Гирами ваз улдубчlвну!
Гирами ваз улдубчlвну!
Ассаламу аьлайкум, аьзиз ватанагьлийир! Магьа ухьу фукьан ккилигурайи ихь гирами Рамазандин ваз сакьюдар йигъар улихьна ухьуз хабар хьайизра улдубчlвну гъубшну. Гьамци ихь уьмурра гъябгъюра…
Му вазлин муддатнаъ инсанари гизаф ужувлан ляхнар гъапlну. Аллагьу Тааьлайи чпин заан дережайиинди кьабул апlри.
Гьяйифки, му ваз фициб вуш, гьапlруб вуш, фу бадали Аллагьу Тааьлайи тувнайиб вуш, хабаркьан адарди гъахьи инсанарра а. Гъит Аллагьу Тааьлайи ухьура, дурарра гьякь рякъ’ин муддам апlри.
Швнуд-сад йис улихьна Рамазандин вазли гъабхьи саб гьядиса ктибтурухьа. Дюзди гъапиш, му гьядисайикан мялумат тувруш-тувурдарш гизаф фикрар апlури гъахьунза, хъа ктибтбанра ният гьадму вуйизки, гъит имбударикьан гьадму гъалатl дарапlри.
Ихь Дагъустандин сабуну шагьриъ гьаму гирами Рамазандин вазли саб хулаъ жигьил байна риш кечмиш духьну гъидихъну. Мурар фужар вуш ахтармиш дапIну лигуруш, зина апlуз квартира дибиснайидар вуди гъахьну. Гьаму гирами вазли гьамциб чlуру гунагьнан ляхнихъ хъади кьюбридра кечмиш гъахьну.
Лигайчва ватанагьлийир, фици шулаш. Саспидари му гирами вазли ушвар дисури, артухъдиси ибадат апlури, таравигь-гъудгнар апlури, Аллагьу Тааьлайиз багахь хьуз чалишмиш шулу, хъа саспидарсана гирами ваз гьяспикк ккадарди, зина ва жара гьаци аьхю гунгьар апlури шулу.
Гьамциб гирами вазли зина апlури кечмиш гъахьи ксарин аьхир фициб шул? Фукьан вушра чlуруб ва аьзабнануб шул.
Аллагьу Тааьлайи гирами Каламдиъ ва Пайгъамбари ﷺ чан гьядисариъ ухьуз дин аьгъю апlинай кIура ва дидин къанунарихъди гъягъюб тlалаб апlура. Эгер инсанди Ислам дин ахтармиш апlури гъахьиш, аьхю гунгьарихьан ярхла хьузра кюмек шул. Инсанди гунгьар апlбахъ, дугъан иман кам шулу, хъа иман адруган, фуну чlуру ляхин апlурушра, дугъаз фикир ктарди шул. Ав, му жилиин дугъаз фикир ктарди хьузра мумкин ву, хъа Ахиратдиъ Аллагьу Тааьлайин улихь аьзаб гъагъиб хьибди.
Эй мусурмнар, гъачай мусурманвал кlваълан гьапlурдархьа, гъачай ухьу шлин умматдикан вуш, гьархудархьа, гъачай Пайгъамбариз ﷺ дерд шлу ляхнар апlурдархьа.
Гъит Аллагьу Тааьлайи му ккудубшу Рамазандин вазлин берекет ухьхьан ярхла дарапlри. Гъит Аллагьу Тааьлайи ухьуз гъюру Рамазандин вазлиз жандин сагъвал, кlван шадвал ва ужувлан ляхнар артухъди апlуз кюмек туври.
