Халкьдин арайиъ ислягьвал ибшри
Хив райондин цlийи имам Анвер Жабировичдихъди вуйи интервью
Ассаламу аьлайкум, аьзиз ватанагьлийир! Ихь газатдин машариъ шагьрар-районариъ лихурайи имамарин уьмрикан, дурари гъабхурайи диндин ляхнарикан мялумат тувуб давам апlурахьа. Гъулан имамвал апlуб гизаф читин ва аьхю жавабдар ляхин ву. Хъа жвув райондин имам вуйиган, думу ляхин гизаф ражари артухъ шула, ва думу чарасуз кlули дубхну ккунду.
Гьарсар имамдихъан, дурарихъди сабси му имамарин жямяаьтдиъ айи читинваларихъан жаваб тувну ккунду. Увуз фукьан читинди вушра, вари яв читинвалар ккеркну, машнаъ инчl ади имбу имамарихъди дилихну ккунду.
Магьа гъи ухьу интервью апlурайирра Хив райондиъ цlийиди дерккнайи имам ву.
- Анвер-гьяжи, сабпи нубатнаан ихь газат урхурайидар увухъди таниш апlурхьа.
- Узу 1989-пи йисан Дербент райондин Мамедгъала гъулаъ бабкан гъахьунзу. Душваъ мектеб ккудубкlбан кьяляхъ ДГПУ-йик урхуз кучlвунза. Университет ккудубкlну, эвлемиш духьну, жюрбежюр ляхнар апlури гъахьунза. 2019-пи йисан Аллагьу Тааьлайин амриинди гирами жилариина жвуван фарз гьяж тамам апlуб кьисмат гъабхьнийиз. Гьяждиз душну сад йислан диндин аьгъювалар гъадагъуз медрессейик урхуз кучlвунза.
- Медрессейин кьяляхъ фу ляхин апlури гъахьунва?
- Медрессейиъ урхурайи вахтна, Дербент райондин Михайловка гъулаъ имам герек духьну, гьадушваъ имамди дерккунзу. Гьаддихъанмина думу гъулан имамвалин вазифйир гъахури, жвувхьан шлуганси жямяаьтдихъди лихури гъахьунза. Ухьуз мялум вуйиганси, Мамедгъалайиъ, шид алжабгъну аьхю зарар гъабхьнийи, гьадму вахтнара душваъ лихурайза, учузра гизаф зарар гъабхьну. Гьаддин кьяляхъ саб вазлилан магьа Хив райондин имамди гьаунзу.
- Ав, дугъриданна, думу вахтна инсанариз гизаф зарар гъабхьну. Думу аьгьвалатнаъ имамарин вазифа фу вуйи?
- Учу дишлади уч духьну жямяаьтдиз кюмек апlбахъ гъухьунча. Фу кьадар жара йишвариан инсанар кюмекназ гъюйи. Гьадрариз, фуну ляхин апlуруш, улупури, дурариз ипlруб гьязур апlури, читинвалиъ ахъну ипlуз ужуб адрудариз хулаз ипlруб гъабхури - яни саб гафниинди вари ляхнариъ иштирак гъахьунча. Думуган му йизуб, тму явуб кlуру вахт дайи. Гьарсари чаан удукьруси кюмек апlури гъахьну. Гьаци гъабхьундарйиш, душваъ хъанара артухъ читинвалар шуйи. Гьаддихъди сабси, хъанара кюмек гъапlдариз варидариз аьхю чухсагъул пуз ккундузуз. Дугъриданна, дагъустанлуйири нубатнан ражари чпин сабвал улупну. Аллагь рази ишричпикан!
- Хив райондин имамди деркку вахтна, диндин ляхин фтилан ккебгъунва?
- Сабпи нубатнаан, имамар уч дапlну, дурарин ва чпин жямяаьтарин фу читинвалар аш, ахтармиш гъапlунза. Имамар ихь вари ляхнарин улихь хьайидар ву, ва чпин жямяаьтарин аьгьвалат фу вуш, фицдар читинвалар аш, дурариз хабар а. Гьаддиз имамарихъ хъебехъну, яваш-явашди айи читинвалар арайиан адагъуз хъюгъюнча. Ихь гъулариъ гьамусяаьт варитlан лазим вуйиб жигьиларихъди ляхин апlуб ву. Гьаз гъапиш, гъи дарш закур гьадму жигьилар ву халкьдин улихь шлудар, гьаддиз ухьу му жигьиларин фикрар дюзидар духьну ккунибдин гъаври ади ккунду.
- Думу дюз ву. Хъа жигьиларин дици хьпан бадали, фициб ляхин гъабхурачва?
- Дурарихъди деуб-гъудужвуб артухъ дапlну ккунду, гьадрарин тIалабаризра артухъ фикир туврача. Дурарихъди футболиан, волейболиан турнирар гъахури, дурарин арайиз дуфнайи суалариз жавабар туври, жюрбежюр диндин серенжемарра кlули гъахуб планарик кайич. Гьаци дарш хай шулдар.
- Райондин диндин гележег фици рябкъюравуз?
- Фуну ляхниъ вушра, гележег ужуб хьпан бадали, зегьмет дизигну ккунду. Мушваъ, гьямд ибшри Аллагьдиз, гизаф гъулариъ илим дурхнайи жигьил имамар лихура. Дурари ужуб натижара тувра. Эгер гьаму къайдайиинди ляхин кlули гъабхури гъахьиш, му райондин гележегра акуб ва ужуб шул кlури, умуд киврухьа.
- Гьамус ихь газат урхурайидариз яв терефнаан насигьятнан кьюб гаф пуб ккун апIураза.
- Гьюрматлу ватанагьлийир, аьзиз чвйир ва чйир! Гъит Аллагьу Тааьлайи ихь гьарурин гележег акуб апlри. Гъит гьарсаб хизандиъ берекет ибшри. Ухьуз жандин сагъвал тувну имиди, гъачай диндин аьгъювалар гъадагъурхьа, читин месэлйир ахтармиш апIурхьа. Кlваинди гъибтай, аьгъюрна аьгъдрур саб дар.
Чухсагъу увуз, Анвер-гьяжи, уву гъабхурайи ляхниз. Аллагьу Тааьлайикан увуз, яв хизандиз жандин сагъвал, кlван шадвал ва апlурайи ляхнариъ хъуркьувалар ккун апlурача. Имамари гъабхурайи ляхин варитIан читниб ва жавабдарвал айиб ву, Аллагь кюмек ишривуз!
