Изге эшкә - шәфкать, яман эшкә – җәза
Коръән-Кәримдә әйтелгән: (мәгънәсе) “Һәм иман китереп инанучылар белән игелекле эшләр эшләгәннәрне Без, әлбәттә, җәннәттә, асларыннан елгалар агып торган бүлмәләргә урнаштырырбыз, алар анда мәңгегә калырлар. Никадәр матурдыр гамәл ияләренең әҗере, сабыр иткәннәрнең һәм Раббыларына тәвәккәлләгәннәрнең!” (“Әл-ганкәбут” сүрәсе, 58 аять)
Аллаһтан куркып гөнаһлардан сакланучылар, җәннәттә чишмә буйларында күләгәдә рәхәтлектәләр. Вә үзләре теләгән җимешләр алдындадыр. Ашагыз, эчегез тәмләп, ләззәт белән, кылган изге гамәлләрегез өчен! Тәхкыйк Без Аллаһка итәгать итүче яхшы мөселманнарга яхшы нигъмәтләр бирәбез”. (“Әл-Мүрсәләт” сүрәсе, 41-44 аятьләр)
Пәйгамбәребез Мөхәммәд салләллаһу галәйһиссәләм әйткән: “Аллаһ Тәгалә изге коллары өчен Җәннәттә шундый нигьмәтләр әзерләгән, кайсыларны беркемнең күргәне дә ишеткәне дә юк, кешеләр андыйны күз алдына да китерә алмыйлар, хыялларында да юк”.
Кешеләр җәннәтнең әз генә өлешен күрсәләр, ул бизәкләр җир белән күк арасын тутырыр иде...
Җәннәттә кешеләр өчен зиннәтле сарайлар һәм җимешле бакчалар. Һәр җирендә татлы сулы елгалар һәм ширбәтле чишмәләр агып тора. Төрле агачларда матур кошлар сайрый. Ризыклар, сулар ачыктырмый, сусатмый. Җәннәт – ул мәңгелек йорт.
Җәһәннәм – кешеләр ут һәм башка төрле газаплар белән җәзалана торган урын. Ул ут җирдәге утка караганда күпкә кызурак. Җәһәннәмнең эсселеген дә, суыгын да җирдәге белән чагыштырып булмый.
Җәннәт нигьмәтләренә ничек ирешергә?
- Аллаһ кушканнарын үтәп яшәргә;
- Аллаһ тыйганнардан тыелырга;
- Аллаһ Тәгаләгә дога кылырга.
Дога: «Аллааһуммә, иннии әс-әлүкәл җәннәтә үә әгүүзү бикә минән нәәр» (Мәгънәсе: йә Аллаһ, чынлыкта, мин Синнән җәннәт сорыймын һәм җәһәннәм утыннан Сиңа сыенамын!)
