Хпирин гьарай

Ассаламу аьлайкум, гьюрматлу редакция. Учву гъабхурайи ляхниз аьхю чухсагъул, Аллагь рази ишричвукан. Гьар вазли му газат урхури, жвуваз аьгъдру гизаф ляхнар аьгъю шулу. Лап аьшкьниинди урхури шулза.

Му газатдин машариъ ужудар макьалйир шулу. Учвухьна саб тlалаб айиз, жилир хпирихьна фици янашмиш духьну ккундуш, бикlайчва. Гъи инсанарин ипlузра, алабхьузра ва деуз ужуб хал-йишвра а, амма разивал, шадвал адар. Гьамдихъди сабси узузра, ихь имбу газат урхурайидаризра саб насигьятнан гаф гъапнийиш, ужи шлийи.

- Ваалейкум ассалам, гьюрматлу чи! Гъит Аллагьу Тааьла увкан рази ишри, увуз ва яв хизандиз жандин сагъвал, кlван шадвал туври ва ичв гележег акуб ибшри!

Уву ачмиш апlурайи суал ужуб вуяв. Гизаф хизанариъ, уву гъапиганси, вари а, яни хал-йишв, пул ва имбуб, амма шадвал адар. Гьаз вуйкlан? Ухьу апlурайи ляхнариъ берекет адарш, дидкан мянфяаьт шулдар. Саспи хизанарин дакьатар аьхюдар дар, амма хизандиъ шадвал а, хъа саспидарсана девлетнаъ яшамиш шулашра, шадвал адар.

Жилирин хпирихьна вуйи аьлакьйирикан кlуруш, дидин гьякьнаан ухьуз ихь Пайгъамбари ﷺ нумуна улупна.

Пайгъамбарин ﷺ гьядисдиъ дупна: «Учвкан варитlан ижми иман ужуб хасиятнан касдинуб ву, ва учвкан варитlан ужурра жвуван хпирихьна ужуб аьлакьа айир ву»

Аллагьу Тааьлайи гирами Каламдиъ дупна (мяна): «Дурарихъди лайикьлуди яшамиш йихьай».

Хъа жилирин ужуб аьлакьа фицдар ляхнариъ дубхьну ккунду?

Жилир чан вари ляхнариъ машнаъ инчl ади духьну ккунду, жвуван хпир зарар туврубдихьан ярхла дапlну ккунду, дугъахъди сабурлувалиинди, абурлувалиинди гаф-чlал апIури ккунду.

Инсандин вари лишнар заан дережайиндар даршул, нукьсанвалра ктарди даршул, гьаддиз хпирик саб тахсир гъябкъиган, гиран дапlну, ясана гафар дарапlди дусну ккундар, хпирин имбу ужудар лишнариз дилигну ккун.

Пайгъамбарин ﷺ гьядисдиъ дупна: «Гъит гьич сар Аллагьу Тааьлайихъ хъугъу жилижвуву Аллагьу Тааьлайихъ хъугънайи чан хпирихьна хъял дарапlри, эгер увуз дугъан лишнарикан саб кьабулди дарш, гъит дугъан жара ужудар лишнариз лигри».

Уьмрин юлдшарикан санур саб хизандиъ аьхю духьну, тмунур жара хизандиъ аьхю гъахьиган, мурар хъа сатlи гъахьи вахтна вари ухьуз ккуниганси даршул, амма гаф-чlал апlури, чиб-чпик кайи ужудар гъиллигъариз фикир туври, хъа чlуру гъилигъарихьан яваш-явашди ярхла шули гъахьиш, хизандиъ берекет, шадвал шул.

Эгер гьарури тмунурик кайи нукьсанвалар агури, дурарихъан тягьна кипри, думутlанна гъайри, имбударизра ктитури гъахьиш, думуган хизан кьаназ гъубзидар.

Гьямд ибшри Алллагьу Тааьлайиз ухьу Мугьяммад пайгъамбарин умматдикан халкь апlбаз ва ухьуз му рякъяр-ражар Ислам диндиъ ачмиш апlбаз. Инсандихъди аьлакьалу фициб суал вушра арайиз адабгъиш, ихь диндиъ думу суалназ жаваб гьязурди а, ухьуз гъубзрайиб жвуван дин аьгъю дапlну, гьаму гюрчег диндихъди гъягъюб ву.

Инсандин му жилиин яшамиш хьувалин мурад-метлеб Аллагьу Тааьлайин разивал ву. Эгер ухьу Дугъан разивал дарди, иблисдизна шейтlниз кьабул шлу ляхнар апlуруш, натижайиъ ухьуз айиб фукlара адар. Гьаддихъди сабси ухьу жвуван му жилиин али уьмурра ва ахиратра чlур апlурхьа.

Аьхириъ пуз ккундузузки, Пайгъамбарин ﷺ гьядисариз асас духьну, душваъ айиганси, жилири хпириз гиран кадапlну ккундар, дугъаз ипlруб-алабхьруб, хал-йишв тувну ккун. Эгер му ляхнар кlулиз адагъурдарш, жилирин гьял Аллагьу Тааьлайин улихь гьичра ужуб даршул.

Гъит гьарсаб хизандиъ мясляаьт, бахт, ужувлар ишри. Гъит ухьуз гьаму жилиин Аллагьу Тааьла рази шлу ляхнар артухъдиси тамам апlуз, хъа иблисдин ва шейтlнин рякъхьан ярхла хьуз амур апlри.