Йиз швушв варитlан ужур вуйиз
Йиз швушв варитlан ужур вуйиз
Сижарна швушв - му тема гьарвахтна учlруди дугъубжвнайи мисаларикан ву. Му заманайиъ дурарин сар-сариз вуйи аьксивалариан гизаф хизанар ккадахьури шулу.
Хъа улихьна вахтари саб хулаъ кьюр-шубур швушв яшамиш шуйи.
Узу тазади швуваз дуфну имиди, думу хулаъ кьюрсана швушв айи. Думуган фициб читинвал ашра, хулаъ гъабхьиб хизандин айитl гъубзри шуйи. Лап цlиб хизанаринтlан чIатинди сес удубчlвурдайи. Жигьиларин арайиъ саб фукlа-мукIа гъабхьишра, ярхи дарапIди, дишла мясляаьтнахъна гъюйи.
Хъа гьамус дици дар. Садар хулариъ кьюр швушв яшамиш шлу хизанар имдар, имишра - лап цlибтlан. Амма гьаци вушра, жигьиларин хизанар ккадахьура. Гьаз гъапиш, сари тмунурин гаф гъадабгъури имдар, гьюрмат уьрхюри имдар.
Хъа йиз швушв варитlан ужур гьаз вуйкlан, кlури, учву гьерхиш, гьамциб жаваб тувурза. Узура швушвди гъахьунза. Гьаму узуз йиз терефназди дапlну даккни ляхин узу дугъан терефназдира апlури шуладарза.
Эгер чаз саб фукlа апlуз ккундарш, дугъан чан тахсир ву. Узу вари йиз уьмур гьадрариз ужи ибшри кlури гьапlунза. Хъа эгер чпин гележег утканди ккундарш, гъит чпин ужи шлуганси апlри.
Гьаддиз йиз швушв варитlан ужур вуйиз, кlури шулза, ва чан багахьра гьаци кlурза.
Яшлу сижрарихьна илтlикlури пуз ккундузузки, учву кlурубдин асас пай вари гьякь ву, гьаз гъапиш учвуз уьмур дябкъначвуз ва фици гъапlиш ужи вушра аьгъячвуз. Амма гъийин жигьил наслариз артухъ ляхин апlуб читинди рябкъюра. Думутlанна гъайри, телефондиъ дусбахьан вахтра адар. Йигъандин вахтнакан гьацl дурарин телефондиъ дусну гъябгъюру. Хъа телефон гьадабгъ, ляхин апlин гъапиган, гиран шула.
Эй жигьил швушвар! Ичв багахь яшлу инсанар хьимиди, дурарихъан уьмрин тажруба гъадабгъай, дурариз гьюрмат апlинай.
Хъасин аьхюр имдруган, швумал шулчва. Дурариз гьюрмат апlинай, учву яшлу гъахьиган, учвузра гьюрмат хьибди.
Жигьилди имиди, жандиъ кьувват имиди, сарин кюмек адашра, яшамиш шулза кlури, хъа йигъар-вахтар гъушган, думу гъалатlнан фикир вуйиб мялум шулу.
Узу жилириз гъягъруган, ич дадайи гьамци гъапну: «Лиг йиз риш, ичв хулаъ гъахьи гафар хьади узухьна гъюб герек дар. Уву гъягъюрайи хулаъ фициб къайда аш, ари гьадму кьабул апlин. Яв хулаъ айидариз узузтlан артухъ гьюрмат апlин. Гьаци гъабхьиш, увузра гьюрмат шул».
Дадайин гьаму гафарихъди гъягъюри гъахьунза, ва гъийин йигъан йиз швушваз му гафар кlваин апlури шулза.
Дугъу узуз гьюрмат апlруган, узу дугъаз хъанара артухъ гьюрмат апlури шулза, ва гьамци чиб-чпихьна гьюрмат артухъ шулайич.
Хизан ккебгъувал Пайгъамбарин ﷺ сунна ву, ва му сунна ухьу гьаму жилиллан гъягъяйизкьан заан къайдайиинди кlулиз адабгъури ккунду.
Пайгъамбарин ﷺ гьядисдиъ дупна: «Хизан ккебгъувал йиз сунна ву, ва фуну кас йиз рякъхьан гьидициш, думу узхьан гьидицур ву» (Муслим).
Пайгъамбарин ﷺ гьаму гьядисдиз асас духьну ккергъай ичв хизанар ва думу хизанар берекет ади, шадвал ва бахтар ади дуламиш шлуганси, зегьмет зигай.
Гъит Аллагьу Тааьлайи ухьуз му уьмур Чан разивалиъ шлуганси, аьхюриз гьюрмат ади, хъа бицlирихьна рягьимлуди яшамиш хьуз кюмек туври.
