Баракат гьаз адар?

Баракат гьаз адар?

Баракат кIуру гаф аьраб чIалнаан дуфнайиб ву, ихь табасаранлуйири думу гаф «берекет» кIури ишлетмиш апIура. Баракат – давам ва артухъ апIувал ву. Думу гафнан мянайиз Аллагьу Тааьлайихьан вуйи ужувлан, хайирнан вуйиб вари дахил шула.

Аьбдуллагь ибн Бусрайи Пайгъамбарин ﷺ гафар хура: «Я Аллагь, Уву тувуб дурариз берекетнануб вуди дебкк, дурарин аьфв апIин ва рягьим апIин» (Муслим, Абу Давуд). Аллагьу Тааьлайи Чав халкь дапIнайибдин гьарсабдин кьадар ва ризкь завар-жилар халкь апIайиз 50 агъзур йис улихьна улупну. Аьбдуллагь ибн Амр ибн альАсди Пайгъамбарин ﷺ гафар хура: «Аллагьу Тааьлайи завар-жилар халкь апIайиз 50 агъзур йис улихьна гьарсаб махлукьатдин кьадар вари дебккну» (Муслим, ат-Тирмизи).

Аллагьу Тааьлайи дебкку кьадарнак наслар, сагъ’вал, малмутму ва гь.ж. кахьра. Гьамрар вари Аллагьу Тааьлайин кьадарар ву ва дурар Аллагьу Таааьлайин гьикматвалиинди улупнайи вахтна тамам шулу. Амма Аллагьу Тааьлайи саспи инсанариз ризкь артухъ гъапIну, хъа тмундариз - кам. Инсандиз чаз улупнайиб рубкьруган, дугъахьна я вари артухъди, тамамди гъюру, ясана цIибди ва берекет ади. Мисалназ, инсандиз аьхю кьадар пул ади шулу, миллионариинди, амма дугъан аьхирин натижайиз лигуруш, думу пулар анжагъ кIажардитIан гъузрадар, гьаз гъапиш душваъ берекет адайи. Берекет адарди хьувал гизаф ляхнарилан асиллу ву. Дурарикан асас пай инсанди чав арайиз хурайи себебар вуди шулу. Берекет адарди хьувализ себеб шулу гунагь ляхнар апIувал - му хусуси лишнарикан саб ву.

Савбанди Пайгъамбарин ﷺ гафар хура: «Кьадар дигиш хьуз дюаь себеб шулу, ужувлан ляхнар артухъ апIруб ужуб хасиятналан шул. Дугъриданна, инсан, жвуву апIурайи гунгьар себеб духьну, чан ризкьнахъ мягьрум шулу» (Аьгьмад). Хъа саб бязи дюшюшариъ ризкь кам хьувалин себеб гунгьар вуди шулдар, хъа Аллагьу Тааьлайи тувнайи имтигьян вуди шулу. Ухьуз аьгъюганси, Пайгъамбарин ﷺ гизаф асгьябар касиб вуйидар гъахьну. ДумутIанна гъайри, Пайгъамбарра ﷺ гьациб мюгьтаж’валиъ шули гъахьнуки, гьятта бязи вахтари ипIруб гьязур апIуз кIури хулаъ цIа кипуз мумкинвал адарди гъахьну. Амма дурарин аьжузвал ризкьнаъ берекет адрувалиан вуйиб гъабхьундар. Аллагьу Тааьлайи гьациб жюрейиинди Пайгъамбарихьан r, асгьябарихьан имтигьян гъадабгъури гъахьну, читинваларикк ккюгъган, гьадрарин дережа хъанара за апIуз. Берекет адрувалин сабсана себеб вуди гьюсудвал улупуз шулу. Гьюсудвали инсандиз аьхю зарар тувру. Хъа гьюсудвал жвуван варитIан багахьлу касдихьнара кмиди хьуз мумкин ву.

Берекет адрувализ гьацира себеб шулу кучIлар апIувал, алдатмиш апIувал, ариш-веришдиъ аьмал апIувал ва гь.ж. Ариш-веришдиъ кучIал апIувал гъи лапра инсанарин арайиъ дарабгънайи ляхнарикан саб ву. КучIал ишлетмиш апIруган, инсанарин хиял шул, чпи гьаддиинди аьхю девлетар гъазанмиш апIура, кIури. Амма берекет адру мал-мутмуйи инсандиз анжагъ зарартIан тувурдар. Дицир кас аьхириъ сабра дарди гъузур. Берекет адрувалин сабсана себеб гьарган ху апIури хьуб ву. Абу Гьурайрайи Пайгъамбарин ﷺ гафар хура: «Ху апIувалиан мутму гъябгъюр, берекет гъубзурдар» (аль-Бухари, Муслим, Абу Дауд).

Сабсана себеб вуди риба (процентар илитIувал) гьисаб шула. Аллагьу Тааьлайи Чан Каламдиъ дупна (мяна): «Аллагьу Тааьлайи риба (процентар) айиб гъибтурдар, садакьа айиб артухъ апIуру» (сура «Аль-Бакьара», аят 276). Гъит Аллагьу Тааьлайи ухьу Чан берекетнахъ мягьрум дарапIри! Амин!

НУРМУГЬЯММАД ИЗУДИНОВ