Фалчйирихьан кюмек…
Фалчйирихьан кюмек…
Фалчивал аьхю гунгьарикан ву, дурари гъапибдихъ хъпехубра аьхю гунгьарикан ву. Гьамци гьар ражари ктибтурашра, имамар-аьлимари кlурашра, гьяйифки, саспидариз му гафар ебхьурадар.
Гьаму улихьнаси кьюр касди арайиъ фалчийикан сюгьбат гъабхьнийи. Дурарикан санури тмунуриз, фици фалчийихьна душну, думу касди гъапибси гъапlган, вари ляхнар ужи гъахьнуш ктибтура.
Магьа дурарин арайиъ гъахьи гафар. «Гьаз имамари фалчйирихьна гъягъюб гъадагъа апlурайкlан? Фукьан вушра гизаф мянфяаьт а. Сабанра дурари гъапиб дюз дарди гъабхьундар». Тмунурин жаваб: «Аьгъдарзуз, узу саб ражаритlан фалчийихьна гъушур дарза».
Му касдиз жаваб вуди кlуразаки, фалчйирихьна гъягъюб, сабпи нубатнаан, Аллагьу Тааьлайи ва Пайгъамбари ﷺ гъадагъа дапlнайиб ву.
Имам Бухарийихьан вуйи гьядисдиъ дупна: «Инсанари Пайгъамбарихьан ﷺ фалчйирин гьякьнаан гьерхиган, дугъу гьамциб жаваб туву: «Дурарин гафарихъ хъугъуз хай шулдар». Думуган инсанари гъапи: «Фалчйири дюзиб кlура аьхи!» Пайгъамбари ﷺ гъапи: «Ав, дурари кlуруб саспи дюшюшариъ дюзиб шулу, думу жинарихьан чпиз гъеебхьуб вуди шулу ва думу гьякьлубдихъди дурари гизаф кучlлан вуйибра кlуру». Дурари кlурубдикан аьхюну пай кучlлар ву, гьаддиз дурарихъ хъугъуз хай шулдар.
Магьа му суалназ Пайгъамбарихьан ﷺ вуйи жаваб. Пайгъамбарин ﷺ гьаму гафарикан хабар ади, гьаци вушра фалчйирихьна гъягъру касдин аьхир фициб шуйкlан?! Дидканра фикир дапlну ккунду.
Жара дюшюш. Гъуншдин бализ хизан ккебгъуз ккун гъабхьну, амма думу хизандиъ шадвал дубхьну даккнивалиан душну фалчийихьна чlуру ляхнар апlуру. Му ляхинра гъабхьиб ву.
Гьамус думу касдиз суал: му жигьиларин уьмур чlур апlбан Аллагьу Тааьлайин улихь фици жаваб тувдива?
Белки мицдар ксари аьхиратдикан фикир апlурадаршул, дици вуш ичв наслариканкьан фикир апlинай. Учву гъапlу чlуру ляхнарихъан ичв веледари, хутлари жаваб тувну ккун хьуб мумкин ву.
Пайгъамбарин ﷺ гьядисдиъ жвуваз даккниб тмунуризра ккун мапlан, кlури дупнадаринхъа! Хъа гьаз уву дициб чlурувал апlурава? Гьаз сацlибкьан Аллагьу Тааьлайихьан гучl апlурадарва? Гьаз аьхирин йигъкан фикир апlурадарва?
Ав, гъи мицдар чlурувалар апlуз рягьятди ву, хъа закур дурарихъан жаваб тувруган читинди хьибди.
Уву мицдар чlуруваларихъан тавбу дарапlиш, яв терефназдира гьацдар писвалар апlру инсанар хьиди. Дидкан кlваълан магьархан.
Ихь гъюнариин али малаикари вари бикlура ва жвуву гъапlу гьарсаб чlурувалихъан жаваб тувну ккунду.
Аллагьу Тааьлайи ухьуз анжагъ ужувлан ляхнар апlуз кюмек туври, Аллагьу Тааьлайи ухьу гьякьвалиин муддам апlри.
Хъа фалчйирихьна илтlикlури пуз ккундузузки: Туба адарди му жилилан гъушиш, лап пис чIуру гьялнаъ хьидичва. Вахт имиди думу ляхин дипну, Аллагьу Тааьлайикан аьфв ккун апlинай!
