Шуран абйир-бабариз даккунди вушра, думу хпирди гъадагъуз шулин?

Никягь апIувалин шартIарикан саб риш чан вали касди швуваз тувувал ву. Хъа дугъан вали ксарикан сарпир вуди шуран адаш шула. Эгер адашиз ккундарш, думу шурахъди фици никягь диврухъа?

Жара рякъяр агури лицуб герек дар. Эгер гьадму шурахъди гележег ккабалгуз ккундуш, сабпи нубатнаан дугъан абйир-бабарихъди гаф-чIал дапIну ккунду. Хъа дици хьпан бадали, уву дугъан риш яв хпир духьну ккунивал якьинди адашиз улупну ккунду. Гъит дугъан абйир-бабарира фикир апIри. Дураринра гъаври хьуз шулу, гьарсар абайи, бабу чан веледдихъан гизаф фикрар апIуру, дурариз дугъан гележег ужуб дубхьну ккунду, думу чIурубдихьан, харжибдихьан ярхлади ккунду. Гьаз гъапиш, веледар абйир-бабариз айибдикан варитIан багьаллудар ву, гьаддиз дурариз чпин веледарин гележегра акуб дубхьну ккунду. Саспи вахтари жигьилари, шуран абйир-бабари разивал тутрувруган, думу риш жара йишваз гьитIикIну гъахури шулу, думу ляхин шариаьтдиъ гьярам дапIнайиб ву. Риш гьитIикIувал гьякьлу жилари апIру ляхин дар.

Гьич сабанра дициб ляхин мапIанай, дици апIуз фикир гъабхьиган, сабпи нубатнаан, ичв чйирикан, жвуван шубарикан фикир дапIну ккун: «Йиз шурахъдира, чуччухъдира гьамци дапIну узуз кьабул шуйкIан?» Жвуву жвуваз гьаму суалназ жаваб тувган, имбударин гьякьнаан вуйи суаларизра жаваб тувуз гьии хьибди. Жигьилди имиди ухьу гизаф ляхнарикан фикир апIури шулдархьа, саспи дюшюшариъ думу гьаци дубхьну ккунду кIурира фикир шулихь, амма уьмрин манзилнаъ хъасин гъаври шулхьа, хъа думуган кьан хьузра мумкин ву. Гьаддиз, гьюрматлу гъардшар, шариаьтдиъ гъадагъа дапIнайи ляхнарихъди зарафатар дапIну ккундар! Аллагьу Тааьлайи мусурман касдиз улупнайи сяргьятарилан улдучIвуз хай даршул! Пайгъамбарин ﷺ рякъ кIваълан гьапIуз хай даршул! Эгер ухьу зиихъ ктуху ляхнарихъди гъягъюри гъахьиш, ари гьадмуган ихь хизандиъ берекетра шул, шадвалра шул ва халкьдин арайиъ чиб-чпихьна гьюрматра шул.

МУГЬЯММАД АЛИМЧУЛОВ