Гирами вазарихьна мусурмандин рафтар
Гирами вазарихьна мусурмандин рафтар
Магьа гирами вазариъ учlвнахьа. Ражабдин ваз сарун чан аьхириз гъюра. Ухьуз саб артухъ хабарра даршиди, Шябандин ва Рамазандин вазарра улдучlвиди. Хъа мусурман касдин му вазарихьна фициб рафтар дубхьну ккундуш, гизафдариз аьгъдар. Дурари му вазар имбу вазарси аьдати къайдайиинди алдауру.
Дупну ккундуки, думу ихь ужуб ляхин шуладар. Аллагьу Тааьлайи му вазар заан дапlна ва ухьура му вазариъ артухъди ибадат апlуз чалишмиш духьну ккунду.
Аллагьу Тааьлайи ухьуз му вазарин вахтнаъра яшамиш хьуз мумкинвал тувбан гьямд дапlну ккунду. Улихь йисандин му гирами вазарихъанмина гъийин йигъаз ихь арайиан фукьан вушра мусурмнар аьхиратдиз гъушну. Эгер дурарихьан гьерхиш, гьарсариз му жилиина дуфну артухъси ибадат апlуз ккун шул. Гьаддиз ухьу чlивиди имбудари му ляхниз дикъатниинди фикир тувуб лазим ву.
Фу дапlну ккунду?
- Жямяаьт гъудган.
Сабпи нубанаан гьарсаб гъудгниз мистаз гъягъюз, жямяаьт гъудгнариъ иштирак хьуз чалишмиш йихьай. Эгер вари гъудгнариз шулдарш, хъитlирхбандин ва гвачlиндин гъудгнариз гъягъюз чалишмиш йихьай.
- Ушвар дисуб.
Му вазариъ ушвар дисури яваш-явашди Рамазандин вазлиз гьязур духьну ккунду. Хъа Шябандин вазлин аьхириъ ушвар дисуб яваш дапlну, Рамазандин вазлиз жвуван беден гьязур апlуб герек ву.
- Гирами Калам урхуб.
Аллагьу Тааьлайи гьарсаб гъапlу ужувлан ляхнихъан ухьуз саваб тувра. Хъа гирами Калам урхуз аьгъю апlувал ва урхувал ужувлан ляхнарин, савабнан ляхнарин кlакlнаъ айиб ву. Гьаци вуйиган, гьар йигъан сацlибкьан гирами Калам урхуз чалишмиш йихьай. Эгер урхуз аьгъдарш, гьаму вазари ужувлан ният дапlну, урхуз дубгъуз чалишмиш йихь.
- Зикир.
Зикир урхуз, «Ла илагьа иллаЛлагь» пуз аьгъдру кас гьичра адаршул - мелзназ рягьтиб, фукьан гъурхишра эргвал даршлуб, артухъ урхбахъ савабра гизаф шлуб. Гьаци вуйиган, йигъандин ва йишвандин арайиъ шлубкьан артухъ зикрар урхай.
- Пайгъамбариина ﷺ салават.
«Аллагьумма ссалли аьла Мугьяммад ва аьла али Мугьяммад». Магьа салаватдин варитlан жикъи къайда. Гъачай гьар йигъан варитlан цlиб вуйиб варж ражари му салават урхуз ният апlухьа. Эгер ухьу салаватар урхури гъахьиш, Аллагьу Тааьлара рази шул ва Гъиямат йигъан Пайгъамбарин ﷺ шафааьтра шул.
Гьамци гирами вазар адауз чалишмиш шулхьа, аьзиз ватанагьлийир!
Гъит ухьуз артухъдиси хайирлу ляхнар апIуз, му гирами вазариъ тухъди ибадат апlуз Аллагьу Тааьлайи кюмек туври.
Ансар Рамазанов
