Ихь ватанагьлийир гьяждиъ

Ихь ватанагьлийир гьяждиъ

Гьюрматлу ватанагьлийир, аьзиз дустар! Гьяж тамам апlувал гьарсар мусурман касдин фарзарикан ву ва гьарсар мусурман касдиз тамам апlуз юкlв хъайи ляхнарикан ву. Аллагьу Тааьлайи думу ляхин мусурмнариина фарз гъапlну ва гьадму вахтнахъанмина гъийин йигъазкьан гьарйисан мусурмнар гирами жилариина гъягъюри шулу.

Ислам дин яркьуди тарабгъуз мумкинвал тувбахъанмина ихь гьюкуматдианра йислан-йисаз гьяждиз гъягърударин кьадар артухъ шула, гьямд ибшри Аллагьу Тааьлайиз.

Магьа гьаму йисанра ихь уьлкейиан гизафдар гирами жилариина гъушну.

Ихь табасаранлуйирикан кlуруш, гьаму йисан дурарра саб кьадар айи. Дурарикан саб кьадар Сулейман Керимовдин путевкйирихъди гъушдар, тмундар чпин пулин дакьатарихъ гъушдар ву.

Вари сагъ-саламатди душну, чпиин али фарзра тамам дапlну, кьяляхъ гъафну.

Му макьалайиъ саб жара дестейикан мялумат тувдихьа.

Гьаму йисан, сабпи ражари вуди, гьяждиз гъягърударин арайиъ табасаранлуйирин саб дестера айи. Дурари, Табасаран райондин имам Ансар Рамазанов кlули ади, му йисан гьяж тамам гъапlну. Дупну ккундуки, мициб къайдайиинди табасаранлуйир сабпи ражари гъушну. Улхьан йисари вари жара халкьарихъди кидикьну шуйи.

Гьаму йисан саб хизанси, чиб-чпихьна аьхю гьюрмат ади, заан хъуркьувалариинди, саб жюрейин манигъвал адарди му ляхин кlулиз адабгъну.

Гьаму дестейин арайианра яркьуди саб хизандикан ктибтуз ккундузуз. Думу Гурхун гъул’ан Мягьячгъалайиз кюч духьну, гьадушваъ яшамиш шулайи Аскероварин хизан ву.

Гьаз му хизандикан ктибтбанди гъахьну? Саб кlуруб, хизандиан жилирра, хпирра – кьюбредра сатlиди дуфнайи. Кьюб кlуруб, хизандин эйси Эскер халу улариз рябкърур дайи. Саб улиз лапра цlибди рябкъюйи, амма фужкlа хътарди саб йишвахьнара гъягъюз шулдайи. Гьаци вуйиган, сабпи йигъланмина вари дестейи му ксариз асас фикир тувуз хъюгъю.

Яшнанна аьхюдар вуйивализ лигну, гьарури чпиан удукьруси дурариз кюмек апlуйи. Эскер халу ва дугъан уьмрин юлдаш Сунаханум хала лап ужуб умун хасиятнан, гъюдли ва юкlв кабсру инсанар вуйи. Гьяждиъ ади 27 йигъандин арайиъ мурари гьич сабанра чпиккан гъайри кас инжиг шлу ляхин гъапlундар.

Эскер халу Ничlрас гъулан школайиъ математика дарсар туври гъилиху кас ву. Хъасин Мягьячгъалайиз удучlвну гъушну. Лап жигьилди имиди балихъра мягьрум гъахьну. Кlваъ дерд-хажалатра ади, фици чан ккуни бай му дюн’яйилан гъушнуш, ктибтуйи. Ав, жвув чlивиди имиди бай фаркьат апlувал абайиз-бабаз лап гъагъи ляхин ву. Амма думу ляхнар ухьлан асиллу дар, Аллагьу Тааьлайин гьюкмариз табигъ шулахьа. Аллагьу Тааьлайи женнетагьларикан апlри! Амин!

Газат урхурайидарин суал шулки, гьаму вари гьяждин фарзар уларизра дярябкъру яшлу касди фици тамам гъапlникlан кlури. Гьямд ибшри, Аллагьу Тааьлайи мицдар гирами жилариин кюмек дарди сар касра гъидритур. Сабпи йигъланмина хъюгъну, вари гьяждин фарзарра тамам дапlну, тап Мягьячгъала шагьриъ аэропортдиз гъяйизкьан ихь табасаран жигьил баяри кюмек гъапlну. Дурар шубур гъардаш вуйи: Халид, Расул ва Мугьяммад. Му ксарикан Аллагь ﷻ рази ишри! Дурар гьарвахтна, Эскер халу чпин абаси дидисну, гьадмукьан гьюрмат ади му касдихъди шуйи. Иллагьки Халид. Гъудгниз гъягъюрушра, Кябайихъна гъягъюрушра ва имбу вари ляхнариз думу лап заан дережайиинди лигури гъахьну. Варидари му баяриз аьхю вуйи чухсагъул кlуйи ва чпин абайина бабу му баяриз туву заан эдебваликан, инсанваликан улхури, варидари дурарин гъиллигъариз заан кьимат тувуйи. 

Ав, мицдар баяр гъийин заманайиъ ади хьували ихь инсанарин юкlвариъ рягьимлувал, аьхюрихьна заан гьюрмат айивал улупура.

Гьяждин вари фарзар тамам гъапlу Эскер халуйин ва Сунаханум халайин разивалин кьадар адайи. Дураризра мици лап читинди хьибдичвуз, душваъ читинвалар гизаф шулу кlуруган, му ксари Аллагьу Тааьлайик умуд кивну, рякъюъ учlвну.

Магьа гьяждиан дуфну вазтlан артухъ гъубшну, амма гъийин йигъанра дурар, саб хизанси, кми-кмиди чиб-чпихьна зенгар апlури шулу.

Вари группа 27 йигъандин арайиъ сатlиди гъахьиган, дурар саб хизанси ктикьуру. Гьяж дапIну ккудубкIбахьна вари чиб-чпихъди ужудар аьлакьйир ади, арайиъ дуствал ади шулу.

Гъит Аллагьу Тааьлайи варидарин гьяж кьабул апlри, гъит вари женнетагьлийир ишри. Эгер ухьу сагъ-саламатди гъузиш, гъюз имбу йисарира гьяждиз табасаранлуйирин дестйир тешкил апlидихьа. Гъит Аллагьу Тааьлайи ухьуз гьациб мумкинвал туври.

Ансар Рамазанов