Хив райондин натижйир
4-пи январи Хив райондин Хив гъулаъ айи Культурайин хулаъ 2024-пи йисан диндин ляхнарин натижйир адагъбан аьхю серенжем кlули гъубшну.
Му серенжемдиъ Хив райондин имам Шябан Салихов, райондин глава Ярмет Ярметов ва гьацира гъуларин имамар, жямяаьтлугъдин регьбрар иштирак гъахьну.
Уч духьнайидарин улихь улхури, Хив районди имам Шябан Салиховди къайд гъапlну: «Гьюрматлу уч духьнайидар! Сабпи нубатнаан ухьуз туву вари ниъматарихъан Аллагьу Тааьлайиз гьямд ибшри. Дугъриданна саспи вахтари ухьуз вари тувнайи ниъматар рякъюрдар, хъа фикир тувган, гъаври шулхьаки Аллагьу Тааьла фукьан ухьухьна рягьимлур вуш. Магьа 2024-пи йисандин натижйир адагъурахьа. Гьаму йисандин муддатнаъ диндин ляхнар кlулиз адагъури ляхин гъабхури гъахьидариз кlваантlан чухсагъул кlураза ва гьаму улубкьнайи цlийи йисан хъанара ужуди ляхин апlуз ухьуз Аллагьди ﷻ кюмек туври».
Хив райондин глава Ярмет Ярметовди чан терефнаан варидариз чухсагъул гъапну ва диндин регьбрари ляхнин натижа заан дережайиинди гъабхура гъапну.
«Ассалам» газатдин вакил Аьли-гьяжийи Хив райондиъ му газат тарабгъбан ужуб натижа а гъапну ва чан терефнаан му райондин имамдиз ва газатдин вакилиз пешкешар тувну.
Му серенжемдиъ гьацира жара имамар, аьлимар удучIвну гъулхну ва дурарикан гьарури диндин ляхин заан дережайиинди гъабхуваликан айи савабнакан яркьуди ктибтну.
Хив райондин имам Шябан Салиховди чан терефнаан му йисан вартIан заан хъуркьувалар улупу ксариз пешкешар тувну.
Дупну ккундуки, йислан-йисаз Хив райондиъ диндин ляхин хъанара заан дережайиз гъюра. Му натижа райондин имам ва дугъахъди имбу имамар, дяъват отделин гъуллугъчйир ва гьацира имбу диндихъан юкlв убгурайи ксар сатlи хьувалиан арайиз гъюрайиб ву.
Гьаддиз гьарсар кас имамдиз кюмек апlури, жвуван ватандиз хайир туври духьну ккун.
Му жилилан ухьу гъягъиди, ва ухьухъди анжагъ жвуван ляхнартlан гъузидар, гьаддиз ужувлан ляхнар артухъ шлуганси дапlну ккун.
Гъит Аллагьу Тааьлайи Хив райондиъ лихурайи имамариз хъанара аьхю хъуркьувалар улупуз тавфикьвал туври.
Хъа му серенжем варидари сатlиди дюаь апlбиинди ккудубкlну.
