Аллаһ Тәгалә – Ризыкландыручы
Аллаһ Тәгалә барча җан ияләрен Ризыкландыручы һәм Ул ялгыз бер Үзе аларга ризыкны Бирүче. Коръән Кәримдә әйтелгән:
«Хакыйкатьтә Аллаһ – ризык бирүче». (Әз-Зәрият сүрәсе, 58 аять)
Пәйгамбәребез галәйһиссәләм әйтте: «Бала ана карынында 4 айлык булгач, Аллаһ Тәгалә аңа бер фәрештә җибәрә, ул аңа җан өрә һәм Аллаһы Тәгалә фәрештәгә аның әҗәлен һәм ризыгын язарга куша». (Сахих Бохари һәм Мөслим)
Аллаһ Тәгалә кешеләргә ризыкны бирүче булса да, кеше, эшләмичә ялкауланып, ризыкның килүен генә көтеп ятмаска тиеш, ә Аллаһ Тәгаләдән ризык өмет итеп, кәсеп итәргә тиеш.
Кеше Аллаһ Тәгалә биргән ризыкны хәләл юл белән дә, хәрам юл белән дә алырга мөмкин. Хәләл юлдан эзләсә, Аллаһ Тәгалә хәләл юлдан бирер, хәрам юлдан эзләсә, хәрам юлдан бирер. Ризыкны хәләл яки хәрам юл белән табуы кешенең үзеннән тора. Шуңа күрә кеше Кыямәт көнендә ризыкны хәләл яисә хәрам юл белән табуы һәм Аллаһ Тәгалә биргән ризыкны кая тотуы хакында соралачак.
Өмет баглау һәм инану ризыкка түгел, ә һәр җан иясен Ризыкландыручы Аллаһ Тәгаләгә генә булырга тиешле. Чөнки Аның хәзинәсе мул, Аңа чын күңелдән ышанганнар кыенлык күрмәсләр. Тик бер генә туендыручы булган Аллаһны онытып, ризыкка өмет баглаганнар кыенлык күрерләр, хәсрәттән котыла алмаслар.
Аллаһ Тәгалә тарафыннан кешеләргә тормыш сынау өчен бирелгән һәм Ул аларны төрле юллар белән сыный. Шуның өчен кайбер кешеләрне фәкыйрьлек белән, кайбер кешеләрне байлык белән сыный, кайберләрен хасталык белән, кайберләрен курку, кайгы, шатлык һ.б. белән сыный.
Шуңа күрә ризык Бирүче бер Аллаһ Тәгалә генә дип иман китергән кеше фәкыйрь булган чагында сабыр итә һәм хәрам юллар белән ризык табарга тырышмый, бай булган чагында Аллаһ Тәгалә биргән ризыкка шөкер итеп, үз өстендәге зәкят һәм сәдакаларын үтәп, хәләл юлларга акчасын тота. Хак мөселман боларның бөтенесе Аллаһ Тәгаләнең сынавы икәнлеген белә һәм аны исән-сау үтеп, Аллаһның ризалыгын алырга өмет итә.
Кораблар йөзә диңгездә Зур йөкләр төяп. Уйлап карагыз, балалар, Бу түгелме соң нигъмәт?
Җәүһәрия якупова
Инандым мин Аллаһка, Аллаһның барлыгына, Аллаһның берлегенә, Бердер Аллаһым минем. Барлыгы Үзеннәндер, Һич кемсәдән түгелдер, Үзлегеннән булгандыр, Бердер Аллаһым минем. Бер Аллаһым, Үзең Син Һәр нәрсәне бар иткән, Һәркемгә ризык биргән Бердер Аллаһым минем. Аллаһым, Син ялгызсың, Юктыр уртагың Синең, Юктыр тиңдәшең Синең, Бердер Аллаһым минем.
