувурза кlури, йигъ-йишв дарпиди, зегьмет зигури гъахьну, хъа учу, думу кечмиш гъахьибси, дугъан вари зегьмет ликрикк ккивуб гъабхьну.

Эй мусурман кас, гьич сарира му жилилан Аьхиратдиз чахьди мал-мутму гъубхундар, гьич сарихьанра девлетра гъабхуз гъабхьундар, увура фукlара гъабхидарва, гъит яв нефсдин ляхнар, гъач Аллагьу Тааьла рази шлу ляхнарихьна.

Узу йизна аьхюну чвуччвухъди аьлакьйир чlур дархьуз ва Аллагьу Тааьлайин улихь дугъаз читинди дархьуз дугъаз йиз пай аьфв гъапlунза, гьаму саб мал-мутмуйин кlуллан чвевал чlур апlуз гьичра даршул.

Гьаму макьала бикlурайиган, сар аьлимдин гафар кlваин гъахьнийиз. Думу касди жвуми йигъан насигьят туври гъапну: «Гьюрматлу жямяаьт, жаражвуван мал-мутмуйихъ ул хъади вердиш махьанай, жарарин мутму учвуз мигъибтанай, думу жаваб тувуз читин ляхин ву. Му жилиин ухьу аьзаб дарди гъузишра, Аьхиратдиъ Аллагьу Тааьлайи гьарсабдихъан жаваб тувуз гъитди. Гьаци вуйиган, му ляхниз дикъат фикир тувуб ккун апlурза».

Аьлимдин му гафар кми-кмиди кlваин шулайиз ва дусу йишварихь ктибтурира шулза.

Я Рабби, гьаму ич хизандиъ гъабхьибсиб гьядиса саб хизандизра кьисмат мапlан, гъит гьарсар веледди чан абайи гъибту васият, заан дережайиинди кьабул дапlну, кIулиз адабгъри. Гьаци гъабхьиш, хизандиъ берекетра, шадвалра, бахтра артухъ шул.