Жигьил шубарин хизан ккебгъувал
Жигьил шубарин хизан ккебгъувал
Ассаламу аьлейкум, аьзиз ватанагьлийир!
Гьямд ибшри Аллагьу Тааьлайиз, ихь уьмриъ шулайиб вари Аллагьу Тааьлайин амриинди шула, ва гьарсаб ляхниъ Дугъу улупнайи заан къайдйирра а. Саспидари жвуван уьмриъ шулайибдиан чаз дарс гъадабгъура, хъа саспидари фикир тутрувди гъибтра.
Аллагьу Тааьлайи инсан имбу махлукьатарихьан аькьюл тувбиинди заан дапlна. Ухьуз аькьюл-фагьум тувна ва ухьу гьарсаб апlру ляхнихьна диндин терезариинди дилигну ккунду.
Гъи жигьиларин хизан ккебгъувал заан месэлйирикан дубхьна. Фукьан жигьиларихьан хал ккебгъуз шуладар. Дурарикан гизафдарин хал ккебгъуз гьязур духьнайи вахтна, фу-вуш себеб арайиз дуфну чlур шула. Гьаз вуйкlан? Му суалназ себебар гизаф а. Саб тереф - бай, хъа тмуну тереф - риш. Мурарин ляхнар асас пай чlур апlруб йисариинди чиб-чпихъди гафар-чlалар апlури хьуб ву.
Сабпи ражари таниш духьну имиди, дурариз чиб-чпин нукьсанвалар рякъюрадар, хъа гафар-чlалар артухъ хьпахъ чиб-чпихьна суаларра артухъ шулу. Думу гаф-чlал апlру вахтна, чпи гьеле никягь дапlнадаршра, жилирна хпирси вуча кlури фикир шулу. Хъасин чlур шлу вахтна, дурарин сарин тмунурихьна тягьнйирра артухъ шулу.
Аьлимари кlураки, шуран терефнаан гаф дибисну гизаф вахтназ гъитуб ужи дар, жюрбежюр ляхнар арайиз гъюру. Варитlан ужуб вахтниинди дурар эвлемиш апlуб ву.
Хизан ккебгъну, жилирна хпир гъахьиган, дурар яваш-явашди чиб-чпин гъавриъ шул, арайиъ гьюрматра шул.
Гъи, гьяйифки, саспидари му ляхнарикан фикир апlурадар. Ав, варидариз чпин ляхнар заан дережайиинди ужудар духьну ккунду. Ав, ухьузра ихь веледарин шадвал ккундухьуз. Хъа гьаддихъди сабси Аллагьу Таьлайи ухьу фу бадали халкь дапlнаш. кlваълан гьапlну ккундар. Саспи дюшюшариъ ухьуз Аллагь кlваин шулдар, хъа саб читинвал алабхъган, дишлади кlваин шулу. Дици дубхьну ккундар. Ужуб гьялнаъра, читинвалариъра Аллагь кlваъ ади ккунду. Вари шулайиб Дугъан амриинди шулайиб ву.
Гьаци ву хизан ккебгъувалин гьякьнаанра. Шубаризра чпиз ужур, уткан, хъуркьувалар айи жилир ккунди шул. Абйир-бабаризра гьаци ккунду. Хъа ухьу асас фикир тувну ккунду думу касдин Аллагьу Тааьлайихьна вуйи аьлакьйириз. Балира шуран гьадму терефназ дилигну ккунду. Гьаци гъабхьиш, ухьу Пайгъамбарин ﷺ суннайихъди гъягърударикан шул.
Хъанара ккун апlураза, хизан ккебгъруган, дикъатниинди фикир тувну ккуни ляхнар а. Гьадрариз сабпи нубатнаан фикир тувну ккунду.
Мал-мутму ва имбу ляхнар Аллагьу Тааьлайи гьаруриз дибикlна. Инсан чlивиди имиди, дугъаз дибикlнайи ризкь имиди, думу яшамиш хьиди. Гъийин заманайиъ гаш’валра адар, гъазанмиш апlуз мумкинваларра а.
Гьарсаб хизандиз му заманайиъ ккунди айиб саб ву: бахтлу хьуб. Бахт айи хизандиъ берекетра шул, имбу хъуркьуваларра шул.
Гъит Аллагьу Тааьлайи гьарсаб хизандиъ берекет, шадвал ва хъуркьувалар ишри.
